1965 جىلى كسرو مادەنيەت مينيسترلىگىنىڭ شاقىرۋى بويىنشا فرانتسيادان «Coco Chanel» مودەلدەرى ماسكەۋگە كەلدى. ماسكەۋلىكتەردىڭ اۋزى اشىلىپ، كوزدەرى باقىرايىپ قالادى...

مودەلدەر ەلىنە قايتار الدىندا قىزىل الاڭدا كەڭەس اسكەري فورماسىنداعى اداممەن سۋرەتكە ءتۇسۋدى قالاپتى، بىراق بۇل مۇمكىن ەمەس دەگەن جاۋاپتى ەستيدى. سوسىن مودەلدەر: «ولاي بولسا قانداي ءبىر قۇقىق قورعاۋ ورگاندارىنىڭ فورماسىنداعى ادام بولسا دا بولادى»، - دەپ مادەنيەت مينيسترلىگىنە ءوتىنىپ تۇرىپ السا كەرەك.

الايدا، ءسوتسياليزمدى ورناتۋشىلار ءۇشىن بۋرجۋازيالىق قوعامنىڭ ادامىمەن، ونىڭ ىشىندە مودەلمەن بىرگە سۋرەتكە ءتۇسۋ ماسقارا دەپ سانالاتىندىقتان، سۋرەتكە تۇسۋگە ەشكىمنىڭ دە باتىلى بارماپتى. سەبەبى ولارمەن بىرگە سۋرەتكە تۇسسە «پوزور» بولاتىن ەدى، سوندىقتان ولارمەن بىرگە سۋرەتكە ءتۇسۋ مۇمكىن ەمەس جاعداي بولاتىن.

الايدا مينيسترلىكتىڭ قىسىمىمەن جاڭادان جول پوليتسياسىنا قىزمەتكە الىنعان يۆانوۆقا جوعارىدان اسكەري بۇيرىق بەرىلىپ، سۋرەتكە تۇسىرۋگە شەشىم قابىلدانىپتى. ول: «ماعان ەكى مودەلمەن بىرگە فوتوعا تۇسكەننەن گورى گراناتا ۇستاتىپ، نەمىس تانكىسىنە قارسى جىبەرىڭىزدەر»،- دەپ جوعارىعا ءوتىنىش جولداپتى. بىراق سەرجانت يۆانوۆقا: «بۇل ۇلى وتان اتىنان بەرىلگەن تاپسىرما!»، - دەگەن نىق بۇيرىق بەرىلىپتى.

اقىرى سەرجانت يۆانوۆىمىز امالسىز فوتوسەسسياعا قاتىسىپ، ول اياقتالعانشا باسىنان اياعىنا دەيىن ەكى كوزىن تارس جۇمىپ الىپ سۋرەتكە تۇسە بەرگەن ەكەن. تىپتەن فوتوسەسسيا اياقتالعاننان كەيىن 10 مينۋتتاي كوزىن اشپاي تۇرىپ الىپتى. ونىسى كوزىمدى اشىپ قالعان كەزدە جامان بۋرجۋازيالىقتار بايقاتپاي سۋرەتكە ءتۇسىرىپ قويماسىن دەگەن ساقتىعى دەيدى. وسىلايشا ءبىزدىڭ يۆانوۆتىڭ سۋرەتى تاريحقا اينالدى، بۇگىندە ونى تاريحشىلار «يۆانوۆ سيندرومى» دەپ اتايدى...

ءيا، كسرو كەزىندە بۇكىل كەڭەس حالقى وسىنداي قوعامدا، وسىنداي ويمەن ءومىر سۇرگەن بولاتىن ...

لەنين قۇرعان سوۆەت ۇكىمەتى زامانىندا 70 جىل بويى قازاقتار: «كوممۋنيزمگە تەك ورىس تىلىندە عانا جەتۋگە بولادى!»، - دەگەن ۇستەمدىك قۇرعان ۇران ارقىلى، تەك ءتىلى عانا ەمەس، ميى دا ورىستانعان، ساناسى دا تولىعىمەن ورىستانعان بولاتىن، سول تەندەنتسيا ءəلى ساقتالۋدا!

تəۋەلسىز ەل بولعانىنا 30 جىل تولعانىنا قاراماستان، ەلدى بيلەپ وتىرعان «ورىس ءتىلدى» بيلىك ءəلى كۇنگە «يۆانوۆ سيندرومىنىڭ» ەلەسىنەن ارىلماعان، كەڭەس بيلىگىنىڭ سارقىنشاق اۋلەتىنەن ەكەنى قازاق قوعامىنا جاسىرىن ەمەس...

ونىڭ قاراپايىم ءبىر مىسالى، «قر-نىڭ مەملەكەتتىك ءتىل تۋرالى» زاڭ شىعارۋدان ءالى كۇنگە دەيىن ولەردەي قورقىپ، «يۆانوۆشا كوزىن تاس قىلىپ جۇمىپ الىپ» اشپاي وتىرعانى!..

امانتاي تويشىبايۇلى

Abai.kz