سارسەنبى, 20 قاڭتار 2021
46 - ءسوز 1842 7 پىكىر 13 قاڭتار, 2021 ساعات 13:43

ءۇمىتىم «اۋىلدا» ەدى...

بيىلعى سايلاۋ ناۋقانىنا ەشبىر ەلەڭ ەتىپ، كوڭىل بولمەدىم. بىزدەگى وتەتىن سايلاۋدا قانداي پارتيانىڭ ەڭ كوپ داۋىس الاتىنى، جەڭىسكە جەتەتىنى الدىن الا بەلگىلى. بەلگىلى نارسەنىڭ ەش قىزىعى جوق.

جالعىز عانا ءالسىز ءۇمىتىم «اۋىل» پارتياسى ەدى. بۇرىن-سوڭدى توزىپ كەتكەن اۋىل ءۇشىن پالەندەي ءىس تىندىرماسا دا، سايلاۋعا دەيىن بار-جوعى بىلىنبەسە دە، ايتەۋىر «اۋىل» دەگەن اتى بار عوي، سايلاۋدان سوڭ ءبىر تىرلىك نىشانىن كورسەتەر، ۇيقىلى-وياۋ جۇرە بەرمەس دەگەن كومەسكى ۇمىتپەن داۋىسىمدى وزگە پارتيالاردىڭ ەشقايسىسىنا ەمەس، تەك «اۋىل» پارتياسىنا بەردىم. سويتكەن «اۋىل» بەس پايىزدان ءسال اساتىن داۋىسپەن كوش سوڭىندا قالدى.

تاڭ قالماسقا امالىم جوق. ەكى قازاقتىڭ بىرىمەن سويلەسە قالساڭ، «اۋىل توزىپ بارادى» دەپ قابىرعاسى قايىسا كۇرسىنەدى. ال «اۋىلدى» قولداعان داۋىس سانى مىناۋ... جالعىز «اۋىل» ەمەس، سايلاۋ الدىنداعى باعدارلامالارىندا «اۋىلدى كوركەيتەمىز» دەگەن ۋادەنى وسى دوداعا تۇسكەن پارتيانىڭ ءبارى دە ءۇيىپ-توكتى. بۇل تامىرى اۋىلدا جاتقان سايلاۋشىلاردىڭ كوڭىلىن اۋلاعانى عوي. اۋىلدىڭ مۇشكىل جاعدايى سايلاۋعا تۇسەتىن پارتيالاردىڭ ناسيحاتتىق «ايىرباس اقشاسىنا» اينالىپ شىعا كەلدى.

قالادا دۇنيەگە كەلسەم دە، بالالىق شاعىم وتكەن، اتا-بابامنىڭ تامىرى تارقاعان اۋىل جالعىز ماعان ەمەس، بارشا قازاققا ەرەكشە ىستىق شىعار. بىراق مىنا سايلاۋدا ونداي سەزىمنىڭ نىشانىن كورە المادىم دا، قايران قالدىم. جاشىككە «اۋىل» ءۇشىن داۋىس قاعازىن تاستاۋ سونشاما قيىن با ەدى؟

دەگەنمەن، پارلامەنتتە وتىرماسا دا، «اۋىل» پارتياسىنىڭ سايلاۋ الدىنداعى ۋادەلەرىن شاما-شارقىنشا ورىنداۋىنا، بەلسەندىلىك تانىتىپ، حالىق اراسىندا بەدەلگە يە بولۋىنا ەش كەدەرگى جوق.

مارات ەرمۇقانوۆ 

Abai.kz

7 پىكىر