قازاقستان مەن رەسەيدىڭ بەيبىت اتومدى قولدانۋ بويىنشا ارىپتەستىگى العا جىلجىپ كەلەدى دەيدى رەسەي ەلشىسى الەكسەي بوروداۆكين.

"قازاقستان اتوم ەلەكترستانتسياسىن سالۋ تۋرالى شەشىم شىعارسا، رەسەي سالۋعا دايىن", — دەدى رەسەي ەلشىسى بوروداۆكين "رەسەي جانە قازاقستان: ستراتەگيالىق ارىپتەستىكتىڭ 30 جىلدىعى" اتتى حالىقارالىق عىلىمي-تاجىريبەلىك كونفەرەنتسيادا.

ول قازاقستان مەن رەسەي اراسىنداعى ءتۇرلى سالا بويىنشا ارىپتەستىك العا جىلجىپ كەلە جاتقانىن تىلگە تيەك ەتتى. ەلشىنىڭ كوزقاراسى بويىنشا ەۋرازيا كەڭىستىگىندەگى حالىقتار جىل وتكەن سايىن ءبىر-بىرىمەن ارىپتەستىكتى ارتتىرۋعا مۇددەلى بولۋدا.

"قازاقتار مەن ورىستار ۇلى وتان سوعىسىندا بىرگە سوعىسىپ، فاشيستىك گەرمانيانى تالقاندادى. ءدال قازاقستان جەرىنەن ادامزات عارىشقا قادام جاسادى. قازاقستاندا كسرو-نىڭ يادرولىق قالقانى جاساقتالىپ، ءۇشىنشى دۇنيەجۇزىلىك سوعىستىڭ قاۋپى سەيىلدى. ءبىز كسرو كەزىندەگى رەپرەسسيانى دا، 30-جىلدارى بولعان اشتىق پەن حالىقتاردى كۇشتەپ قونىستاندىرۋدى دا، يادرولىق سىناقتاردىڭ اسەرىن دە ەستە ساقتاپ كەلەمىز. بۇلدا ءبىزدىڭ ورتاق تاريحىمىز عوي", — دەدى بوروداۆكين.

ەلشى قازاقستان مەن رەسەي بۇگىندە تەڭ قۇقىقتى وداقتاس ءارى ارىپتەس ەكەنىن ايتا كەتكەن.

ء"بىزدىڭ ارىپتەستىگىمىز كوروناۆيرۋسپەن كۇرەس كەزىندە ايقىن كورىندى. رەسەي قازاقستانعا اۋقىمدى كومەك بەرۋدى جالعاستىرىپ كەلەدى. دارىگەرلەر مەن عالىمدار اراسىنداعى ارىپتەستىك ارتتى. قازاقستانعا رەسەيلىك "سپۋتنيك V" ۆاكتسيناسىن جەتكىزۋ قارقىنى ارتۋدا، ال قاراعاندىدا ۆاكتسينا شىعارۋ جولعا قويىلدى", — دەيدى رەسەي ەلشىسى.

ەستەرىڭىزدە بولسا ەل پرەزيدەنتى قاسىم-جومارت توقاەۆ 2019 جىلى قازاقستاندا اتوم ەلەكترستانتسياسىن سالۋ جوسپاردا جوق ەكەنىن، اەس سالۋ قاجەت بولسا رەفەرەندۋم ارقىلى حالىق شەشەتىنىن ايتقان ەدى.

بۇل رەسەي ەلشىسىنىڭ العاشقى اەسقا قاتىستى العاشقى پىكىرى ەمەس. 2021 جىلدىڭ 10 اقپانىندا: "قازاقستانعا الەمدەگى باسقا ەلدەر سياقتى تازا ەنەرگيا قاجەت. وسى سالاداعى ەڭ ءتيىمدى شەشىمدەردىڭ ءبىرى - اتوم ەلەكتر ستانتسيالارى. ەلەكتر ەنەرگياسىنىڭ تاپشىلىعىن ەسكەرە وتىرىپ، اەس سالۋ قازاقستان ءۇشىن وزەكتى تاقىرىپقا اينالۋدا. روساتوم زاۋىتتىڭ قاۋىپسىزدىگى مەن ەكولوگيالىق تازالىعىنا كەپىلدىك بەرە وتىرىپ، بۇل جوبانى قابىلداۋعا دايىن. كەيبىر اقپارات قۇرالدارىندا تاراتىلعان ورىس اتومى تۋرالى فوبيالاردىڭ شىندىققا جاناسپايتىنىن اتاپ وتكىم كەلەدى. رەسەيلىك اەس-تاردا قولدانىلاتىن ەڭ زاماناۋي تەحنولوگيالار قۇرىلىس كەزىندە دە، وسى وبەكتىلەردى پايدالانۋ كەزىندە دە قاۋىپتىڭ بولماۋىن قامتاماسىز ەتەدى. سونىمەن قاتار، اەس جوباسى ەلەكتر ەنەرگياسىنان باسقا قازاقستان ەكونوميكاسىنىڭ كوپتەگەن سالالارىنا سەرپىن بەرەدى، بىلىكتى جۇمىس ورىندارىن اشادى جانە يادرولىق فيزيكا سالاسىنداعى جوعارى ءبىلىم ساپاسىن ارتتىرادى",- دەگەن ەدى رەسەي ەلشىسى.

قازاقستان حالقى مەن ساراپشىلار اەس سالۋعا ءوز قارسىلىعىن ءبىلدىرىپ كەلەدى.

اسحات قاسەنعالي

Abai.kz