قازاقستاندا قوس بيلىك بار دەگەن پىكىر كۇشەيگەن تۇستا ەلدىڭ كونستيتۋتسيالىق كەڭەسىنىڭ توراعاسى قايرات ءمامي جولداۋ جاساپ، “ەلباسى مەن پرەزيدەنت ينستيتۋتىنىڭ بىرىگىپ ارەكەت ەتۋى تيىمدىلىگىن كورسەتتى، بۇل اسىرەسە كوروناۆيرۋس ىندەتى كەزىندە قاتتى بايقالدى” دەدى، - دەپ جازادى centralasian.org.

"2019 جىلى پرەزيدەنتتىك وكىلەتتىكتەردىڭ كوشۋىنەن كەيىنگى كەزەڭ قازاقستان ءۇشىن ەلباسى مەن ەل پرەزيدەنتى ينستيتۋتتارىنىڭ بىرگە ارەكەت ەتۋى پرەزيدەنتتىك باسقارۋ نىسانىنىڭ تيىمدىلىگىن، ورىندىلىعىن جانە ورنىقتىلىعىن كورسەتىپ وتىر. وسى ىنتىماقتاستىق COVID-19 پاندەمياسىنىڭ قيىن كەزەڭىندە جانە ونىڭ سالدارىنان ەكونوميكالىق جۇيەنىڭ بارلىق سەكتورىندا جانە ازاماتتىق قوعامنىڭ الەۋمەتتىك بلوگىندا تۋىنداعان قيىندىقتار، حالىقارالىق كۇن ءتارتىبى كولەمىنىڭ ارتۋى جاعدايىندا ەرەكشە وزەكتى بولدى", - دەدى ءمامي 21 ماۋسىمدا پارلامەنت پالاتالارىنىڭ بىرلەسكەن وتىرىسىندا.

قازاقستاننىڭ ەكس-پرەزيدەنتى نۇرسۇلتان نازارباەۆتىڭ "ەلباسى" ستاتۋسى بار. بۇل ستاتۋستىڭ ارقاسىندا ونىڭ وزىنە جانە وتباسىنا قىلمىستىق ءىس قوزعالمايدى.

ءمامي پرەزيدەنت توقاەۆ "ەلباسى" نازارباەۆ ايقىنداپ بەرگەن باعىتىن ويداعىداي جالعاستىرىپ جاتىر دەگەندى مەڭزەدى.

"مەملەكەت باسشىسىنىڭ ءىس-قيمىلدارىمەن ەلباسىنىڭ مەملەكەتتىلىكتى ودان ءارى ۇدەمەلى دامىتۋ جونىندەگى ستراتەگيالارى مەن داستۇرلەرى جالعاسىپ جاتقانى اقيقات. ولار ستراتەگيالىق جوسپارلاۋدىڭ نەگىزگى قۇجاتتارىندا قامتىلعان", - دەدى ول.

ءمامي جولداۋدا بيىل قاڭتاردا ەپيدەميولوگيالىق جاعدايدىڭ كۇردەلى ەكەنىنە قاراماستان ءماجىلىس جانە ءماسليحات دەپۋتاتتارىنىڭ سايلاۋى "قولدانىستاعى جاڭارتىلعان زاڭناماعا سايكەس وتكەنىن" اتاپ ءوتتى. (حالىقارالىق باقىلاۋشىلار سايلاۋدا زاڭسىزدىقتار كوپ بولدى دەپ باعالاعان - رەد.).

اۋىل شارۋاشىلىعى جەرلەرىن جەكە مەنشىككە بەرۋگە جانە شەتەلدىكتەرگە بەرۋگە تىيىم سالاتىن زاڭ, "ادۆوكات قىزمەتى" تۋرالى زاڭداردىڭ قابىلدانعانىن ايتتى.

قۇرامىندا جەتى مۇشەسى بار كونستيتۋتسيالىق كەڭەس ەلدە پرەزيدەنت، پارلامەنت سايلاۋى، رەفەرەندۋمنىڭ زاڭدى ءوتۋىن قاداعالايدى. قابىلدانعان زاڭداردىڭ، راتيفيكاتسيالانعان حالىقارالىق كەلىسىمدەردىڭ كونستيتۋتسياعا سايكەستىگىن تەكسەرەدى. زاڭدارعا تۇسىنىكتەمە بەرەدى. كەڭەستىڭ وزگە دە مىندەتتەرى بار.

2019 جىلى ەلدى وتىز جىلعا جۋىق باسقارعان نۇرسۇلتان نازارباەۆتىڭ وتستاۆكاعا كەتكەننەن كەيىن دە ساياسي كەڭىستىكتە ىقپالىن ساقتاپ قالۋى ەلدە "قوس بيلىك ورنادى" دەگەن تۇجىرىمنىڭ تاراۋىنا تۇرتكى بولعان. دەگەنمەن كەي ساراپشىلار "قوس بيلىك ورنادى دەگەننەن گورى بيلىك نازارباەۆتىڭ قولىندا قالدى" دەگەن تۇجىرىم شىندىققا كوبىرەك سايكەس كەلەدى دەپ سانايدى.

Abai.kz