ەلىمىزدە ملردتاعان دوللار تۇراتىن تۋريستىك كەشەننىڭ قۇرىلىسى باستالماق. وعان 1 ترلن تەڭگە قارجى جۇمسالادى. نىسان نۇر-سۇلتان قالاسىنىڭ ورتالىعىندا سالىنباق. تۋريستىك كەشەننىڭ كولەمى 2,6 ملن شارشى مەتر اۋماقتى الىپ جاتپاق. قۇرىلىس 333 گەكتار اۋماقتا جۇرگىزىلىپ، كەشەننىڭ العاشقى بولىگىن قولدانىسقا 2022 جىلى بەرۋ جوسپارلانىپ وتىر ەكەن. 

تۋريستىك كەشەن "بارىس ارەنانىڭ" باتىس بەتىندە ورنالاسقان. جوبانىڭ ينۆەستورلارى ءباا-ءنىڭ Ellington Properties Development LLC كومپانياسى، ال باس مەردىگەر Renaissance Construction كومپانياسى.

تۋريستىك كەشەننىڭ ىشىندە اۋماعى 15 مىڭ شارشى مەتر بولاتىن اكۆاپارك، ويىن الاڭدارى، وفيستەر مەن قوناق ۇيلەر ورنالاسپاق. كەشەندى سالۋعا ۋاقىتشا نەگىزدە 21,3 مىڭ جۇمىس ورنى، ال تۇراقتى نەگىزدە 2 مىڭ جۇمىس ورنى اشىلادى.

1 ترلن تەڭگە دەگەنىمىز قازىرگى دوللار باعامىمەن ەسەپتەسەك 2.3 ملرد دوللار دەگەن ءسوز. الايدا تۋريستىك كەشەن وسىنشا قارجىنى قانشا ۋاقىتتا اقتايدى؟ بۇل بويىنشا ناقتى جوسپارلار بار ما؟ مىسالى ەكسپو كەشەنىنىڭ قۇرىلىسىنا 2,1 ملرد دوللار قارجى جۇمسالدى. ول كەزدەگى دوللار باعامىنىڭ ولشەمىمەن بۇل 565 ملرد تەڭگەنى قۇراعان بولاتىن. الايدا جوبا ءوزىن اقتامادى. جوبا اياقتالعاننان كەيىن ارنايى بريفينگ بارىسىندا "شەتەلدەن 2 ملن تۋريست كەلدى" دەگەن ساندار ايتىلدى. دەگەنمەن بۇل كورسەتكىش شىندىققا ساي كەلمەيدى. نۇر-سۇلتان قالاسى حالقىنىڭ ءوزى 1 ملن تۇرعىن، ال قوناق ۇيلەر ءبىر مەزەتتە ونداي كولەمدەگى ءتۋريستى قابىلداي المايدى. ونى تاۋەلسىز ساراپشىلار اۋەجايداعى جولاۋشى تاسىمالداۋ سانىنان دا بايقاعان. تۋريستەردىڭ كەلگەنى راس، بىراق ميلليونداپ ەمەس.

ەكسپو ملردتاعان دوللاردى اقتاماسا دا، ارتىنشا LRT قۇرىلىسى باستالدى. قۇرىلىسقا 1.5 ملرد دوللار ءبولىندى، ونىڭ باسىم بولىگى قىتايلىق بانكتەردەن الىنعان قارىز بولاتىن. دەي-تۇرا LRT قۇرىلىسى اياقتالماي، قارجى جىمقىرۋ كەسىرىنەن جوبا توقتاپ قالدى. قازىر سوت پروتسەسستەرى جۇرۋدە.

قازاقستان وسى قاتەلىكتەردەن ساباق الماعانىنىڭ ءبىر كورىنىسى اتالمىش تۋريستىك كەشەنگە قىرۋار قارجىنى بولۋدەن-اق كورۋگە بولادى. ينۆەستورلار قالايشا اقتالمايتىن جوباعا وسىنشا قارجىنى جۇمساۋدا؟ اقىلعا سىيمايدى.

الەم ەلدەرىندە داعدارىس. كوروناۆيرۋس تۋريستىك سالاعا سوققى جاسادى. ساياحاتشىلار ۆيرۋستىڭ سالدارىنان باسقا ەلگە بارىپ، ساياحات جاساۋ مۇمكىندىگىنەن ايىرىلدى. پاندەميانىڭ قاشان اياقتالارى بەلگىسىز. ۆيرۋستىڭ جاڭا شتاممدارى الەم ەلدەرىن ابىگەرگە سالىپ جاتىر. ەكونوميكا قۇلدىراپ، الەم ەلدەرىندە ءىجو كورسەتكىشى ءتۇسىپ كەتتى. بۇل جۇزدەگەن ميلليون ادامنىڭ جۇمىسسىز قالۋىنا اسەر ەتۋدە. قازاقستاندا دا بۇل ءۇردىس بايقالۋدا. بيۋدجەتتىڭ ءار تيىنى ماڭىزعا يە كەزەڭدە تۇرمىز. قارجىنى ناقتى ەكونوميكاعا ءوسىم بەرەتىن سالاعا سالۋ الدەقايدا ءتيىمدى بولار ەدى. ءتىپتى ينۆەستورلار ءۇشىن دە.

كا مىرزا

Abai.kz