دۇيسەنبى, 21 ماۋسىم 2021
بيلىك 1806 1 پىكىر 12 مامىر, 2021 ساعات 13:34

زىمىران-تاسىعىشتاعى اپاتتان كەلتىرىلگەن زالالدى وتەۋ تەتىگىن ناقتى پىسىقتاۋ قاجەت

ءماجىلىس توراعاسى نۇرلان نىعماتۋلين زىمىران تاسىعىشتاردىڭ اپاتى سالدارىنان بولعان ەكولوگيالىق زالالدى وتەۋدىڭ ناقتى تەتىگىن ازىرلەۋ قاجەت دەپ سانايدى.

ءماجىلىستىڭ جالپى وتىرىسىندا قازاقستان مەن رەسەي اراسىنداعى «بايقوڭىر» عارىش ايلاعىنان سولتۇستىك باعىتتا پوليارلى وربيتاعا عارىش اپپاراتتارىن ۇشىرۋ ءۇشىن "سويۋز-2" ءتيپتى زىمىران-تاسىعىشتاردى ۇشىرۋدى جۇزەگە اسىرۋ جونىندەگى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن تالقىلاۋ بارىسىندا دەپۋتاتتار ەكولوگيانى قورعاۋ جانە «سويۋز-2» ءتيپتى زىمىران-تاسىعىشتاردىڭ شتاتتان تىس قۇلاۋى نەمەسە اۆارياسى سالدارىنان ماتەريالدىق زالالدى وتەۋ ماسەلەسىن كوتەردى

زاڭ جوباسىن تالقىلاۋ بارىسىندا ءماجىلىس  توراعاسى زيان كەلتىرىلگەنى قانداي قۇجاتتار ارقىلى انىقتالاتىنىن سۇراپ، وعان سىرتقى ىستەر ۆيتسە-ءمينيسترى مارات سىزدىقوۆ تۇسىندىرگەندەي، جەكە كەلىسىم بار، وعان سايكەس رەسەي تاراپى زالالدى تولەۋگە كەپىلدىك الادى، بىراق تاجىريبە كورسەتكەندەي، بۇل ءراسىم ۇزاق جىلدارعا سوزىلادى.

وسىعان بايلانىستى نۇرلان نىعماتۋلين ەكولوگيالىق زالالدى وتەۋ تەتىگى ءتيىستى قۇجاتتاردا بەكىتىلۋى ءتيىس دەپ ەسەپتەيدى.

- ءبىز سەرىكتەستەرىمىزبەن ماتەريالدىق زالالدى وتەۋ تۋرالى ناقتى كەلىسۋىمىز كەرەك. بىزدە كەپىلدىك بار. بىراق بۇل كەپىلدىكتەر جۇمىس ىستەۋى ءۇشىن نە قاجەت؟ بۇل بىرلەسكەن قۇجات ءبىزدىڭ سەرىكتەستەرىمىزبەن پىسىقتالۋى ءتيىس، - دەدى نۇرلان نىعماتۋلين زاڭ جوباسىن ازىرلەۋشىلەرگە.

ءوز كەزەگىندە زاڭ جوباسىن ازىرلەۋشىلەر، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ماسەلە جاقىن ارادا پىسىقتالىپ، ناتيجەلەرى دەپۋتاتتارعا ۇسىنىلاتىن بولادى دەپ سەندىردى.

Abai.kz

1 پىكىر