ءماجىلىس توراعاسى نۇرلان نىعماتۋلين شۆەيتساريا فەدەرالدى جينالىسى ۇلتتىق كەڭەسىنىڭ توراعاسى اندرەاس ەبي باستاعان دەلەگاتسيا وكىلدەرىن قابىلدادى.

پالاتا سپيكەرى شۆەيتساريا فەدەرالدى جينالىسى ۇلتتىق كەڭەسى توراعاسىنىڭ قازاقستانعا تۇڭعىش رەت جاساپ وتىرعان رەسمي ساپارىنا ەرەكشە نازار اۋدارىپ، قازاقستان تاۋەلسىزدىگىنىنىڭ 30 جىلدىق جانە شۆەيتساريا كونفەدەراتسياسى قۇرىلعانىنىڭ 730 جىلدىق مەرەيتويىمەن تۇسپا-تۇس كەلگەن تاريحي ماڭىزدىلىعىنا باسا نازار اۋداردى.

ودان ءارى تاراپتار ەكى ەل اراسىنداعى، سونىڭ ىشىندە، پارلامەنتارالىق  ىنتىماقتاستىقتى دامىتۋ توڭىرەگىندە ورتاق ويلارىمەن ءبولىستى.

نۇرلان نىعماتۋلين اتاپ وتكەندەي، شۆەيتساريا ءبىزدىڭ ەلىمىزدىڭ ەۋروپاداعى ماڭىزدى ساياسي جانە ساۋدا-ەكونوميكالىق ارىپتەسى سانالادى. ءوزارا قارىم-قاتىناس ورناعان 29 جىلدىڭ ىشىندە نۇر-سۇلتان مەن بەرن اراسىندا بارلىق سالا بويىنشا ىقپالداستىق تابىستى دامىپ كەلەدى. وسى رەتتە قازاقستاننىڭ تۇڭعىش پرەزيدەنتى، ەلباسى نۇرسۇلتان نازارباەۆتىڭ قازاقستاندىق-شۆەيتساريالىق ىنتىماقتاستىقتىڭ بەرىك نەگىزىن قالاپ،   ەلدەرىمىز اراسىنداعى ارىپتەستىكتى دامىتۋعا زور كوڭىل بولگەنىن العا تارتا كەلىپ، ءماجىلىس سپيكەرى قازاقستاننىڭ پرەزيدەنتى قاسىم-جومارت توقاەۆتىڭ اتالعان مەملەكەتپەن ەكىجاقتى بايلانىستى ودان ءارى تەرەڭدەتۋگە زور كوڭىل بولەتىنىن اتاپ ءوتتى.

كەزدەسۋ بارىسىندا ءماجىلىس توراعاسى مەملەكەت باسشىسىنىڭ ساياسي، ەكونوميكالىق، الەۋمەتتىك رەفورمالارى تۋراسىندا كەڭىنەن اڭگىمەلەدى.

نۇرلان نىعماتۋلين اتاپ وتكەندەي، شۆەيتساريا قازاقستاننىڭ ءىرى ساۋدا ارىپتەستەرىنىڭ ءبىرى. بۇل ەل ءبىزدىڭ ەكونوميكامىزعا 30 ملرد. دوللارعا جۋىق ينۆەستيتسيا جاسادى. شۆەيتساريالىق كاپيتالدىڭ قاتىسۋىمەن قازاقستاندا 400 دەن استام كاسىپورىن جۇمىس ىستەيدى.

نۇرلان نىعماتۋلين قازاقستان ساياسي ديالوگتى، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق قاتىناستى ودان ءارى نىعايتۋعا مۇددەلى ەكەنىن ايتا كەلىپ، وسى جولدا بارلىق سالادا، سونىڭ ىشىندە زاڭنامالىق ورگاندار اراسىنداعى سەرىكتەستىكتىڭ ماڭىزدىلىعىنا توقتالدى.

ءوز كەزەگىندە اندرەاس ەبي قازاقستان اۋقىمدى جەرى بار الەمدەگى ءىرى مەملەكەتتىڭ ءبىرى ەكەنىنە توقتالىپ، ءبىزدىڭ ەلىمىزدىڭ ەكونوميكالىق دامۋى قارقىندى، مودەرنيزاتسيالىق جەتىستىكتەرى جوعارى، دەموكراتيالىق ۇستانىمدارى بەرىك ەكەنىن ايتتى.

كەزدەسۋ يەلەرى  قوس مەملەكەتتىڭ تاريحي، مادەني ۇقساس بايلانىستارى تەرەڭدە ەكەنىن العا تارتا كەلىپ، ەلدەرىمىز اراسىنداعى بايلانىستى بارلىق سالادا ودان ءارى تابىستى دامىتۋدىڭ مۇمكىندىكتەرى زور ەكەنىن اتاپ ءوتتى.

Abai.kz