مەملەكەت باسشىسى قاسىم-جومارت توقاەۆ توكيودا وتكەن وليمپيادا ويىندارىنا قاتىستى پىكىر ءبىلدىرىپ، سپورت سالاسىنا شۇعىل تۇردە رەفورما جاساۋ قاجەتتىگىن ايتتى. 

«توكيودا وتكەن وليمپيادا ويىندارىنا قازاقستاننان 93 سپورتشى قاتىستى. جەڭىسكە جەتۋ جولىندا بار كۇش-جىگەرى مەن شەبەرلىگىن كورسەتكەن اتلەتتەرگە العىسىمدى بىلدىرەمىن. وليمپيادانىڭ قولا جۇلدەگەرلەرىن قۇتتىقتايمىن. بۇل ۇزاق ۋاقىت بويى جۇرگىزگەن تاباندى جاتتىعۋلاردىڭ جاقسى ناتيجەسى»،- دەپ جازدى پرەزيدەنت.

پرەزيدەنتتىڭ ايتۋىنشا، بۇل جولعى وليمپيادا كورسەتكىشى سپورتتى دامىتۋعا ءبولىنىپ وتىرعان قىرۋار قاراجاتقا ساي ەمەس. سوندىقتان دا، سپورت سالاسىنا شۇعىل تۇردە رەفورما جاساۋ قاجەت.

«ۇلتتىق قۇرامنىڭ وليمپياداداعى كورسەتكىشى سپورت سەكىلدى اسا ماڭىزدى سالادا شۇعىل ءارى ءتيىمدى رەفورمالار جۇرگىزۋ قاجەت ەكەنىن كورسەتتى. بۇقارالىق جانە بالالار سپورتىن دامىتۋعا كوڭىل ءبولىپ، سول ارقىلى الەمدىك ارەنادا ۇلكەن تابىستارعا قول جەتكىزۋگە ۇمتىلۋ قاجەت.

الايدا، 8 قولا مەدال الىپ، جالپى كوماندالىق ەسەپتە 83-ورىنعا تابان تىرەگەن ۇلتتىق قۇرامانىڭ بۇل كورسەتكىشى قازاقستاننىڭ سپورتتاعى الەۋەتىنە جانە مەملەكەت تاراپىنان سپورتتى دامىتۋعا ءبولىنىپ وتىرعان مول قاراجاتقا سايكەس كەلمەيدى»،- دەدى توقاەۆ.

سونداي-اق، قاسىم-جومارت توقاەۆ الداعى پاريج وليمپياداسىندا لايىقتى ناتيجەگە قول جەتكىزۋ ءۇشىن بۇل جولعى قاتەلىكتەردى قايتالاماۋ كەرەكتىگىن ايتتى.

«توكيو وليمپياداسىنان ساباق الىپ، پاريجدە وتەتىن كەلەسى ويىنداردا حالىق ءۇمىتىن اقتايتىنداي ناتيجەگە قول جەتكىزۋ كەرەك»،- دەدى پرەزيدەنت.

Abai.kz