دۇيسەنبى, 18 قازان 2021
بيلىك 1129 0 پىكىر 14 قىركۇيەك, 2021 ساعات 20:46

ماڭعىستاۋلىق شارۋا قوجالىقتارىنا قارجىلاي قولداۋ كورسەتىلدى

ماڭعىستاۋ وبلىسىندا 600 ءىرى شارۋا قوجالىعى مەن 6 مىڭعا جۋىق جەكە ءۇي قوجالىقتارىنا قارجىلاي قولداۋ كورسەتىلدى، - دەپ حابارلايدى Abai.kz اقپاراتتىق پورتالى.

بۇل تۋرالى قوعامدىق كوممۋنيكاتسيا ورتالىعىندا وتكەن بريفينگىدە ماڭعىستاۋ وبلىسى اۋىل شارۋاشىلىعى باسقارماسىنىڭ باسشىسى سەرىك قالدىعۇل ءمالىم ەتتى.

بيىل ماڭعىستاۋ وبلىسىندا قۋاڭشىلىقتان زارداپ شەككەن شارۋالارعا قارجىلاي قولداۋ كورسەتۋ ءۇشىن ۇكىمەت رەزەرۆىنەن 1,9 ملرد. تەڭگە ءبولىندى. قايتارىمسىز قاراجات ءتورت تۇلىكتىڭ انالىق باسى ءۇشىن مال ازىعىنا جۇمسالعان شىعىنداردى ءىشىنارا وتەۋگە بەرىلۋدە.

قازىرگى تاڭدا بولىنگەن قاراجاتتىڭ 57% يگەرىلدى ياعني، 5900 جەكە قوسالقى ءۇي شارۋا قوجالىقتارىنا 745 ملن. تەڭگە جانە 575 شارۋا قوجالىعىنا 395 ملن. تەڭگە قارجىلاي مەملەكەتتىك قولداۋ كورسەتىلدى.

قازىرگى ۋاقىتتا شارۋالاردى جەم-شوپپەن قامتاماسىز ەتىپ، مال ازىعى تاپشىلىعىن جويۋ ماقساتىندا بىرقاتار جۇمىستار جۇرگىزىلىپ جاتىر.

  1. جەرگىلىكتى بيۋدجەتتەن 150 ملن.تەڭگە ءبولىنىپ، «كاسپي» اكك اق-ى ارقىلى اتالعان قايتارىمدى قارجىعا 15 شىلدەدەن بەرى ءار قالا، اۋدانداردان تاعايىندالعان وپەراتورلار قاجەتتىلىككە قاراي ءشوپ تاسىمالداپ جاتىر. بۇگىنگى كۇنگە دەيىن 1350 توننا ءشوپ ساتىپ الىندى. بۇل جۇمىستار جىل اياعىنا دەيىن جالعاسادى.
  2. جەرگىلىكتى بيۋدجەتتەن 54 ملن تەڭگە ءبولىنىپ، قايتارىمدى قاراجاتقا اۋدانداردان تاعايىندالعان وپەراتورلار قوستاناي وبلىسىنان 950 توننا ارپا جەتكىزدى. قازىرگى تاڭدا ارپا تۇگەل ساتىلىپ، اينالىمداعى قارجىعا قوسىمشا 1 مىڭ توننا مال ازىعىن ساتىپ الۋ جۇمىستارى جۇرۋدە.
  3. سونىمەن قاتار 107 ملن تەڭگەگە 15 ۆاگون 3-4 سورتتى بيداي (بيداي قالدىعى) ساتىپ الىندى، جاقىن كۇندەرى وڭىرگە جەتكىزىلەدى.

جالپى جىل باسىنان بەرى وبلىسقا 41 500 توننا ءشوپ تاسىمالداندى.   سونىڭ 3500 تونناسى وزگە وڭىرلەردەن كومەك رەتىندە جەتكىزىلىپ، قۋاڭشىلىقتان زارداپ شەككەن مال يەلەرىنە تەگىن ۇلەستىرىلدى. ال، وڭىرگە تاسىمالدانعان جەم كولەمى 24 مىڭ توننانى قۇرادى.

سپيكەرلەر اۋىلشارۋاشىلىعى جانۋارلارىن بىردەيلەندىرۋ بازاسىنا تىركەلمەگەن مالعا مەملەكەت تاراپىنان سۋبسيديا نەمەسە قولداۋ كورسەتىلمەيتىنىن ايتتى.

قازىر وڭىردە 636 824 باس مال تىركەلگەن. ونىڭ ىشىندە ولگەنى 1163 (جالپى سانىنىڭ 0,18%). ولگەن مالدىڭ 194-ءى عانا اۋىلشارۋاشىلىعى جانۋارلارىن بىردەيلەندىرۋ دەرەكقورىنا تىركەلگەن.

توتەنشە جاعدايلار دەپارتامەنتى اۋا ىلعالدىلىعىنا تەكسەرۋ جۇرگىزدى. ناتيجەسى توتەنشە جاعداي جاريالاۋ شارتتارىنا سايكەس كەلگەن جوق. سونداي-اق، جانۋارلار اراسىندا ۋلانۋ مەن جۇقپالى اۋرۋعا شالدىعۋ دەرەگى تىركەلمەدى جانە وسىمدىكتەر زيانكەستەردەن زاقىمدانباعان، ياعني توتەنشە جاعداي جاريالاۋعا زاڭدى نەگىز جوق. قازىر وڭىردە قىسقى مال ازىعىنىڭ قورىن دايىنداۋ قىزۋ جۇرۋدە.

2021 - 2022 جىلدارعا وڭىردەگى ءتورت تۇلىكتى قىستىق مال ازىعىمەن قامتاماسىز ەتۋ ماقساتىندا، قر پرەمەر-ءمينيسترى ا.ءماميننىڭ تاپسىرماسىنا سايكەس، بيۋدجەتتەن قايتارىمدى قاراجات رەتىندە مال ازىعىنا 5,3 ملرد. تەڭگە قارجى ءبولىندى. (1,9 ملرد. تەڭگە – ءشوپ، 3,4 ملرد. تەڭگە – جەم). بۇل قارجىعا جىل سوڭىنا دەيىن 26 مىڭ توننا ءشوپ پەن 34 مىڭ توننا جەم ساتىپ الىنادى دەپ جوسپارلانۋدا.

قازىر اتالعان قارجىنىڭ 600 ملن تەڭگەسىنە مال ازىعىن تاسىمالدايتىن وپەراتورلار تاعايىندالىپ، وزگە وڭىرلەردەن ءشوپ تاسىمالداۋ جۇمىستارى باستالىپ كەتتى.

بۇدان بولەك اتىراۋ مەن اقتوبە وبلىستارىنىڭ شابىندىق جەرلەرىنەن ءشوپ شابۋعا 5 شارۋا قوجالىعى اتتاندى. ولار وزدەرىنە قور جيناپ، ارتىعىن وزگە مال يەلەرىنە ساتادى.

سونىمەن قاتار بۇگىنگى كۇنى جەرگىلىكتى شابىندىقتا 14 بريگادا ءشوپ شاۋىپ جاتىر. ولار جىل اياعىنا دەيىن 15 مىڭ توننا ءشوپ دايىنداماق.

Abai.kz

0 پىكىر