جامبىل وبلىسىنىڭ بايزاق اۋدانىنداعى اسكەري قويمادا بولعان جارىلىستان كەيىن قازاق قوعامى، قازاقستان قوعامى قر قورعانىس ءمينيسترى نۇرلان ەرمەكباەۆتىڭ وتستاۆكاسىن تالاپ ەتكەنى بەلگىلى. بۇل تۋرالى ەگجەي-تەگجەيلى جازدىق.

مينيستر نۇرلان ەرمەكباەۆتىڭ ءوزى دە باق-قا ەكى مارتە پىكىر ءبىلدىرىپ، دوعارىسقا كەتۋگە ءازىر ەكەنىن، بىراق شەشىمدى جوعارعى باس قولباسشى قابىلدايتىنىن ايتقان.

ءبىرىنشى جولى:

«مەنىڭ قازىرگى باستى مىندەتىم جارىلىس سالدارى مەن زاردابىن جويۋ، ال وتستاۆكاعا كەلەتىن بولساق، جارىلىس جايلى اقپارات العان ساتتە-اق، وتستاۆكاعا كەتۋ جايلى شەشىم قابىلدادىم. مەن وتستاۆكاعا بەرەمىن، شەشىمدى جوعارى جاق قابىلدايدى»، - دەدى.

ال ەكىنشى جولى:

«ارينە، ءبىر ادام بارىنە قاراپ، قاداعالاۋ وتە قيىن. بىراق، بىزدە سونداي ءبىر قاعيدا بار. ءبىرىنشى جەتەكشى بارىنە جاۋاپ بەرەدى. سول سياقتى مەن كىناسىز بولسام دا، جەكە ءوزىم جازىقسىز بولسام دا، مەن بارىنە جاۋاپ بەرەمىن.

ونىڭ ۇستىنە وفيتسەرلىك، گەنەرالدىق ار-نامىس دەگەن ۇعىم بار. سوعان سايكەس، مەن ارينە، وتستاۆكاعا بەرەمىن. وتستاۆكا سۇرايمىن. بىراق، جوعارعى باس قولباسشى جانە مەملەكەت باسشىلارى قانداي شەشىم قابىلدايدى، ونى مەن ايتا المايمىن»، - دەپ سويلەدى.

وسىدان كەيىن-اق، الەۋمەتتىك جەلى بەلسەندىلەرى مەن قوعام وكىلدەرى كەلەسى كەزەكتە قورعانىس مينيسترلىگىنە پوتەنتسيالدى ۇمىتكەرلەردى ىزدەي باستادى.  بىرەۋلەرى - بۇل «كرەسلوعا» قازىر زەينەتتە جۇرگەن، بۇرىن اتالعان مينيسترلىكتى ەكى جىلعا جۋىق باسقارعان يمانعالي تاسماعامبەتوۆ لايىق دەگەن پىكىردە بولسا، ەندى بىرەۋلەرى – قازاقستاننىڭ باس پروكۋرورى بولىپ ءجۇرىپ، سەنات دەپۋتاتتىعىنا اۋىسقان قايرات پەرنەشۇلى قوجامجاروۆتى ۇسىنىپ جاتىر. پىكىرشىلەردىڭ ىشىندە «ەرمەكباەۆ دوعارىسقا كەتۋدى سۇراسا دا، قىزمەتىندە قالادى»، - دەيتىندەر دە جوق ەمەس.

ال «Yedilov وnline» Telegram ارناسى جۋىردا قازاقستاننىڭ كەلەسى قورعانىس ءمينيسترى كىم بولۋى مۇمكىن دەگەن سۇراققا جاۋاپ ىزدەپ، ءوز وقىرماندارى اراسىندا ساۋالناما جۇرگىزىپتى.

سەنات دەپۋتاتى قايرات قوجامجاروۆتىڭ بيىل مامىر ايىندا قر قك اەروموبيلدى اسكەرىنىڭ №68665 اسكەري بولىمىنە بارىپ قايتقانىن ەسكە الىپ، «سەناتور قايرات قوجامجاروۆ قازاقستاننىڭ كەلەسى قورعانىس ءمينيسترى بولۋى مۇمكىن بە؟»، - دەپ سۇرايدى.

اتالعان ساۋالناماعا 8 مىڭنان استام وقىرمان قاتىسقان كورىنەدى. ولاردىڭ 56 پايىزعا جۋىعى: «جوق، بۇل مۇمكىن ەمەس»، دەسە، قالعان 44 پايىزى: «ءيا، ول كادرلىق تازارتۋ جاسار ەدى»، - دەپ جاۋاپتاپتى.

ءسىز بۇل ورىنعا كىمدى لايىق كورەسىز؟

تاقىرىپقا تۇزدىق:

قر قورعانىس مينيسترلىگىن كىمدەر باسقاردى؟

1. ساعادات قوجاحمەتۇلى نۇرماعامبەتوۆ

(1992 جىلدىڭ مامىرى مەن 1995 جىلدىڭ قازانى ارالىعى)

2. الىبەك حاميتۇلى قاسىموۆ

(16 قازان 1995 جىل – 30 قازان 1996 جىل)

3. مۇحتار قاپاشۇلى التىنباەۆ

(30 قازان 1996 جىل – 9 تامىز 1999 جىل)

4. ءسات بەسىمبايۇلى توقپاقباەۆ

(13 قازان 1999 جىل – 8 جەلتوقسان 2001 جىل)

5. مۇحتار قاپاشۇلى التىنباەۆ

(2 جەلتوقسان 2001 جىل – 8 قاڭتار 2007 جىل)

6. دانيال كەنجەتايۇلى احمەتوۆ

(10 قاڭتار 2007 جىل – 17 ماۋسىم 2009 جىل)

7. ادىلبەك رىسكەلدىۇلى جاقسىبەكوۆ

(24 ماۋسىم 2009 جىل – 2 ءساۋىر 2014 جىل)

8. سەرىك نىعمەتۇلى احمەتوۆ

(3 ءساۋىر 2014 جىل – 22 قازان 2014 جىل)

9. يمانعالي نۇرعاليۇلى تاسماعامبەتوۆ

(22 قازان 2014 جىل – 13 قىركۇيەك 2016 جىل)

10. ساكەن ءادىلحانۇلى جاسۇزاقوۆ

(13 قىركۇيەك 2016 جىل – 7 تامىز 2018 جىل)

11. نۇرلان بايۇزاقۇلى ەرمەكباەۆ

(7 تامىز 2018 جىلدان كۇنى بۇگىنگە دەيىن)

Abai.kz