قازاقستاندا مەملەكەتتىك ءتىلدى ەركىن مەڭگەرۋ مەملەكەتتىك قىزمەتكەرلەر ءۇشىن مىندەتتى بولۋى مۇمكىن. بۇل ەل تالاپ ەتىپ كەلە جاتقان باستى ماسەلەلەردىڭ ءبىرى. 

قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى Open NLA پورتالىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا نورماتيۆتىك-قۇقىقتىق كەڭەسشى قۇجاتتىڭ جوباسىن دايىنداپ، ورنالاستىردى. قۇجاتتا تىلگە قاتىستى دا جازىلعان تۇستارى بار.

«مەملەكەتتىك ورگانداردا قازاق ءتىلىنىڭ قولدانىلۋىن كەڭەيتۋ ءۇشىن ءبىز مەملەكەتتىك قىزمەتكە قابىلداۋ ءۇشىن مەملەكەتتىك ءتىلدى ءبىلۋدىڭ شەكتى دەڭگەيىن ورناتۋ كەرەك دەپ ەسەپتەيمىز»، - دەلىنگەن قۇجات ماتىنىندە.

قۇجاتتا مەملەكەتتىك قىزمەت جۇيەسىنىڭ دامۋى قوعامدىق قاتىناستاردى ترانسفورماتسيالاۋ پروتسەستەرىمەن تىعىز بايلانىستى ەكەنى ايتىلعان. قوعامداعى قازاق-ورىس بيلينگۆيزمىنىڭ دامۋ ديناميكاسى مەملەكەتتىك قىزمەتكەرلەرگە قويىلاتىن تالاپتارعا اسەر ەتپەي قويمايدى.

بۇگىندە ەلىمىزدە 90 مىڭعا جۋىق مەملەكەتتىك قىزمەتكەر جۇمىس ىستەيدى. الايدا ولاردىڭ ىشىندە مەملەكەتتىك ءتىلدى بىلمەيتىن مەملەكەتتىك قىزمەتكەرلەر سانى از ەمەس. ءتىپتى، بيىك مىنبەردە مەملەكەتتىك تىلدە قويىلعان ساۋالعا ورىس تىلىندە جاۋاپ بەرىپ، تالاي مارتە ەل ىشىندە كۇلكى مەن كەلەكەگە اينالعان ساتتەر از ەمەس.

مەملەكەتتىك قىزمەتكەرلەردىڭ بەلگىلى-ءبىر ءتىلدى بەلسەندى قولدانۋى كوبىنە قىزمەت سالاسىنا جانە ولار جۇمىس ىستەيتىن ايماققا بايلانىستى.

مەملەكەتتىك ءتىلدى ءبىلۋ ماڭىزى ارتىپ كەلەدى. بۇل دەموگرافيامەن دە تىعىز بايلانىستى. مىسالى مەملەكەتتىك قىزمەت كورسەتۋ ساپاسىنا جۇرگىزىلگەن قوعامدىق مونيتورينگ ناتيجەلەرى بويىنشا قىزمەت الۋشىلاردىڭ 8%-ى تىلدىك كەدەرگىگە بايلانىستى قاناعاتتانباعان.

«جوعارىدا ايتىلعانداردى ەسكەرە وتىرىپ، مەملەكەتتىك قىزمەتكەرلەرگە ءتىلدى ەركىن مەڭگەرۋگە قويىلاتىن تالاپتاردى ەنگىزۋ ماسەلەسى قوعام مەن ۋاقىتتىڭ قاجەتتىلىگىنەن تۋىندادى.

قولدانىستاعى زاڭنامادا مەملەكەتتىك قىزمەتكەرلەرگە مەملەكەتتىك ءتىلدى ەركىن مەڭگەرۋگە قويىلاتىن تالاپتار قاراستىرىلماعاندىقتان، ءبىز «قازاقستان رەسپۋبليكاسىنىڭ مەملەكەتتىك قىزمەتى تۋرالى» جانە «مەملەكەتتىك ءتىل تۋرالى» زاڭداردا قاراستىرۋدى قاجەت دەپ سانايمىز»,-دەلىنگەن قۇجاتتا.

«قۇقىقتىق اكتىلەر تۋرالى» زاڭعا سايكەس، بۇعان دەيىن ءوز جۇمىس ىستەپ جۇرگەندەرگە قولدانىلمايتىنىن اتادى. ياعني، تالاپتار تەك جۇمىس ىستەيتىن قىزمەتكەرلەرگە ەمەس، جاڭادان كەلگەندەرگە قولدانىلادى.

مەملەكەتتىك ءتىلدى ءبىلۋ مەملەكەتتىك قىزمەتكە تۇرۋ بارىسىندا كوپتەگەن ەلدەردە مىندەتتى بولىپ تابىلادى. رەسەي مەن گەرمانيا، قىتاي سىندى ەلدەر سولاردىڭ قاتارىندا.

Abai.kz