زەلەنسكي: «سوۆەت گازەتتەرىن وقىماڭىز»
ۋكراينا پرەزيدەنتى ۆلاديمير زەلەنسكي Facebook پاراقشاسىندا ەلدەگى «112 ۋكراينا»، «NewsOne» جانە «ZIK» تەلەارنالارىنىڭ جابىلۋىنا قاتىستى پىكىر ءبىلدىرىپ، ولارعا سالىنعان سانكتسيالاردى زاڭدى، اقىلعا قونىمدى جانە ءادىل دەپ اتادى.
زەلەنسكي ءوز پىكىرىندە «ۋكراين جازۋشىسى» ميحايل بۋلگاكوۆتىڭ ءسوزىن مىسالعا كەلتىردى.
«بۋلگاكوۆتىڭ: «تۇسكى استىڭ الدىندا كەڭەس گازەتتەرىن وقىماڭىز» دەگەن ءسوزى بار. كلاسسيكتىڭ ءسوزىن ءسال وزگەرتۋگە رۇقسات ەتىڭىز: ەگەر اسىڭىزدىڭ دەمىن كەتىرگىڭىز كەلمەسە، ساتىلعان باق پەن قالتالىلاردىڭ قولشوقپارى بولعان تەلەارنانى كورمەڭىز»،- دەدى زەلەنسكي.
سونىمەن قاتار ول، ءوز مالىمدەمەسىن ورىس تىلىندە ءتۇسىرۋى دە كەزدەيسوقتىق ەمەس ەكەنىن ايتتى.
«وكىنىشكە قاراي، ءبىزدىڭ ادامدار ورىس تىلىندەگى شىلعي وتىرىك اقپاراتتار اعىنىنىڭ استىندا قالدى. بۇل وتىرىكتەردى جوققا شىعارۋ ءۇشىن، مەن شىندىقتى وسى تىلدە ايتىپ وتىرمىن», - دەدى ول.
سونداي-اق، ۋكراينا پرەزيدەنتى تەلەارنالاردىڭ جۇمىسىنا تىيىم سالۋىن قاۋىپتىڭ الدىن الۋ دەپ باعالادى.
«كىم-كىمگە دە وككۋپاتسيالانعان ايماقتارمەن بيزنەس جاساۋ قالىپتى نارسە بولسا، سول ايماقتارداعى زاڭسىز، پسەۆدوقۇرىلىمدارمەن جۇمىس ىستەۋ ءتيىمدى بولسا، سايكەسىنشە ولار دا ۋكرايناعا قاۋىپتى دەگەن ءسوز. دەمەك، مەملەكەت تە ولارمەن كۇرەسەدى. بۇل قالىپتى جاعداي. مەن دە پرەزيدەنت رەتىندە مۇنداي قاتەرلەردىڭ الدىن الۋ ءۇشىن قولىمدا بار كەز كەلگەن زاڭدى قۇرالدارمەن ارەكەت ەتەمىن جانە وعان مىندەتتىمىن. سالىنعان سانكتسيا دا سونىڭ ءبىر دالەلى»،- دەدى پرەزيدەنت.
زەلەنسكيدىڭ ايتۋىنشا، سانكتسيا سالۋ تۋرالى شەشىم 2014 جىلى ۋكراينا اۋماعىندا سوعىس ءجۇرىپ جاتقان ساتتە قابىلدانعان. سەبەبى، سول ۋاقىتتا اتالعان ارنالار پروپاگاندامەن اينالىسقان.
«سول جىلدان باستاپ بىزدە سانكتسيالار تۋرالى زاڭ بار. وسى زاڭعا جانە ۋكراينا كونستيتۋتسياسىنا سايكەس، ۋكراينانىڭ جوعارعى راداسىنىڭ ۇسىنىستارى مەن ونىڭ 2018 جىلعى جارلىعى نەگىزىندە، سونىمەن قاتار ۋكراينانىڭ ۇلتتىق قاۋىپسىزدىك جانە قورعانىس كەڭەسىنىڭ مالىمەتتەرى نەگىزىندە ارنالاردىڭ يەسىنە سانكتسيا سالۋ جانە ارنالاردىڭ ۋكراينا اۋماعىندا حابار تاراتۋىن توقتاۋ تۋرالى شەشىم قابىلدانعان. بۇل سالماقتى شەشىمدى قابىلداۋ قاجەت بولدى», - دەدى زەلەنسكي.
;feature=emb_titleسونىمەن قاتار، ۋكراينا پرەزيدەنتى اتالعان شەشىمنىڭ ادىلەتتى ەكەنىن ايتتى.
