مۇعالىمدى ۇستازعا، وقۋشىنى شاكىرتكە اينالدىرۋ - ءبىلىم سالاسىن رەتتەۋدىڭ توتە جولى!

ويىمدى دۇرىس تۇسىنۋلەرىڭىز ءۇشىن:
مۇعالىم - بالا وقىتۋشى، ءبىلىم بەرۋشى.
(تەك، ساباق بەرۋشى. الدىنا كەلگەن ەلدىڭ بالاسىن وزگەنىڭ بالاسى دەپ قاراپ، ولاردىڭ ءبىلىمدى بولعاندارى مەن بولماعاندارىنىڭ وزىنە ەشقانداي پايدا-زيانى جوق دەپ تۇسىنەدى. بەرىلگەن ساعاتىندا وقۋشىلارعا پروگرامما بويىنشا ساباعىن ءوتۋ، ايلىعىن الۋ. باسقاسىندا شارۋاسى جوق. ەشكىمنىڭ وعان دا قويار كىناسى جوق)

ۇستاز - ءبىلىم بەرۋشى، شاكىرت تاربيەلەۋشى.
(الدىنا كەلگەن ەلدىڭ بالاسىن شاكىرتىم، ورنىمدى باسۋشى، بولاشاق ەل مەن ۇلتقا قىزمەت ەتۋشى ازاماتتار دەپ قابىلداپ، ولاردى ۇلكەن ومىرگە بەيىمدەۋ مەن ءبىلىم بەرۋدى ءوزىنىڭ مىندەتىم دەپ سەزىنەتىن ادام. بەرىلگەن ساعاتىندا بىلىممەن قاتار تاربيە دە بەرۋدى ءوزىنىڭ "جازىلماعان مىندەتى" ەتىپ العان. سوندىقتان، كەي كەزدەرى شاكىرتتەرىن تاربيەلەۋدىڭ "قاتقىلداۋ مەتوديكاسىن" دا قولدانۋى مۇمكىن. ول "مەتوديكاسى" بىرەۋلەرگە جاعىپ، بىرەۋلەرگە جاقپاۋى مۇمكىن. ءبىلىم بەرۋدى ءوزىنىڭ كاسىبى رەتىندە ەمەس، ومىرلىك ۇستانىمى دەپ قارايدى.)

وقۋشى - مۇعالىمدى ءوز ءپانى بويىنشا وزىنە ءدارىس بەرۋشى، كەلەسى ساباققا تاپسىرما بەرىپ ءبىلىمىن باعالاۋشى دەپ قانا تۇسىنەتىن، مەكتەپتەن تىس ۋاقىتتا مۇعالىمدى وزگە قىزمەت تۇرلەرىمەن اينالىساتىن كاسىپ يەلەرىمەن(قۇرىلىسشى، ساتۋشى ت.ب.) بىردەي كورەتىن ءدارىس الۋشى.

شاكىرت - مۇعالىمدى ءوزىن ومىرگە بەيىمدەۋشى ۇستازىم دەپ قابىلداپ، ءتىپتى اتا-اناسىمەن بىردەي قۇرمەتتەيتىن، تاپسىرماسىن ۇستازىنا دەگەن قۇرمەتىنەن(ۇيالعاننان) بارلىق ىنتاسىمەن ءدارىس الۋشى.

مەنىڭ بەرگەن انىقتامام ارقىلى اۋەگى(تاقىرىپتاعى) ويىمدى تۇسىنگەن بولساڭىزدار، بارىڭىزگە ارنالعان ەكى سۇراعىم بار.
1-ءشى سۇراق اتا-انالارعا:
ءسىز مەكتەپكە ءدارىس الۋعا وقۋشىنى اكەلدىڭىز بە؟
الدە، شاكىرت اكەلدىڭىز بە؟

2-ءشى سۇراق ءدارىس بەرۋشىلەرگە:
ءسىز مۇعالىمسىز بە؟
الدە، ۇستازسىز با؟

ءبىلىم سالاسىنىڭ باسشىلىعىن وسى ماسەلە كوبىرەك تولعاندىرۋ كەرەك دەپ ويلايمىن. ويتكەنى، سوڭعى كەزدەرى مۇعالىمدەر مەن وقۋشىلار اراسىنداعى قاتىناس شيەلەنىسىپ بارا جاتقانى قاتتى تولعاندىرادى.
مۇعالىم مەن وقۋشىنىڭ اراسىنداعى قاتىناستى رەتتەمەي تۇرىپ، ساپالى ءبىلىم مەن ۇلكەن ومىرگە بەيىمدەۋ جايلى ءسوز قوزعاۋدىڭ ءوزى ارتىق سەكىلدى.

رۇستەم اشەتاەۆ

Abai.kz