جۇما, 29 ناۋرىز 2024
3773 2 پىكىر 27 قاڭتار, 2021 ساعات 12:31

حالىقتىڭ يممۋنيتەتى جايلى QR كود ەنگىزىلەدى

پرەزيدەنت قاسىم-جومارت توقاەۆ 25 قاڭتار كۇنگى ۇكىمەتتىڭ كەڭەيتىلگەن وتىرىسىندا كوروناۆيرۋسقا قارسى قازاقستاندىق ۆاكتسينا سىناقتان ءساتتى وتسە، "وتاندىق ۆاكتسينانى سالدىرامىن" دەپ مالىمدەدى. QazCovid-in قازىر سىناقتىڭ ءۇشىنشى كەزەڭىنەن ءوتىپ جاتىر.

سەيسەنبى كۇنى پرەزيدەنت دەنساۋلىق ساقتاۋ ءمينيسترى الەكسەي تسويدان ۆاكتسيناتسياعا دايىندىق بارىسىن سۇراپ، وعان "مۇقيات دايىندالۋ" قاجەتتىگىن ايتتى.

الەكسەي تسوي ەلدەگى مەديتسينالىق مەكەمەلەردىڭ بارلىعى ۆاكتسيناتسياعا دايىن ەكەنىن جەتكىزىپ، جاقىن ارادا ەلگە كوروناۆيرۋسقا قارسى رەسەيلىك "سپۋتنيك V" ۆاكتسيناسى جەتكىزىلەتىنىن ايتتى. بۇعان دەيىن مينيسترلىك 1 اقپاندا حالىققا كوروناۆيرۋسقا قارسى جاپپاي ۆاكتسينا ەگىلە باستايتىنىن، العاشقى كەزەڭدە رەسەيلىك ءدارى سالىناتىنىن حابارلاعان.

"ۆاكتسيناتسيا – بۇل وزەكتى ماسەلە. بىزگە ۆاكتسينا ەگۋ بويىنشا مۇقيات قاراستىرىلعان ءىرى جوسپار كەرەك. حاوسقا جول بەرمەس ءۇشىن كوپتەگەن نيۋانستاردى ەسكەرۋ قاجەت. تۇتاس العاندا ۆاكتسيناتسيا ەلدىڭ ەپيدەميولوگيالىق احۋالىن تۇزەۋى ءتيىس، بىراق الدا اتقارىلۋى ءتيىس قىرۋار شارۋا بار" دەدى توقاەۆ.

ول كەيبىر ەلدەردىڭ كارانتين ەنگىزۋدە حالىقتىڭ يممۋنيتەتىن نەگىزگە الا وتىرىپ، شەشىم قابىلداي باستاعانىن اتاپ ءوتتى، ۇكىمەتكە "اتامەكەن" ۇلتتىق پالاتاسىمەن بىرىگە وتىرىپ، ءبىر اي ىشىندە حالىقتىڭ يممۋنيتەتى جايلى اقپارات جازىلعان QR كود ەنگىزۋ ماسەلەسىن قاراستىرۋدى تاپسىردى.

قازاقستاندا ءبىرىنشى كەزەڭدە ينفەكتسيالىق اۋرۋحانا، جەدەل جاردەم، رەانيماتسيا ءبولىمى، اۋرۋحانانىڭ قابىلداۋ بولمەسىندە ىستەيتىن قىزمەتكەرلەرگە ۆاكتسينا سالىنادى. ءساۋىر ايىنان باستاپ جالپى ءبىلىم بەرەتىن مەكتەپ، جوعارى وقۋ ورىندارى، مەديتسينالىق قىزمەت كورسەتەتىن مەكەمە ماماندارىنا ۆاكتسينا ەگىلەدى. مينيسترلىك جىل اياعىنا دەيىن 6 ميلليون ادامعا ۆاكتسينا سالۋدى جوسپارلاپ وتىر.

بىلتىر رەسەي بيلىگى سىناقتىڭ ءۇشىنشى فازاسى اياقتالماي جاتىپ ەكى ۆاكتسينا - "سپۋتنيك V" جانە "ەپيۆاككورونا" ەكپەسىنىڭ تىركەلگەنىن حابارلاعان. تامىز ايىندا قازاقستان مەن رەسەي "سپۋتنيك V" جەتكىزۋ تۋرالى كەلىسىمگە دە كەلگەن. بىراق حالىقارالىق ساراپشىلار سىناقتىڭ ءۇشىنشى كەزەڭى اياقتالماعان رەسەيلىك ۆاكتسيناعا كۇمانمەن قاراعان. جەلتوقسان ايىنىڭ سوڭىندا "قاراعاندى ءدارى-دارمەك كەشەنىندە" رەسەيلىك "سپۋتنيك V" ۆاكتسيناسى وندىرىلە باستاعان. كەشەندە باستاپقى كەزەڭدە ۆاكتسينانىڭ 2 ملن دوزاسى شىعارىلادى دەپ وتىر.

دەنساۋلىق ساقتاۋ مينيسترلىگى تۇرعىندارعا قازاقستاندىق QazCovid-in ۆاكتسيناسى دا ەگىلەتىنىن ايتىپ وتىر. كلينيكالىق سىناقتىڭ ءۇشىنشى كەزەڭىندە سىنالىپ جاتقان قازاقستاندىق QazCovid-in ۆاكتسيناسى 19 جەلتوقساننان باستاپ 3 مىڭ ەرىكتىگە سالىنا باستاعان.

قازاقستاندا سوڭعى مالىمەت بويىنشا، كوروناۆيرۋس پنەۆمونياسىنا شالدىققانداردى قوسقاندا 227 165 ادامنان Covid انىقتالعان، 3,5 مىڭنان استامى قايتىس بولعان. كەيبىر ساراپشىلار كوروناۆيرۋسقا شالدىققاندار مەن ودان قايتىس بولعاندار سانى بۇدان الدەقايدا كوپ دەپ سانايدى.

Abai.kz

2 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3611