2021 جىلدىڭ 1 اقپانىنان باستاپ قازاقستاندا جاپپاي ۆاكتسيناتسيا باستالدى. قازاقستاندىقتار رەسەيلىك "سپۋتنيك V" ۆاكتسيناسىن الۋدا. ۆاكتسيناتسيا باستالعان ساتتە قازاقستاندىقتاردىڭ قانداي ۆاكتسينانى الاتىندىعىن وزدەرى تاڭداۋىنا مۇمكىندىك بەرىلەتىنى ايتىلعان ەدى. الايدا وسى ۋاقىتقا دەيىن ۆاكتسينا العانداردىڭ بارلىعى دەرلىك رەسەيلىك "سپۋتنيك" ۆاكتسيناسىن قابىلدادى. سەبەبى تاڭداۋ جوق، دەمەك امال جوق.

قازاقستان ىندەت باستالعان ساتتە ءوز ۆاكتسيناسىن جاساۋدى قولعا الدى. سەبەبى ۆاكتسيناسىز بۇل ىندەتتى جەڭۋ مۇمكىن ەمەستىگى بەلگىلى بولدى. 2020 جىلدىڭ مامىر ايىندا ۆاكتسينا جاساۋ جۇمىستارى باستالىپ كەتتى. ۆاكتسيناعا باستاپقى كەزەڭدە شارتتى تۇردە "QazCovid-In" اتاۋى بەرىلدى. ال ونى كلينيكالىق سىناقتان وتكىزۋ كەزەڭى كۇز مەزگىلىندە ىسكە استى. ۆاكتسينانىڭ ەففەكتيۆتىلىگى سىناق بارىسىندا دالەلدەندى. ۆاكتسينانى ءۇش كەزەڭدى سىناقتان وتكىزۋ ەرىكتىلەر اراسىندا جۇرگىزىلدى. العاشقى كلينيكالىق سىناقتان وتكىزۋگە 18-65 جاس ارالىعىنداعى 44 ەرىكتى، ەكىنشى كەزەڭىندە 200 ەرىكتى، ال ءۇشىنشى كەزەڭىندە 3 مىڭ ەرىكتى قاتىستى. ءار كەزەڭ بويىنشا سىناقتار ەكى كەزەڭنەن، ياعني اراعا 21 كۇن سالىپ جۇرگىزىلدى. ءار ەرىكتىگە 200 مىڭ تەڭگە كولەمىندە قارجى تولەندى. سىناق بارىسىندا قازاقستاندىق ۆاكتسينانىڭ ۆيرۋستان ساقتايتىن يممۋنيتەتتى جاقسى قالىپتاستىراتىنى دالەلدەندى.

قاڭتار ايىندا ەل پرەزيدەنتى قاسىم-جومارت توقاەۆ قازاقستاندىق ۆاكتسينانى قابىلداۋدى جوسپارلاپ وتىرعانىن ايتتى. الايدا 6-ءساۋىر كۇنى پرەزيدەنت رەسەيلىك "سپۋتنيك V" ۆاكتسيناسىن الدى. ول ۆاكتسينا قاراعاندىدا جاسالعانىمەن، رەسەيلىك ەدى. بۇل قازاقستانداعى ۆاكتسيناتسيانىڭ تىم باياۋ جۇرۋىمەن، ال وتاندىق ۆاكتسينانىڭ ءالى تولىق دايىن بولماۋىمەن بايلانىستى بولدى. ءدال سول كۇنى، ءساۋىردىڭ 6-سىندا پرەزيدەنت ۇكىمەت وتىرىسىن وتكىزىپ، دەنساۋلىق ساقتاۋ مينيسترلىگىنىڭ قىزمەتىن قاتاڭ سىنعا الدى. پرەزيدەنت ۆاكتسيناتسيا بويىنشا ارتتا كەلە جاتقانىمىزدى ايتىپ، تسويعا كادرلىق اۋىس-تۇيىستەرگە دەيىن قادام جاسالۋى مۇمكىندىگىن ەسكەرتتى.

«الەكسەي ۆلاديميروۆيچ، مەن بۇرىن ايتقانىمداي، قازىرگى ۋاقىتتا ۇكىمەتتەگى باستى مىندەت دەنساۋلىق ساقتاۋ ءمينيسترى، ءسىزدىڭ ەرەكشە قۇزىرەتىڭىز بار. ءسىز جۇمىسىڭىزدى جاقسى باستادىڭىز دا، كەيىننەن ەكپىنىڭىز ازايدى. ءساۋىر ايىندا ءسىز جاعدايدى قالىپقا كەلتىرۋگە ءتيىسسىز. ولاي بولماعان جاعدايدا ءسىزدى قاپالاندىراتىن كادرلىق تاعايىنداۋلار بولادى. بۇل تەك قانا دەنساۋلىق ساقتاۋ مينيسترلىگىنە عانا ەمەس، جالپى ۇكىمەتكە قاتىستى», - دەگەن بولاتىن پرەزيدەنت توقاەۆ.

جيىننان كەيىن ەلىمىزدە جاپپاي ۆاكتسينا الۋ قارقىنى ارتتى. ساۋدا ورتالىقتارى مەن نارىقتاردا، اۋرۋحانالاردا ەكپە ەگۋ جۇمىستارى جۇرگىزىلە باستادى.

قازاقستان ءوز ۆاكتسيناسىن حالىققا ەگۋدى 26-ساۋىردە باستايتىن بولدى. ەندى ونىڭ اتاۋى "QazCovid-In" ەمەس، "QazVac". وتاندىق ۆاكتسينانىڭ جاسالۋ ءادىسى دە "قىزىق". ۆاكتسينا قازاقستاندا جاسالىپ، تۇركيادا امپۋلاعا قۇيىلاتىن بولادى. ۆاكتسينانىڭ اۋقىمىن ارتتىرۋ جاعى قاراستىرىلۋدا. 22-ءساۋىر كۇنى قازاقستاندىق ۆاكتسينا جامبىل وبلىسىنداعى زاۋىتتان وزگە ايماقتارعا جول تارتتى. بۇل العاشقى پارتيا. الداعى تاڭدا ونىڭ كولەمى ارتاتىن بولادى. مامىر ايىنان باستاپ ايىنا 500-600 مىڭ دوزا وتاندىق ۆاكتسينا شىعارۋ كوزدەلىپ وتىر. پرەزيدەنت بۇل قادامدى وڭ باعالاپ، ارنايى "تۆيتتەر" پاراقشاسىنا جازبا قالدىردى.

"QazVac ۆاكتسيناسى ەلىمىزدىڭ وڭىرلەرىنە جەتكىزىلە باستادى. بارلىق ازاماتتارعا قولجەتىمدى بولۋ ءۇشىن وتاندىق ەكپە ءوندىرىسىن ۇلعايتامىز. قازاقستان الەم بويىنشا ءوز ۆاكتسيناسىن شىعارعان بىرنەشە ەلدىڭ قاتارىندا. ەكپەنى ازىرلەگەن عالىمدار مەن مامانداردىڭ بارىنە العىس ايتامىن!", - دەدى پرەزيدەنت.

قازاقستان وتاندىق ۆاكتسيناسى الەمدەگى ون ەلدىڭ قاتارىنا كىرەدى. ەلىمىزدە QazVac ۆاكتسيناسىنان بولەك، تاعى ءتورت ءتۇرلى ۆاكتسينا جاسالۋدا. ال جالپى ۆاكتسيناتسيادان بيىل 10 ملن ادامدى وتكىزۋ كوزدەلگەن.

Abai.kz