«ۇلتتىق قاۋىپسىزدىك جانە قورعانىس كەڭەسىنىڭ بۇل شەشىمى زاڭدى، اقىلعا قونىمدى، ەڭ باستىسى - ادىلەتتى. مۇنى اقش، ەۋرووداق پەن ۇلكەن جەتىلىك ەلدەرى تولىعىمەن قولدايدى. ولار تسەنزۋرا مەن ۇلتتىق قاۋىپسىزدىكتىڭ ايىرماسىن انىق كورىپ وتىر»,- دەدى ول.
زەلەنسكيدىڭ ايتۋىنشا، اتالعان ارنالار اقپاراتتى بۇرمالاۋمەن اينالىسىپ، ۋكراينا مەن رەسەي اراسىنداعى سوعىستى جوققا شىعارىپ سويلەگەن.
«بۇل ءۇش ارنا دا حالىققا جالعان اقاپارات تاراتقان. ولار ەكى ەل اراسىنداعى سوعىستى كورە تۇرا، رەسەي اگرەسسياسى جوق دەپ سويلەگەن. ال، شىن مانىندە ول بار. ماسەلەن، ولار ۋكراينا مەن رەسەي ازاماتتارى سوعىسىپ جاتىر دەگەن جوق. كەرىسىنشە، بۇل ءبىزدىڭ ىشكى قاقتىعىسىمىز دەپ سويلەدى»،- دەيدى زەلەنسكي.
ال، گرۋزيانىڭ بۇرىنعى پرەزيدەنتى ميحايل سااكاشۆيلي ءپۋتيننىڭ سانكتسيا سالىنعان ءۇش ارنانى ءبىر جارىم ميلليارد دوللارعا ساتىپ العانىن ايتتى.
«كەزىندە گرۋزيادا پۋتين ميللياردەر يۆانيشۆيليگە ءوزىنىڭ سايلاۋ ناۋقانىن جۇرگىزۋ ءۇشىن 2 ميلليارد دوللار بولگەن. ول وسى اقشاعا كوپتەگەن گرۋزين ساياساتكەرلەرى مەن سايلاۋشىلارىن ساتىپ الدى. بىراق ەڭ باستىسى، وسى اقشاعا ول ءوزىنىڭ اگيتاتسياسىن جاسادى جانە باسقا بۇقارالىق اقپارات قۇرالدارىن ساتىپ الدى. سودان كەيىن ءبىز وعان قارسى دەموكراتيالىق ادىستەرمەن عانا ارەكەت ەتۋگە بولادى دەپ ويلادىق. بىراق، ءبىز قاتەلەسكەن ەدىك... ال، زەلەنسكي ءدال قازىر دۇرىس قادامعا باردى. سەبەبى بۇل اگرەسسور ەلدىڭ گيبريدتى سوعىسىنان ءوزىن-ءوزى قورعاۋ ارەكەتى. ونىڭ ەڭ ماڭىزدى بولىگى بۇقارالىق اقپارات قۇرالدارى.
ءبىز بىلەتىندەي، پۋتين مەدۆەدچۋككە بۇقارالىق اقپارات قۇرالدارىن ساتىپ الۋ ءۇشىن ءبىر جارىم ميلليارد دوللار ءبولدى. ءسويتىپ ول ءۇش ارنانى ساتىپ الدى»،- دەپ جازدى ساياساتكەر.
الايدا، ول زەلەنسكيدىڭ بۇل شەشىمى ۇلكەن قاۋىپكە اپاراتىنىن دا اتاپ ءوتتى. ونىڭ ايتۋىنشا، بۇل تەك پروتسەستىڭ باستاماسى عانا. سوندىقتان، زەلەنسكي بۇل كۇردەلى سوعىستا وتە شەشۋشى قادامدارعا بارۋى ءتيىس.
«سوعىس باستالدى جانە جەڭىسكە جەتۋ كەرەك. ويتكەنى بۇل سوعىستاعى جەڭىلىس - ۋكراينا مەملەكەتىنىڭ كۇيرەۋىنە اپارادى. سوندىقتان، جەڭىستەن باسقا جول جوق»,- دەدى سااكاشۆيلي.
ايتا كەتەيىك، بۇعان دەيىن ۋكراينا پەرزيدەنتى «وپپوزيتسيالىق پلاتفورما - ءومىر ءۇشىن» (OPZH) پارتياسىنان سايلانعان جوعارعى رادانىڭ دەپۋتاتى تاراس كوزاك پەن وعان تيەسىلى «112 ۋكراينا» «NewsOne» جانە «ZIK» تەلەارنالارىنا سانكتسيا سالۋ تۋرالى جارلىققا قول قويدى.
ال، بۇگىن باق بەتتەرىندە ۋكراين اسكەرىنىڭ ناتو-مەن اسكەري جاتتىعۋ وتكىزەتىنى تۋرالى اقپارات جاريالاندى.
نۇربيكە بەكسۇلتانقىزى
Abai.kz
