بۇل تۋرالى قازاقستان پرەزيدەنتىنىڭ ءباسپاسوز حاتشىسى بەرىك ءۋالي Facebook-تەگى رەسمي پاراقشاسىندا حابارلادى.

«مەملەكەت باسشىسى قاسىم-جومارت توقاەۆ قورعانىس ءمينيسترى نۇرلان ەرمەكباەۆتىڭ قىزمەتتەن بوساتۋ جونىندەگى راپورتىن قاراستىرىپ، ونىڭ ءوتىنىشىن قابىلدادى»، -دەپ جازدى بەرىك ءۋالي.

جامبىل وبلىسىنىڭ بايزاق اۋدانىنداعى اسكەري قويمادا بولعان جارىلىستان كەيىن قازاق قوعامى، قازاقستان قوعامى قر قورعانىس ءمينيسترى نۇرلان ەرمەكباەۆتىڭ وتستاۆكاسىن تالاپ ەتكەنى بەلگىلى. بۇل تۋرالى ەگجەي-تەگجەيلى جازدىق.

مينيستر نۇرلان ەرمەكباەۆتىڭ ءوزى دە باق-قا ەكى مارتە پىكىر ءبىلدىرىپ، دوعارىسقا كەتۋگە ءازىر ەكەنىن، بىراق شەشىمدى جوعارعى باس قولباسشى قابىلدايتىنىن ايتقان.

ءبىرىنشى جولى:

«مەنىڭ قازىرگى باستى مىندەتىم جارىلىس سالدارى مەن زاردابىن جويۋ، ال وتستاۆكاعا كەلەتىن بولساق، جارىلىس جايلى اقپارات العان ساتتە-اق، وتستاۆكاعا كەتۋ جايلى شەشىم قابىلدادىم. مەن وتستاۆكاعا بەرەمىن، شەشىمدى جوعارى جاق قابىلدايدى»، - دەدى.

ال ەكىنشى جولى:

«ءبىر جاعىنان "مينيستر كىنالى" دەپ ايتۋ - ناداندىق. ويتكەنى ساۋاتتى ادامدار بىلەدى، قارۋلى كۇشتەر ول - كىشى مەملەكەت دەپ ايتۋعا بولادى. بارلىق جۇيەلەر بار، قارۋلى كۇشتەردىڭ ىشىندە. ءبىلىم بەرۋ جۇيەسى، دەنساۋلىق ساقتاۋ جۇيەسى، جاۋىنگەرلىك دايارلاۋ، سولداتتاردى ۇيرەتۋ... بۇل وتە كۇردەلى مەحانيزم. 

ارينە، ءبىر ادام بارىنە قاراپ، قاداعالاۋ وتە قيىن. بىراق، بىزدە سونداي ءبىر قاعيدا بار. ءبىرىنشى جەتەكشى بارىنە جاۋاپ بەرەدى. سول سياقتى مەن كىناسىز بولسام دا، جەكە ءوزىم جازىقسىز بولسام دا، مەن بارىنە جاۋاپ بەرەمىن.

ونىڭ ۇستىنە وفيتسەرلىك، گەنەرالدىق ار-نامىس دەگەن ۇعىم بار. سوعان سايكەس، مەن ارينە، وتستاۆكاعا بەرەمىن. وتستاۆكا سۇرايمىن. بىراق، جوعارعى باس قولباسشى جانە مەملەكەت باسشىلارى قانداي شەشىم قابىلدايدى، ونى مەن ايتا المايمىن»، - دەپ سويلەدى.

26 تامىز كۇنى جامبىل وبلىسىنداعى بايزاق اۋدانىندا ورنالاسقان اسكەري قويمادان ءورت شىعىپ، ارتى جارىلىسقا ۇلاسقان. شەتىن وقيعادان 15 ادام قازا تاۋىپ، جۇزگە جۋىعى ءتۇرلى دەنە جاراقاتتارىن العان. پرەزيدەنت توقاەۆ شۇعىل جيىن وتكىزىپ، ارنايى كوميسسيا قۇرىلعان. ال 29 تامىزدى جالپىۇلتتىق ازا تۇتۋ كۇنى دەپ جاريالاعان.

Abai.kz