كۇن سايىن قىزمەت بابىمەن قانشاما ادامدارمەن جولىعامىز، كەزدەيسوق كورىسەمىز. پاندەميادان قورقىپ تۇرساق تا ماسكى تاققان كۇيى اماندىق، ساۋلىق سۇراسامىز. سوندا بىرقاتارى بالاسى اقش-تا، نەمەسە كانادا، نەمەسە لوندوندا ەكەنىن ايتىپ جاتادى. “وقۋىن بىتىرگەن سوڭ سول جاقتا قالدى” دەيدى وكىنىشپەن. جاتجۇرتتىق بىرەۋگە ۇيلەنىپ كەتە مە دەگەن قورقىنىشپەن كەرى شاقىرىپ العاندارىنىڭ ءوزى جارتى جىل، ءبىر جىل ازەر شىداپ، اقىرى قولدارىن ءبىر سىلتەپ، وزدەرى ىڭعايلى كورگەن شەت ەلىنە تارتىپ وتىرادى ەكەن.

ايتاتىن ۋاجدەرى: “قازاقستاندا جاستاردىڭ “كرىشاسىز” قىزمەتتىك وسۋىنە مۇمكىندىك جوق”، “جالاقىسى مامانداردىڭ شەتەلدە العان ءبىلىم دەڭگەيىنەن الدەقايدا تومەن”، “كوررۋپتسيالىق بىلىق-شىلىقتار ۇنامايدى”، “باستىققا بىلىمنەن گورى جاعىمپازدىق ۇنايدى”ت.ب.

ءبارى راس! وكىنىشكە قاراي ءبىز وسىنداي ەل بولاشاعىنا سەنىمىزدىكتىڭ اۋىر سالدارىن تارتا باستادىق. رەجيم اۋىسقانعا دەيىن ءالى دە تارتاتىن بولامىز.

كەشە ءىلىنىپ-سالىنىپ پارلامەنت ءماجىلىسى مەن ءماسليحات دەپۋتاتتارىنىڭ سايلاۋى ءوتتى. ەل تانيتىن بىرقاتار ادامدار “سايلاۋعا باردىق، ءوزىمىز قالاعان پارتياعا داۋىس بەردىك” دەپ جەر-جاھانعا جار سالىپ جاتىر. بىرقاتار بايقاۋشىلاردىڭ مالىمەتىنشە داۋىس بەرۋشىلەر سانى ايتارلىقتاي تومەندەگەن. تەك الماتىنىڭ وزىندە داۋىس بەرۋ ءۇشىن تىزىمگە الىنعانداردىڭ 27,7 پايىزى عانا كەلگەن. بۇل كورسەتكىش ۇمىتپاسام، ەلوردادا 44 پايىز، شىمكەنتتە 53 پايىز بولىپتى. كوپ قالالاردا 50 پايىزدىڭ ار جاق-بەر جاعى. ياعني ەلەكتوراتتىڭ بەلسەندىلىگى الدەقايدا تومەندەگەنى بايقالادى.

حالىق وتىرىك ۋادەلەردەن، كوزبوياۋشىلىقتاردان شارشاعان. ونىڭ ۇستىنە قالاي داۋىس بەرسەك تە “Nur Otan” جەڭەدى عوي دەگەن ساياسي شاراسىزدىق. بۇگىنگى ەكزيت-پۋل ءنومىرى ءبىرىنشى پارتيا 71 پايىز العانىن جاريالاپ تا قويدى. كۇمان كوپ. بىراق اكىمشىلىك رەسۋرس ءبىر كىسىدەي جۇمىلدىرىلعان سوڭ ءبىزدىڭ ەلىمىزدە باسقاشا بولۋى دا مۇمكىن ەمەس قوي.

“كۇركىرەپ كۇندەي ءوتتى عوي سوعىس” دەمەكشى، مىنەكي، سايلاۋ دا ارتتا قالدى. بيلىك پارتياسىنىڭ “ويداعىداي” كوش باستاعانىن كوزىمىز كوردى. بۇگىن-ەرتەڭ ءماجىلىس جاساقتالعان سوڭ ۇكىمەت تە دوعارىسقا كەتەر. جاڭا ۇكىمەت تاعايىندالار. 2019 جىلعى پرەزيدەنت سايلاۋىنان سوڭ ق.توقاەۆقا انت بەرمەگەن كۇش قۇرىلىمدارىنىڭ باسشىلارى بيىل دا ورىنتاقتارىن ساقتاپ قالسا وتكەن جولعىداي وعان تاعى انت بەرە قويماس. كەيبىر ۆەدومستۆو باسشىلارى وزگەرگەنىمەن رەجيم قاز قالپىندا قالا بەرەدى.

سايلاۋ وتكەنمەن حالىق كۇتكەن وزگەرىستەر، تۇبەگەيلى رەفورمالار ورىن الماسى انىق. مۇنىڭ ءبارى حالىقتىڭ، اسىرەسە جاستاردىڭ ەرتەڭگى كۇنگە دەگەن سەنىمىن ء“داۋ تىشقاندارداي” كەمىرىپ بارادى. ەڭ سۇمدىعى جاستاردىڭ وتتاي جانعان پاتريوتتىق سەزىمدەرى جويىلىپ كەتە مە دەپ قورقامىن.

ەلدەن تەحنيكالىق، ايتيشنيك، ەكونوميست ماماندار كەتىپ جاتىر. تۇراقتى مەكەندەۋگە كەتىپ جاتقاندارىنان باسقا جاي ۆيزامەن بارىپ قالىپ قالعاندار، تۇرۋعا يحتيارحات كۇتىپ جۇرگەندەر قانشاما؟ سوڭعى ءتورت جىلدا ەميگراتسياعا كەتىپ جاتقاندار ونىڭ الدىنداعى كەزەڭمەن سالىستىرعاندا 38 پايىزدان 88 پايىزعا وسكەن. بيلىك وسى تەندەنتسيانى نەگە قاپەرگە المايدى؟ مەملەكەت ەرتەڭگى كۇنى كىمگە قالادى، دەپۋتات مىرزالار؟

مارات ءبايدىلداۇلىنىڭ جازباسى

Abai.kz