دۇيسەنبى, 21 ماۋسىم 2021
جەر داۋى 3472 26 پىكىر 21 ءساۋىر, 2021 ساعات 11:36

جەر جەكەگە ساتىلسا، ميتينگكە شىعامىز!

جەر كوميسسياسىنىڭ مۇشەسى مۇحتار تايجان الەۋمەتتىك جەلى پاراقشاسىندا بيلىك وكىلدەرى جەردى جەكە مەنشىككە بەرۋدى استىرتىن جۇزەگە اسىرىپ جاتۋى مۇمكىن دەپ جازدى.

بۇعان دەيىن ول اتالعان ماسەلە الداعى سەنبى كۇنى بولاتىن وتىرىستا داۋىسقا سالىناتىنىن ايتقان. الايدا، قوعام بەلسەندىسى مۇنداي جوبا ەش داۋىسقا سالىنباستان، قازىردىڭ وزىندە دايىندالىپ قويعان سەكىلدى دەيدى. ءسويتىپ ول «قازاقستاندىقتارعا اۋىلشارۋاشىلىعى جەرلەرىن جەكە مەنشىككە بەرۋ شارتتارى» دەپ اتالاتىن قۇجاتتىڭ قازاق جانە ورىس تىلىندەگى نۇسقاسىن سالدى.

- جەردى جەكە مەنشىككە بەرۋ تاسىلدەرىن بيلىك دايىنداپ جاتقان سياقتى. كەشە ماعان بەيرەسمي جولمەن وسىنداي مالىمەت كەلدى. بۇل جوبا راس بولسا، جەردى جەكە مەنشىككە بەرۋگە جول اشاتىن ناقتى تاسىلدەر قازىردىڭ وزىندە دايىندالىپ جاتقان سەكىلدى. كەشەگى الماسبەكتىڭ ءسۇيىنشى سۇراپ جاتقانى وسى بولۋى كەرەك. قىزىق، بۇل ماسەلەنى ءالى داۋىسقا سالماي ناقتى نورمالاردى دايىنداپ قويعان سياقتى. بۇل قالاي بولعانى؟

مەن بۇل قۇجاتتاردى كەشە مۇقيات زەرتتەدىم. مەنىڭ پىكىرىم بىلاي:

بۇل تىكەلەي ەمەس، بىراق قيتۇرقى جولدارمەن جەرگە جەكە مەنشىكتى ورناتۋ ءتاسىلى. ناقتى ايتقاندا، بۇل حالىقتى الداۋ ۇسىنىستار. بۇل ۇسىنىستار سەنبى كۇنى رەسمي داۋىسقا سالىناتىن بولسا مەن (جالعىز بولمايمىن دەپ ويلايمىن) قارسى شىعام -, دەپ جازدى تايجان مىرزا

 

سونداي-اق، ول كوميسسيانىڭ باسىم كوپشىلىگى جەر يەلەرى مەن شەنەۋنىكتەر ەكەنىن ايتقان بولاتىن. ەگەر سول كوميسسيادا جەردى جەكە مەنشىككە بەرۋ ۇسىنىسى قابىلداناتىن بولسا، جالپى ۇلتتىق ميتينگ جاريالايتىنىن مالىمدەدى.

ءيا، ءبىز داۋىس بەرگەن كەزدە جەڭىلۋىمىز مۇمكىن. مۇنداي جاعدايدا مەن جالپى ۇلتتىق زاڭدى ميتينگ جاريالايمىن. بۇگىنگى تاڭدا بۇعان زاڭ مۇمكىندىك بەرىپ وتىر. بۇنداي جاعدايدا ءار قالا، ءار اۋىل جەر ءۇشىن شىعۋ كەرەك.

قالاي بولسا دا جەردى جەكە مەنشىككە ساتۋعا جول بەرمەۋىمىز شارت. مۇندايعا جول بەرسەك، قازاقتىڭ بالاسى لاتيفۋنديستەردىڭ قۇلدىعىنا ماڭگىلىككە باتىپ كەتەدى. ۇرپاق ءبىزدىڭ مۇنىمىزدى كەشىرمەيدى,- دەپ جازدى ول.

ايتا كەتەيىك، جەر كوميسسياسىنىڭ الداعى وتىرىسى سەنبى، 24 ءساۋىر كۇنى وتەدى.

نۇربيكە بەكسۇلتانقىزى

Abai.kz

26 پىكىر