تىلگە الاڭداعان جاس قالامگەرلەردى ارنايى باعدارلامامەن سولتۇستىككە كوشىرۋ كەرەك، توقاەۆ مىرزا!

كەشە قر پرەزيدەنتى قاسىم-جومارت توقاەۆقا ءبىر توپ جاس قالامگەر اشىق حات جازدى. ولاردىڭ مەملەكەتتىك ءتىل - قازاق تىلىنە دەگەن جاناشىرلىعىنا ريزا بولماسقا شارا جوق! بىراق تا، تاۋەلسىزدىك العالى مۇنداي جۇزدەگەن حات جازىلعانىن بىلەمىز. ونىڭ بىرىنەن دە ناتيجە شىقپاعانى تاعى بار. نەگە بۇلاي بولدى؟

سەبەبى، ايتۋمەن، ايعايلاۋمەن، حات جازۋمەن ەش ماسەلە شەشىلمەيدى. مۇنداي اشىق حاتتارعا بولا ءتىلدىڭ ماسەلەسى شەشىلسە، وتىز جىل بويى ءبىر ورىندا ومالىپ وتىرماس ەدىك. قۇرىدى دەگەندە شاحانوۆ اتامىزدىڭ شەكەسىنە شودىرايىپ ءبىر ءمۇيىز شىعار ەدى. قاراڭىز، ول دا جوق...

ياعني، پرەزيدەنتكە ءھام حات جازعىش جاستارعا "نە ىستەۋ كەرەك؟" دەگەن سۇراق تۋادى. مەنىڭشە، ءتىلدىڭ جوعىن جوقتاعان تۇلعالاردى ءھام قوعام بەلسەندىلەرىن ورىستانعان ولكەلەرگە (نەگىزىنەن قالالار مەن اۋدان ورتالىقتارىنا) قونىس اۋدارۋعا مەملەكەت تاراپىنان قولداۋ جاساۋ كەرەك.

ول ازاماتتار اۋىزبەن ايتقانىن ءىس جۇزىندە جۇزەگە اسىرىپ كورسىن! ناقتى مەملەكەتتىك ءتىلدى ۇيرەتۋ كۋرستارىنا باسشىلىق ەتسىن! سول وڭىرلەردىڭ ىشكى ساياسات جۇمىستارىمەن اينالىسسىن! اۋداندىق، وبلىستىق باسىلىمدار ارقىلى ءتىل مايدانىنا كىرسىن! سول وڭىرلەردەن قازاق مەكتەپتەرىن، بالاباقشالارىن اشۋ، ول مەكەمەلەرگە جاس ماماندار تارتۋ سەكىلدى مىڭ سان جۇمىستارمەن شۇعىلدانسىن! وسى مىڭ سان ىسكە الگى حاتقا قول قويعان الپىسقا جۋىق ءھام ونىڭ سىرتىنداعى مىڭ قولداۋشى تاپتىرماس مامان بولار ەدى.
ءوستىپ، "جاۋ جۇرەك مىڭ بالانى" سولتۇستىك وڭىرلەرگە اتتاندىرساق (قاجەت بولسا ءبىز دە بارۋعا دايىنبىز), ولار ناقتى ءبىلىم تاجىريبەلەرىن مەملەكەتتىك ءتىلدىڭ دامۋىنا باعىتتاسا، تىم قۇرىعاندا سەڭ قوزعالار ەدى.

وتكەن عاسىردا ناقتى كۇرەستىڭ جولىن الاشوردالىقتار كورسەتىپ بەردى. ولار كىتاپ تا جازدى، اعارتۋشى دا بولدى، ساياساتپەن دە اينالىستى... پرەزيدەنت سول داڭعىلعا "جانىن جۇلىپ جەپ تۇرعان" وسى جاستاردى قايتا سالىپ جىبەرسە، ون جىلدا-اق ونىڭ جەمىسىن جەپ وتىرار ەدىك.

كەزىندە "تىڭ يگەرۋ" دەگەن سىلتاۋمەن قازاق جەرىنە كەلىمسەكتەر اعىلدى. ەندى ول ولكەلەرگە تۇپكىلىكتى يە بولىپ قالۋ ءۇشىن ناقتى ارەكەت جاساۋىمىز قاجەت.

قانات ابىلقايىر

Abai.kz