كۇنى كەشە مينيستر تسوي ۇلكەن سۇحبات بەردى. وندا دەنساۋلىق سالاسىنىڭ باسشىسى ءوزىنىڭ كلاندا جوق ەكەنىن، بار ماقساتى پاندەميانى تەزىرەك جەڭىپ شىعۋ ەكەنىن جەتكىزدى. جالپى تسويدىڭ ءومىر جولى قىزىق. 

2020 جىلى تسوي دەنساۋلىق ساقتاۋ مينيسترلىگىنە ۆيتسە-ءمينيسترى بولىپ تاعايىندالعان بولاتىن. ارتىنشا اراعا ءۇش كۇن سالىپ، ەلجان ءبىرتانوۆتىڭ ورنىنا مينيستر بولىپ كەلدى. قازاقستاندا مۇنداي عارىشتىق جىلدامدىقپەن كارەراسىن جاساعان ازاماتتار از شىعار. 2020 جىلدىڭ 25-ماۋسىمىنان باستاپ الەكسوي تسوي ەلىمىزدە دەنساۋلىق ساقتاۋ ءمينيسترى قىزمەتىن اتقارىپ كەلەدى.

تسويدىڭ قىزمەتىنە قاتىستى ءتۇرلى باعا بار. ءبىرى ونىڭ جۇمىسىن ەڭ قيىن كەزەڭدە ىسكە اسىپ جاتقاندىقتان تۇسىنىستىكپەن قاراۋعا شاقىرسا، ەكىنشى تاراپ قاتاڭ سىناپ جاتىر. تسويدىڭ جۇمىسىن سىنعا الىپ، سويىپ تاستاعاندار ىشىندە ەل باسشىسى قاسىم-جومارت توقاەۆ تا بار.

اتاپ ايتساق 1 ءساۋىر كۇنى پرەزيدەنت ۇكىمەت وتىرىسىندا تسويدىڭ قىزمەتىن قاتاڭ سىنادى. "الەكسەي ۆلاديميروۆيچ، مەن بۇرىن ايتقانىمداي، قازىرگى ۋاقىتتا ۇكىمەتتەگى باستى مىندەت دەنساۋلىق ساقتاۋ ءمينيسترى، ءسىزدىڭ ەرەكشە قۇزىرەتىڭىز بار. ءسىز جۇمىسىڭىزدى جاقسى باستادىڭىز دا، كەيىننەن ەكپىنىڭىز ازايدى. ءساۋىر ايىندا ءسىز جاعدايدى قالىپقا كەلتىرۋگە ءتيىسسىز. ولاي بولماعان جاعدايدا ءسىزدى قاپالاندىراتىن كادرلىق تاعايىنداۋلار بولادى. بۇل تەك قانا دەنساۋلىق ساقتاۋ مينيسترلىگىنە عانا ەمەس، جالپى ۇكىمەتكە قاتىستى", - دەگەن بولاتىن پرەزيدەنت توقاەۆ. قاتاڭ سىننىڭ استىندا قالعان سەبەبى ەلىمىزدەگى جاپپاي ۆاكتسيناتسيا جۇمىسىن دۇرىس ۇيىمداستىرا الماۋىنان ەدى.

تىلشىلەر اراسىندا "تسوي نەگە اۋرۋ وشاقتارىنا بارىپ، ناۋقاستارمەن كەزدەسپەيدى" دەگەن سۇراقتار دا ءجيى قويىلادى. سەبەبى ەلجان ءبىرتانوۆ ۆيرۋس وشاقتارىنا بىرنەشە مارتە بارىپ، ناۋقاستارمەن كەزدەسكەن بولاتىن. ءتىپتى ءوزى دە ۆيرۋس جۇقتىرىپ، 2020 جىلدىڭ 14 ماۋسىمىنان باستاپ ەم العان ەدى. ول كەزدە تسوي مينيستر بىرتانوۆقا ارناپ حات جازدى. "قۇرمەتتى ەلجان امانتايۇلى! ەل ءۇشىن ەڭ قيىن وسى ساتتە ءسىز كوروناۆيرۋسپەن كۇرەستىڭ الدىڭعى شەبىندە تۇردىڭىز. ءسىزدىڭ وڭىرلەردەگى، ىندەت وشاقتارىنداعى ەل-جۇرتپەن جانە ماماندارمەن جۇرگىزگەن جۇمىسىڭىز دەنساۋلىق ساقتاۋ جۇيەسىن ايتارلىقتاي ىلگەرىلەتتى. وكىنىشكە وراي، ىندەت ەشكىمدى ايامايدى. سىزگە شىن كوڭىلمەن تەزىرەك ساۋىعىپ، قاتارىمىزعا قوسىلۋىڭىزدى تىلەيمىن»، - دەدى ول.

الايدا ءبىرتانوۆ ءىستى بولىپ، ۇيقاماقتا وتىرعان ساتتە، جۋرناليستەر تاراپىنان بۇرىنعى ءمينيستردى قازىرگى مينيستر جۇمىسقا الا ما دەگەن ساۋال قويىلعان ەدى. سوندا تسوي: ء"بىزدىڭ بىلۋىمىزشە ول قازىر كوممەرتسيالىق قۇرىلىمدا جۇمىس ىستەپ ءجۇر" دەدى. ياعني جۇمىسقا ناقتى الاتىنىن ياكي المايتىنىن اشىپ ايتپادى.

تسوي كۇزگە دەيىن 10 ملن ادامعا ۆاكتسينا ەگۋدى جوسپارلاپ وتىر. "پلانى" سونداي. ازىرگە حالىقتىڭ باسىم بولىگىن ەكپەمەن قامتاماسىز ەتپەي، ماسكاسىز رەجيمدى ەنگىزۋگە دە قارسى كورىنەدى. قىركۇيەك ايىندا ۆاكتسيناتسيالاۋدان 10 ملن ادام ءوتىپ، كارانتيندىك شەكتەۋلەردى ازايتۋدى ماقسات ەتۋدە. الايدا قازىر ەلىمىزدە ۆاكتسينانىڭ ەكى دوزاسىن دا العان جاندار سانى 997 مىڭ ادام ەكەنىن ەسكەرسەك، ءۇش ايدا مينيستر بۇل جوسپاردى قالاي ىسكە اسىراتىنى بەلگىسىز. كلاندا جوق تسويدىڭ، "پلانى" ىسكە اسا ما؟

Abai.kz