رەسەي پرەزيدەنتى ۆلاديمير پۋتين مەن تاجىكستان پرەزيدەنتى ەمومالي راحمون 8 مامىردا ماسكەۋدە كەزدەسۋ كەزىندە قىرعىز-تاجىك شەكاراسىنداعى سوڭعى جانجالدى تالقىلايدى.

بۇل تۋرالى رەسەيدىڭ مەملەكەتتىك "ريا نوۆوستي" اگەنتتىگى كرمەلدىڭ ءباسپاسوز حاتشىسى دميتري پەسكوۆقا سىلتەمە جاساپ حابارلادى.

اقپاراتقا سايكەس، تاجىكستان پرەزيدەنتى قىزىل الاڭداعى جەڭىس پارادىنا قاتىسادى.

"تاسس" جاڭالىقتار اگەنتتىگى پەسكوۆقا سىلتەمە جاساپ جازعانداي، راحمون مەن پۋتين سويلەسۋلەرى قىرعىز-تاجىك شەكاراسىندا جانجال شىققانعا دەيىن جوسپارلانعان. بىراق پەسكوۆ قىرعىز پرەزيدەنتى سادىر جاپاروۆ جەڭىس پارادىنا قاتىسپايتىنىن جەتكىزدى.

28-30 ءساۋىر كۇندەرى قىرعىز-تاجىك شەكاراسىندا قارۋلى جانجالدا قازا بولعان قىرعىزستاندىقتاردىڭ سانى رەسمي 36-عا جەتتى، 189 ادام جاراقات الدى. جۇزدەي ادام اۋرۋحانادا جاتىر.

تاجىك ۇكىمەتى قۇرباندار مەن زارداپ شەككەندەر سانىن رەسمي جاريالامادى. بىراق "وزودي" راديوسىنىڭ مالىمەتى بويىنشا، 20 ادام قايتىس بولىپ، 90 كىسى جاراقات العان.

قىرعىزستان مەن تاجىكستاننىڭ رەسمي وكىلدەرى 1 مامىرعا قاراعان ءتۇنى وق اتۋدى توقتاتۋ، شەكارا ماڭىنان اسكەرىن الىپ كەتۋ تۋرالى كەلىسىمگە قول قويعان.

Abai.kz