وسىدان بىرنەشە كۇن بۇرىن قىزىمىزدىڭ وسلو ۋنيۆەرسيتەتىنە وقۋعا اتتانعانىن جازىپ ەدىك. نورۆەگ جاعىنىڭ گرانتىمەن. ءبىر مىڭ ەكى جۇزدەن استام دوسىمىز قولداۋ ءبىلدىرىپ، 450-گە جۋىق اق تىلەك جازىلدى. بارىڭىزگە راقمەت. قىزىمىز ول ۇمىتتەرىڭىز اقتايدى، اق تىلەكتەرىڭىزگە ادال بولادى دەپ سەنەمىز.

ەندى بىرەر ءجايتتى ايتا كەتۋ كەرەك. ەكى ەلدى، ەكى ەلدىڭ ۇكىمەتتەرىن سالىستىرۋ ءۇشىن. ساپارعا شىعار الدىندا قىزىمىز كوۆيدكە قارسى ۆاكتسينا المادى. ويتكەنى، بىزدە سالىنىپ جاتقان رەسەي، قىتاي جانە وتاندىق ۆاكتسينالاردى ەۋروپا ەلدەرىنىڭ كوبى مويىنداماعان. ونىڭ ىشىندە نورۆەگيا دا. ال ەۋروپا مەن اقش-قا كىرۋگە رۇقسات ەتىلگەن ۆاكتسينانى ءبىزدىڭ ەلىمىز ساتىپ الماعان. پرەزيدەنت توقاەۆ وسىنى ايتىپ ۇستەلدى قانشا توقپاقتاسا دا ءالى اكەلگەن جوق.

وقۋعا اتتانباس بۇرىن قىزىمىز مۇنى حابارلاعان ەكەن، ۋنيۆەرسيتەتىنەن «وقاسى جوق، ون كۇن كارانتيندە جاتاسىز، ودان كەيىن وسىندا سالدىرتاسىز» دەپتى.

ارى قاراي قىزىق. كارانتيندە ون كۇن قوناق ۇيدە جاتۋى كەرەك. «وعان تولەيتىن قارجى جاعى قيىن» دەپ جازادى قىزىمىز. ءيا، راس. اكەسى – ءبىز ۇكىمەتتەن ايىنا 110 مىڭ تەڭگە زەينەتاقى الامىز. ەۋروعا شاققاندا 200 ەۋرو. اناسى ءۇي شارۋاسىندا. ءىنىسى – ول دا ستۋدەنت.

قىزىمىز ءبىزدى قيناماۋ ءۇشىن ءتۇسىپ تۇرعان وقۋىنان باس تارتقىسى كەلگەن. سويتسە نورۆەگ جاعىنان «ونى ۋايىمداماڭىز. ون كۇن كارانتيندە جاتاتىن قوناق ءۇيدىڭ اقىسى مەن ءۇش ۋاقىت تاماعىن ءوزىمىز تولەيمىز» دەپ جازىپتى. جاتاتىن قوناق ءۇيىنىڭ ادرەسى مەن وعان اقشانىڭ اۋدارىلعانىن كورسەتىپتى.

سونىمەن قىز اتتاندى. اتتانار الدىندا پتسر تەست تاپسىردى. ەرىپ بارىپ اكەسى – ءبىز دە تاپسىرا سالدىق. اۋرۋدان امان ەكەنبىز. تەست تاپسىرعان جەردە قىزىمىز 10 مىڭ تەڭگە تولەگەن. بىزگە زەينەتكەر بولعاندىقتان 9 مىڭ تەڭگە تولەتتى. «ون پايىز ۇكىمەتتىڭ جەڭىلدىگى مە؟» دەپ سۇراپ ەدىك. «جوق، ءوز كومپانيامىزدىڭ باسشىلىعىنىڭ شەشىمى عوي» دەي سالدى.

ءارى قاراي قىزىمىز وسلونىڭ اۋەجايىندا جانە قوناق ۇيدە تاعى ەكى پتسر تەست تاپسىرعان ەكەن. ەكەۋى دە تەگىن.

سالىستىرىپ كورىڭىز. ەگەر ءبىزدىڭ ۇكىمەت نورۆەگ ۇكىمەتى سياقتى بولسا، وندا ونى جامانداعاندارمەن ءتىلىمىز جەتكەنشە سالعىلاسىپ، وعان وق كەزەلسە كەۋدەمىزدى توسىپ قورعار ەدىك. كۇن سايىن ءبىر ۋىس العىس جولدار ەدىك.

وكىنىشتىسى – جاعداي كەرىسىنشە. بەيبىت زاماندا ەكى جىل سايىن ءوز قالاسى مەن اۋىلدارىنا سنارياد جاۋعىزىپ، اسكەرى مەن قۇتقارۋشىلارىن سوعىسسىز-اق قازا ەتىپ، جەرگىلىكتى تۇرعىنداردى ۋاقىتشا بولسىن بوسقىنعا اينالدىرىپ وتىرعان ۇكىمەتتى قورعاماق تۇگىل، الدا-جالدا ەرىكتى-ەرىكسىز كەتىپ جاتسا، «سوڭدارىڭنان ءبىر ۋىس توپىراق» دەيمىز-اۋ.

قاينار ولجايدىڭ جازباسى

Abai.kz