جەكسەنبى, 24 قازان 2021
46 - ءسوز 4387 7 پىكىر 9 شىلدە, 2021 ساعات 15:21

مىناداي ۇكىمەتكە قالاي سەنۋگە بولادى؟

گۆاتەمالا "سپۋتنيككە" تولەگەن اقشاسىن كەيىن قايتارۋدى تالاپ ەتىپ جاتىر. دەر كەزىندە تاۋارىن جەتكىزىپ بەرمەگەنى ءۇشىن. جالپى بىلاي بولعان سياقتى: رەسەي وسى ۆاكتسينانى دا ساياساتقا اينالدىرىپ، ءبىرىنشى بولۋعا تىرىسىپ، ءالى تولىق تەكسەرۋدەن وتپەگەن، سالدارى بەلگىسىز پرەپاراتتى اينالىمعا شىعارىپ، نەعۇرلىم كوبىرەك ەلدەرگە ساتۋعا تىرىسقان. جانتالاسا اركىممەن كەلىسىم-شارتتارعا وتىرا بەرگەن. ول شارتتى كەيىن ورىنداي الا ما، جوق پا - وعان قاراماعان.

قورىتىندىسىندا ەندى نە بولىپ جاتىر؟ رف-نىڭ وزىندە دۇرىس ءوندىرىس جوق، بارىنىڭ قۋاتى جەتپەيدى، سودان كەلىپ كەلىسىم-شارتتارىن ورىنداي الماي جاتىر. ونىڭ ۇستىنە ۋفاداعى نەگىزگى فارماتسەپتيكالىق زاۋىتتان شۋ شىققان، وندا وندىرىلگەن پرەپاراتتاردىڭ ستەريلدىگى كۇدىك تۋعىزىپ وتىر. بۇل ءبىر جاعى.
ەكىنشىدەن، پرەپارات تولىق تەكسەرۋدەن وتپەگەن، سوڭعى ناتيجەسى نە بولىپ شىعارى بەلگىسىز. ونىڭ ۇستىنە "سپۋتنيك" ەكپەسىن العانداردىڭ قايتا اۋىرىپ قالعاندارى دا جەتەرلىك ەكەن. ول جونىندە ناقتى مالىمەتتەر جاسىرىن. الايدا رەسەي دارىگەرلەرىنىڭ ءوز ىشىندە وسى ەكپەگە قارسىلار كوپ-اق.

اركىمنىڭ دەنساۋلىعى وزىنە عانا كەرەك، بۇل جەرگە ساياساتتى ارالاستىرۋ ءتىپتى ورىنسىز-اق. سوعان قاراماستان ءبىزدىڭ ۇكىمەتتىڭ جانتالاسۋى، ءالى وندىرىسكە شىقپاعان "سپۋتنيككە" ءبىرىنشى بارىپ "قۇدا" ءتۇسۋى، ءۇش ەسەدەن استام قىمباتقا الۋى (ەگەر فب-داعى كەيبىر مالىمەتتەرگە سەنسەك), ەندى كەلىپ ارتىق الىنعان سول پرەپاراتتى ىسكە قوسۋ ءۇشىن زورلاپ ەكپە الدىرۋعا يتەرمەلەۋى ءتىپتى اقىلعا سىيمايتىن، مورالعا جات نارسە. وكىنىشكە وراي بۇعان توقتام سالاتىن دا ەشكىم بولماي تۇر، ويتكەنى وسىنىڭ ءبارىن ۇيىمداستىرۋشى - بيلىكتىڭ ءوزى.

ءالى دە كەش ەمەس. دسۇ-مەن كەلىسىلگەن، تيىمدىلىگى زەرتحانالىق جاعدايدا تەكسەرىلگەن، دامىعان باتىس ەلدەرىندە قولدانىلىپ جاتقان پفايزەر، مودەرنا ەكپەلەرىن اكەلىپ ەكسە، ءبارىمىز دە سول ەكپەنى الۋعا قارسى بولماس ەدىك. ايتپەسە بىردە-ءبىر تياناقتى بىتىرگەن ءىسى جوق مىناداي ۇكىمەتكە قالايشا سەنۋگە بولادى؟

قۋانىش ەدىلحانتەگى

Abai.kz

7 پىكىر