قازاقستاننىڭ ەكس-پرەزيدەنتى ءارى قاۋىپسىزدىك كەڭەسىنىڭ ءومىر باقي توراعاسى نۇرسۇلتان نازارباەۆ 19 مامىردا «گيبريدتى قاۋىپ»  جانە  «اسسيمەتريالى سوعىس» تۋرالى ايتىپ، ەلدىڭ قارۋلى كۇشتەرى دايىن بولۋى كەرەك دەدى.

ەل پرەزيدەنتى قاسىم-جومارت توقاەۆ پەن پرەمەر-مينيستر اسقار مامين قاتىسقان قاۋىپسىزدىك كەڭەسىنىڭ وتىرىسىندا 2030 جىلعا دەيىنگى ارميانىڭ دامۋى مەن شەكارالاردىڭ قاۋىپسىزدىگىن قامتاماسىز ەتۋ تۇجىرىمداماسى قارالعان.

نازارباەۆ قازاقستان اسكەري قۇرىلىستىڭ جاڭا ءتاسىلىن ازىرلەۋ كەرەكتىگىن ايتتى.

- بىرىنشىدەن، بىزگە تەك ءداستۇرلى ەمەس، اسسيمەتريالىق سوعىسقا دا دايىن بولۋى كەرەك. ەكىنشىدەن، ءبىرىنشى پلانعا گيبريدتى قاۋىپ ءتونىپ تۇر. ۇشىنشىدەن، اسكەري تايتالاس تەحنولوگيالىق قامتاماسىز ەتۋ دەڭگەيىمەن انىقتالادى. سوڭعى جىلدارداعى سيرياداعى، تاۋلى قاراباحتاعى سوعىس سپۋتنيكتىك باقىلاۋدىڭ، كوممۋنيكاتسيا مەن ناۆيگاتسيانىڭ ماڭىزدى ەكەنىن كورسەتتى. بولاشاقتىڭ ارمياسى ۇشاقسىز ۇشقىش، جوعارى دالدىلىك قارۋ سەكىلدى جاڭا تەحنولوگيانى ەنگىزۋمەن انىقتالادى، - دەدى ول.

سىرتقى ساياساتتا كوپۆەكتورلىق كۋرستى تاڭداعان قازاقستان كورشى ەلدەرمەن دوستىق قارىم-قاتىناسىنىڭ بەرىك ەكەنىن، شەكارا بويىنشا داۋ جوق ەكەنىن ايتىپ كەلەدى. ەل سونىمەن بىرگە وزگە مەملەكەتتەردىڭ جانجالىندا بىتىمگەرلىك ءرولىن اتقارۋعا تىرىسىپ كەلەدى.

قازاقستان 2020 جىلدان باستاپ ۇلتتىق قاۋىپسىزدىك كوميتەتىنە كىرەتىن شەكارا قىزمەتىن قايتا قۇرىلىمداپ جاتىر.

نازارباەۆ 19 مامىردا وتكەن قاۋىپسىزدىك كەڭەسىنىڭ وتىرىسى كەزىندە قازاقستانعا شەكارالاردى بارلىق قاۋىپتىڭ تۇرىنەن قورعاۋدى قامتاماسىز ەتۋىمىز كەرەكتىگىن ايتتى. ول سونىمەن بىرگە شەكارا ماڭىنداعى اۋىلداردى دامىتۋعا شاقىردى.

- شەكاراعا جاقىن ەلدى مەكەندەردى جاپپاي جابۋعا جول بەرمەۋىمىز كەرەك. ول ايماقتاردا ينفراقۇرىلىمداردى دامىتۋىمىز كەرەك. بۇل ايماقتار ەكونوميكالىق جاعىنان مىقتى بولۋى كەرەك, - دەدى نازارباەۆ.

Abai.kz