بەيسەنبى, 22 ءساۋىر 2021
ءجون-اق 3250 5 پىكىر 2 ناۋرىز, 2021 ساعات 13:52

جاپاروۆ رەسەيدەن سوڭ بىزگە كەلدى

بۇگىن قىرعىزستان پرەزيدەنتى سادىر جاپاروۆ مەملەكەتتىك ساپارمەن قازاقستانعا كەلدى. نۇر-سۇلتان اۋەجايىندا قىرعىز باسشىسىن قر سىرتقى ىستەر ءمينيسترى مۇحتار تىلەۋبەردى، ەنەرگەتيكا ءمينيسترى نۇرلان نوعاەۆ جانە نۇر-سۇلتان قالاسىنىڭ اكىمى التاي كولگىنوۆ كۇتىپ الدى.

قىرعىز پرەزيدەنتى ءباسپاسوز وكىلدەرىنىڭ ايتۋىنشا، ساپار اياسىندا سادىر جاپاروۆ مەملەكەت باسشىسى قاسىم-جومارت توقاەۆپەن ەكىجاقتى كەلىسسوزدەر جۇرگىزەدى. سونىمەن قاتار، ەكى ەل اراسىنداعى ىنتىماقتاستىقتىڭ وزەكتى ماسەلەلەرىن، سونداي-اق، ءوزارا ءىس-قيمىلدىڭ ودان ءارى دامۋىن تالقىلايدى.

ودان بولەك، قىرعىزستان پرەزيدەنتى ەكس-پرەزيدەنت نۇرسۇلتان نازارباەۆپەن، پارلامەنت ءماجىلىسىنىڭ توراعاسى نۇرلان نىعماتۋلينمەن، پرەمەر-مينيستر اسقار مامينمەن جانە قازاقستاننىڭ ىسكەر توپتارىنىڭ وكىلدەرىمەن كەزدەسۋلەر وتكىزەدى.

جاپاروۆ دەلەگاتسياسىنىڭ قۇرامى مىناداي:

- قىرعىزستاننىڭ سىرتقى ىستەر ءمينيسترى رۋسلان قازاقباەۆ;

- ۆيتسە-پرەمەر-مينيستر، ەكونوميكا جانە قارجى ءمينيسترى ۋلۋكبەك كارمىشاكوۆ;

- پرەزيدەنت اپپاراتىنىڭ سىرتقى ساياسات ءبولىمىنىڭ مەڭگەرۋشىسى داستان ديۋشەكەەۆ;

- قىرعىز رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى جەەنبەك كۋلۋباەۆ;

- قورعانىس ءمينيسترى تاالايبەك ومىراليەۆ;

- اۋىل، سۋ شارۋاشىلىعى جانە وڭىرلەردى دامىتۋ ءمينيسترى اسقاربەك جانىبەكوۆ;

- مادەنيەت، اقپارات، سپورت جانە جاستار ساياساتى ءمينيسترى قايرات يماناليەۆ;

- كولىك، ساۋلەت، قۇرىلىس جانە كوممۋنيكاتسيا ءمينيسترى گۇلميرا ابدىراليەۆا;

- ءبىلىم جانە عىلىم ءمينيسترى المازبەك بەيشەناليەۆ;

- ەنەرگەتيكا جانە ونەركاسىپ ءمينيسترى كۋبانىچبەك تۋردۋباەۆ;

- ينۆەستيتسيالاردى ىلگەرىلەتۋ جانە قورعاۋ جونىندەگى مەملەكەتتىك اگەنتتىكتىڭ ديرەكتورى المامبەت شىقماماتوۆ;

- ەكولوگيالىق جانە تەحنيكالىق قاۋىپسىزدىك جونىندەگى مەملەكەتتىك ينسپەكتسيانىڭ ديرەكتورى مىرزابەك جاپارقۇلوۆ.

ايتا كەتەيىك، 11 قاڭتار كۇنى مەملەكەت باسشىسى قاسىم-جومارت توقاەۆ قىرعىزستان پرەزيدەنتى سادىر جاپاروۆتى سايلاۋداعى جەڭىسىمەن قۇتتىقتاپ، تەلەفون ارقىلى سويلەسكەن. سول سويلەسۋدە توقاەۆتىڭ جاپاروۆتى قازاقستانعا رەسمي ساپارمەن كەلۋگە شاقىرعانىن اقوردا سايتى جازعان. سودان كەيىن-اق، باق-تا جاپاروۆتىڭ پرەزيدەنت رەتىندە العاشقى ساپارىن قازاقستاننان باستايتىنى ايتىلعان.

الايدا، كەيىن قىرعىز پرەزيدەنتىنىڭ ءباسپاسوز وكىلدەرى جاپاروۆتىڭ رەسەي پرەزيدەنتى ۆ.پۋتينمەن كەزدەسۋگە دايىندالىپ جاتقانىن مالىمدەدى. ال، 24 اقپان كۇنى جاپاروۆ ماسۋكەۋگە باردى. ءسويتىپ، ول العاشقى شەت ەلدىك ساپارىن پۋتينمەن كەزدەسۋدەن باستاعان بولاتىن.

Abai.kz

5 پىكىر