بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ۆيتسە-مينيستر ولجاس ابىشەۆكە قاتىستى سوتقا دەيىنگى تەرگەۋ اياقتالدى. بۇل تۋرالى قر قارجىلىق مونيتورينگ اگەنتتىگى مالىمدەدى. 

ءبىرتانوۆ پەن ابىشەۆ دەنساۋلىق ساقتاۋ مينيسترلىگىنىڭ جارامسىز اقپاراتتاندىرۋ پلاتفورماسىن قابىلداۋ جانە پايدالانۋعا بەرۋ ارقىلى لاۋازىمدىق وكىلەتتىكتەرىن اسىرا پايدالاندى دەپ، كۇدىككە ىلىنگەن.

«پلاتفورما دەنساۋلىق ساقتاۋ جۇيەسىندەگى پروبلەمالاردى جەدەل شەشۋ ءۇشىن پاتسيەنتتەر، ءدارى-دارمەكتەر جانە مەديتسينالىق بۇيىمدار تۋرالى بارلىق اقپاراتتى بىرىكتىرۋى كەرەك ەدى.

بۇگىنگى تاڭدا پلاتفورما جۇمىس ىستەمەيدى جانە ونى مەديتسينالىق مەكەمەلەردىڭ پايدالانبايتىنى جينالعان دالەلدەرمەن راستالادى.

ورىندالماعان جۇمىستاردىڭ قۇنى 4,1 ملن دوللاردى نەمەسە 1,5 ملرد تەڭگەنى قۇرايدى»,- دەلىنگەن اگەنتتىك مالىمەتىندە.

سونداي-اق، ەلجان ءبىرتانوۆ سانيتاريالىق اۆياتسيانىڭ اۋە كەمەسىن 2020 جىلعى ماۋسىمدا جەكە ماقساتتارى ءۇشىن پايدالانۋ كەزىندە وكىلەتتىكتەرىن اسىرا پايدالاندى دەپ، ايىپتالۋدا.

«اعىمداعى جىلعى 7 شىلدەدە سوتقا دەيىنگى تەرگەپ-تەكسەرۋدىڭ اياقتالعانى تۋرالى جاريالانىپ، قىلمىستىق ءىس ماتەريالدارىمەن تانىسۋ باستالدى»، - دەيدى اگەنتتىك.

Abai.kz