جەركومنىڭ حالىقتى الاڭداتقان جەر تاعدىرى ماسەلەسىنە تۇكپىلىكتى نۇكتە قويا الماي، تاعى دا 5 جىل جەرگە قاتىستى موراتوري جاريالانۋىن ءبىزدىڭ جەڭىسىمىز دەپ ساناعان مۇحتار تايجانمەن كەلىسپەيمىن. سەبەبى، سەناتتان قازىر ورمان شارۋاشىلىعى جەرلەرىنە دە قاتىستى زاڭ جوباسى تالقىعا ءتۇسىپ جاتىر. ءتىپتى ورمان شارۋاشالىعىنا ارنالعان ساناتتاعى جەرلەردى دە اۋىل شارۋاشىلىعى جەرلەرىنىڭ قاتارىنا كىرگىزۋگە بولادى.

جەركومدا اۋىلشارۋاشىلىعى جەرلەرىن قازاقستان ازاماتتارىنا ساتۋ نەمەسە جەكە مەنشىككە بەرۋ جايى تالقىلاندى. باسقا دا جەر ساناتتارى كەڭ ماسشتابتا تالقىلانبادى. نەگىزى جەركومنىڭ باستى ماقساتى مەن جۇمىسى - قازاقستاننىڭ قاي ساناتتاعى جەرى بولسا دا شەتەلدىكتەر مەن قازاقستاننىڭ ازاماتتارىنا ساتىلمايدى جانە جەكە مەنشىككە بەرىلمەيدى دەپ شەشىم جاساپ، پارلامەنتكە جىبەرۋ بولاتىن ەدى. ونى جاسامادى. جاساي المايدى. لاتيفۋنديستەر وعان قازىر مۇمكىندىك بەرمەدى. لاتيفۋنديستەر دە اقىماق ەمەس، ولار دا ىشكى جانە سىرتقى ساياساتتى مۇقيات قاراپ وتىرعان، قالتالى وليگارحيالىق توپتار. حالىقتىڭ بۇرق ەتىپ كوتەرىلۋىنەن ولار دا قورقىپتى. سوندىقتان وگىزدى ءولتىرىپ الماۋدىڭ جولىن تاپتى.

قازىر ءبىزدىڭ ەلدە ء"بىر عانا ادامنىڭ ىقپالى" دەگەن ءسوز كونەرگەن سياقتى. اۋىلشارۋاشىلىعى ءمينيسترىن "جەردى ساتۋعا بولادى" دەپ سويلەتىپ وتىرعانىنان لاتيفۋنديانىڭ قانشالىقتى ىقپالدى ەكەنىن اڭعارۋعا بولادى.
قازاقستانداعى لاتيفۋنديا وتە جاقسى اقىلداسىپتى.

ءبىر جاعىنان جەرگە تاعى دا 5 جىل موراتوري قويعانى دا جاقسى بولدى. قوعامدا، اسىرەسە كوزى اشىق، جەردىڭ تاعدىرى ءۇشىن الاڭداعان ازاماتتاردىڭ اقپاراتتىق مايدانداعى دايىندىعىنا دا مۇمكىندىك بەرىلدى. الداعى 5 جىلدا تالاي دۇنيە ءپىسىپ جەتىلەدى.

جەر ساتىلمايدى نەمەسە قازاقستان ازاماتتارىنا دا جەكە مەنشىككە بەرىلمەيدى دەپ قۋانۋعا قازىر بولمايدى. موراتوري تاعى دا 5 جىلعا قويىلدى دەپ بوسبەلبەۋ بولۋعا جول جوق. قازىر سەناتتا ورمان شارۋاشىلىعى جەرلەرىنە قاتىستى ماقۇلدانباعان قۇجاتتار قارالىپ جاتىر. بۇل زاڭدى سەناتورلار قاراپ جاتىر. وندا 48 باپتىڭ 2-تارماعىندا بىلاي دەلىنگەن:
«ساۋدا-ساتتىقتىڭ (كونكۋرستاردىڭ، اۋكتسيونداردىڭ) جەڭىمپازدارىنا – شەتەلدىكتەر مەن ازاماتتىعى جوق ادامدارعا اۋىل شارۋاشىلىعى ءوندىرىسىن، ورمان ءوسىرۋدى، قوسالقى اۋىل شارۋاشىلىعىن جۇرگىزۋ ءۇشىن جەر ۋچاسكەلەرى 25 جىلعا دەيiنگى مەرزىممەن جالداۋ شارتتارىمەن ۋاقىتشا جەر پايدالانۋعا بەرىلەدى». وسى جوبانىڭ دا ءوتىپ كەتپەۋىن قوعام نازارىنا ازاماتتار سالىپ وتىرۋى كەرەك. بۇل جوبا ءوتىپ كەتسە، ورمان شارۋاشىلىعى ساناتىنداعى جەرلەر ساتىلىمعا شىعادى. قاپەردەن شىعارماڭىزدار!
كوردىڭىز بە!؟

وكىنىشكە وراي، ءبىزدىڭ كەيبىر دەپۋتاتتارىمىز دا وسى زاڭ جوباسىنىڭ قانداي نەگىزدە، قاي ساناتتاعى جەرلەرگە جوبا دايىندالىپ، سەناتتا قارالىپ جاتقانىنان حابارى جوق ەكەن. «The Qazaq Times» پورتالىنىڭ جۋرناليستتەرى ايدوس سارىمنان سۇقبات العانىن تەگىس وقىپ شىعىپ، ءىشىم جىلىماي كەتتى.

ءسوزدىڭ توق ەتەرى، پرينتسيپ ەمەس، زاڭ كەرەك. "جەر شەتەلدىكتەرگە دە، قازاقستان ازاماتتارىنا دا ساتىلمايدى جانە جەكە مەنشىككە بەرىلمەيدى". بۇل زاڭ قابىلدانباي ەشتەڭە شەشىمىن تاپپايدى. ەگەر جەر ءوزىمىزدىڭ ازاماتتارىمىزعا ساتىلسا، وندا بۇل مەملەكەتتىڭ تاۋەلسىزدىگى مەن ۇلتتىق قاۋىپسىزدىككە تىكەلەي سوققى بولادى. وسىنى ۇمىتپاڭىزدار!

مۇحتار تايجاننىڭ ء"بىز جەڭىسكە جەتتىك!" دەگەنىمەن كەلىسپەيمىن. سەبەبى، نەگىزگى ماسەلەلەر شەشىمىن تاپقان جوق، بار بولعانى جەرگە تاعى دا 5 جىلعا موراتوري جاريالاندى. ونىڭ وزىندە بۇل اۋىل شارۋاشىلىعى ساناتىنداعى جەرلەر بولىپ تۇر. كۇرەس ءالى الدا. قاسيەتتى جەر! جەر ءبىزدىڭ ەڭ باستى قۇندىلىعىمىز! بۇل ءسىزدىڭ ۇرپاعىڭىزدىڭ دا تاعدىرى!

بەكبولات قارجان

Abai.kz