- بۇگىن ەل دامۋىنداعى ماڭىزدى كۇندەردىڭ ءبىرى. اسىرەسە، قازىرگىدەي كۇردەلى كەزەڭدە بۇل سايلاۋدىڭ بۇرىنعىلاردان ءجونى بولەك. مەملەكەت باسشىسىنىڭ باستاماسىمەن قولعا الىنعان بىرقاتار ساياسي رەفورمالاردىڭ العاش رەت وسى ناۋقاندا ىسكە اسىرىلىپ جاتقانىن دا جاقسى بىلەمىز.

سونىڭ ىشىندە پارتيالىق تىزىمدەرگە ايەلدەر مەن جاستارعا ارنايى 30 پايىزدىق كۆوتانىڭ ەنگىزىلۋىن، پارلامەنتتىك وپپوزيتسيا ينستيتۋتىنىڭ زاڭمەن بەكىتىلۋىن جانە ساياسي پارتيالاردى تىركەۋ ءتارتىبىنىڭ جەڭىلدەتىلۋىن ەرەكشە اتاپ وتۋگە بولادى.

جالپى، بۇگىنگى سايلاۋ پرەزيدەنتىمىزدىڭ الەۋمەتتىك-ەكونوميكالىق باستامالارىن تابىستى جۇزەگە اسىرۋعا جانە قازاقستاننىڭ ءوسىپ-وركەندەۋىنە تىڭ سەرپىن بەرەدى دەپ سەنەمىز. ول ءۇشىن ازاماتتارىمىز داۋىس بەرۋدە بەلسەندىلىك تانىتۋى قاجەت. مەن دە بۇگىن سايلاۋ ۋچاسكەسىنە بارىپ، ءوز تاڭداۋىمدى جاسادىم.

داۋىس بەرۋ – ارقايسىمىزدىڭ ازاماتتىق قۇقىعىمىز جانە بورىشىمىز. بۇل – ءار ازامات ءۇشىن مەملەكەتتىڭ دامۋىنا ىقپال ەتەتىن مۇمكىندىك. سول سەبەپتى، ەلىمىزدەگى بارشا سايلاۋشىلاردى وسى مۇمكىندىكتى جىبەرمەي، ساياسي ناۋقاننان قالىس قالماۋعا شاقىرامىن، - دەدى اشىمباەۆ.

Abai.kz