اۋعانستان تولىقتاي تالىبتەردىڭ قولىنا ءوتتى. الايدا 34 پروۆينتسيانىڭ ىشىندە «تاليبانعا» باس يمەگەن ءالى دە ءبىر ايماق بار. ول پاندجشەر شاتقالىنىڭ ماڭى. پاندجشەر دەگەندە ەسىمىزگە بىردەن ايگىلى احماد شاح ماسۋد تۇسەتىنى انىق. كەڭەس اسكەرىمەن ارىستانشا الىسىپ، ارتىنشا تالىبتەرمەن جۇلىسقان احماد شاح ماسۋدتىڭ بەكىنىسى بولعان پاندجشەر شاتقالى بۇگىندە تالىبتەرگە بەرىلۋدەن باس تارتۋدا.

پاندجشەر ايماعىندا نەگىزىنەن تاجىك ۇلتىنىڭ سانى باسىم. 1996-2001 جىلدارى اۋعانستاندا تالىبتەر تولىق باسىپ العان ساتتە دە، اتالمىش ايماققا كىرۋدەن يمەنىپ، پاندجشەردىڭ قاقپاسىنان ارى اسپاعان ەدى. ەندى مىنە، تاليبان بيلىگىن مويىنداۋدان باس تارتقان بارلىق كۇشتەر، ونىڭ ىشىندە قالالاردى ۇرىسسىز تاستاۋعا ءماجبۇر بولعان ساربازدار دا اتالمىش ايماققا توپتاسىپ جاتىر. قوزعاۋشى كۇش رەتىندە احماد شاح ماسۋدتىڭ ۇلى احماد ماسۋد تۇر. 32 جاستاعى ماسۋد تالىبتەرگە قارسى سوعىسۋعا شاقىرىپ وتىر. ءتىپتى ۇندەۋ دە تاستاپ ۇلگەردى.

«مەنىڭ اكەم، اۋعان حالقىنىڭ باتىرى احماد شاح ماسۋد ماعان ۇلكەن مۇرا قالدىردى، ول مۇرا اۋعان حالقىنىڭ بوستاندىعى ءۇشىن كۇرەسۋ جولى. بۇل ەندى مەنىڭ ۇرىسىم. مەن جانە مەنىڭ جاقتاستارىم قانىمىزدى توگۋگە دايىنبىز. ءبىز بارلىق تاۋەلسىز اۋعان ازاماتىن، بارلىق قۇلدىققا قارسى جانداردى بىزگە قوسىلىپ، سان قاسىرەتتى باستان كەشكەن جەرىمىزدەگى ەڭ سوڭعى تاۋەلسىز ايماق پاندجشەرگە كەلۋگە شاقىرامىز. بارلىق ايماق پەن بارلىق تايپانىڭ ۇلاندارىنا ايتارىم بىرەۋ: بىزبەن بىرگە كۇرەسىڭدەر!

شەتەلدە كۇن كەشىپ جاتقان، بىراق جۇرەگى بىزبەن بىرگە سوعاتىن وتانداستارىما ايتارىم، پاندجشەردە بەرىلمەگەن جاندار بارىن بىلىڭدەر. ەۋروپادا، فرانتسيادا، امەريكا مەن اراب ەلدەرىندە تۇرىپ بىزگە و باستا كەڭەستىك وتارلاۋعا، كەيىن «تاليبانعا» قارسى كۇرەسىمىزگە دەمەۋ بولعاندارعا ايتارىم مىناۋ: قۇرمەتتى مەنىڭ دوستارىم، ءدال بۇرىنعىداي بىزگە تاعى كومەكتەسەسىڭدەر مە؟ كەيبىرەۋلەردىڭ ساتقىندىعىنا قاراماستان، ءبىز ءالى وزدەرىڭە سەنەمىز!

بۇگىن مەن گەنەرال دە گولل فرانتسۋز اسكەرى تاس-تالقان بولعاندا نە ايتقانىن ەسكە الامىن: «فرانتسيا شايقاستا جەڭىلدى، بىراق سوعىستا ەمەس». ءبىز اۋعان حالقى، ءتىپتى شايقاستا دا جەڭىلگەن جوقپىز، ويتكەنى كابۋل شايقاسقان دا جوق. مۇندا، پاندجشەر ايماعىندا بەسىكتەگى بالادان ەڭكەيگەن قارتقا دەيىن قولىنا قارۋ الدى. بىزگە رۋحاني دەمەۋ بولىڭدار نەمەسە قاتارىمىزعا قوسىلىڭدار. مەنىڭ ازات دوستارىم، ءبىزدىڭ جانىمىزعا كوپتەپ توپتاسىڭدار. ءبىز جاڭا اۋعانستان تاريحىنىڭ پاراقتارىن بىرگە جازامىز. ول تيرانياعا قارسى كۇرەستىڭ جاڭا تاراۋى بولماق. ۇلاندار، ازات جۇرەكتى ەرلەر. قۇدايدىڭ قولداۋىمەن ءبىز جەڭەمىز!»، - دەدى ول.

پاندجشەرگە احماد ماسۋد جاساقتارىنان بولەك، ۆيتسە-پرەزيدەنت امرۋللا سالەحتىڭ جاقتاستارى دا جينالىپ جاتىر. بەيرۋتتەگى Al-Alam ارناسىنىڭ حابارلاۋىنشا، ولار ءتىپتى تالىبتەرمەن كەسكىلەسكەن ۇرىسقا ءتۇسىپ، پارۆان پروۆينتسياسىنداعى چاريكار اۋدانىن ازات ەتىپ ۇلگەرگەن.  بۇل ايماق اسا ماڭىزدى. سەبەبى چاريكارداعى سالانگ تۋننەلى ارقىلى كابۋل مەن مازاري-ءشاريفتى قوساتىن كۇرە جول بار.

پاندجشەرگە شەتتەگى اۋعان ساربازدارىنىڭ قولباسشىسى، گەنەرال دۋستۋم 10 مىڭ جاساق جىبەرگەنىن حابارلادى. دۋستۋم وزبەكستانعا ءوتىپ كەتكەن بولاتىن. الايدا اۋعانستاندا وعان باعىناتىن جاقتاستارى جەتەرلىك.

امرۋللا سالەح پرەزيدەنت اشراف گاني تاقتان باس تارتىپ، قاشىپ كەتكەندىكتەن، كونستيتۋتسياعا ساي ءوزىن پرەزيدەنت رەتىندە جاريالادى. «سىرت كۇشتەر مەنىمەن قاتىناس ورناتسىن»، - دەيدى ول.

Abai.kz