رەسەي پرەزيدەنتى ۆلاديمير پۋتين كارانتيندىك شەكتەۋلەرگە كەتتى. بۇل تۋرالى ول 14 قىركۇيەكتە مالىمدەگەن بولاتىن. بۇعان دەيىن ول ءبىر كۇن بويى COVID-19 ينفەكتسياسىن جۇقتىرعان اداممەن سويلەسكەنىن ايتقان ەدى. مەملەكەت باسشىسى بۇل تۋرالى ۇكىمەتپەن جانە «ەدينايا روسسيا» پارتياسىنىڭ باسشىلىعىمەن كەزدەسۋدە ايتىپ قالعان بولاتىن. 

«ءبىر كۇن بۇرىن مەن ونىمەن (COVID-19 بار اداممەن) كۇنى بويى، وتە جاقىن قاشىقتىقتا سويلەستىم», - دەدى ول. ءپۋتيننىڭ ايتۋىنشا، ونىڭ اينالاسىندا كوروناۆيرۋس جۇقتىرعان بىرنەشە ادام بار. «بۇل قىزمەتكەرلەردىڭ ءبىرى - مەنىمەن جاقىن جەردە جۇمىس ىستەيتىن ادام. وعان ەكپە ەگىلدى», - دەدى پۋتين.

پۋتين ول ادام ەكپە السا دا، وندا انتيدەنەنىڭ كولەمى از بولۋى مۇمكىن ەكەنىن ايتقان بولاتىن. «ول قايتا ۆاكتسيناتسيالاندى، بىراق شاماسى كەشتەۋ سياقتى»، - دەدى پۋتين.

13 قىركۇيەكتە پۋتين ءوز ورتاسىندا COVID-19 اۋرۋىمەن بايلانىستى پروبلەمالار بار ەكەنىن حابارلادى. ول كارانتينگە جاتقىزىلاتىنىن جوققا شىعارمادى. «ءتىپتى مەنىڭ ورتامدا دا وسى COVID-پەن پروبلەمالار تۋىندايدى. ءبىز وندا شىنىمەن نە بولىپ جاتقانىن انىقتاۋىمىز كەرەك. مەنىڭ ويىمشا، مەن جاقىندا كارانتينگە كەتۋىم كەرەك. اينالامدا كوپتەگەن ادامدار اۋىرىپ جاتىر»، - دەدى رەسەي پرەزيدەنتى كرەملدە پاراليمپياداشىلارمەن كەزدەسۋىندە.

كەيىنىرەك پرەزيدەنتتىڭ ءباسپاسوز حاتشىسى دميتري پەسكوۆ ءپۋتيننىڭ اينالاسىندا COVID-19 اۋرۋىنىڭ كوبەيۋىنە بايلانىستى كارانتين بولۋى مۇمكىن ەكەنىن ايتۋى تەك مىسالدىق سيپاتتا ەكەنىن جەتكىزگەن بولاتىن. 14 قىركۇيەك كۇنى تۇستەن كەيىن كرەمل «ءپۋتيننىڭ جانىنداعى ادامداردا كوروناۆيرۋستىق ينفەكتسيانىڭ بولۋىنا بايلانىستى وقشاۋلاۋ رەجيمىن ساقتاۋعا ءماجبۇر بولادى»، - دەپ حابارلادى. پەسكوۆ پۋتين ءوز ورتاسىنان COVID-19 پاتسيەنتتەرىن تاپقاننان كەيىن سىناقتان وتكەنىن ايتتى. ونىڭ ايتۋىنشا، ءبىراز ۋاقىتقا دەيىن پرەزيدەنت بەتپە-بەت ءىس-شارالارعا قاتىسپايدى، بىراق وقشاۋلانۋ جالپى مەملەكەتتى باسقارۋ جۇمىستارىنا كەرى اسەرىن تيگىزبەيدى.

كرەمل پۋتين كوروناۆيرۋسقا قارسى ۆاكتسينانىڭ ءبىرىنشى كومپونەنتىن 23 ناۋرىزدا، ەكىنشىسىن 14 ساۋىردە الدى دەگەن بولاتىن. كرەملدە قولدانىلاتىن سانيتارلىق قاۋىپسىزدىك شارالارى تۋرالى بىرنەشە رەت ءپۋتيننىڭ جانىنداعى جاندار ايتقان ەدى. COVID-19 قاۋپىنە بايلانىستى كرەملدە جانە پرەزيدەنتتىڭ نوۆو-وگاريوۆو رەزيدەنتسياسىندا دەزينفەكتسيا تۋننەلدەرى ورناتىلعانىن دا جازدى. كرەمل سونىمەن قاتار پۋتينمەن كەزدەسكەنگە دەيىن كارانتيندى ساقتاۋ جانە ساقتىق شاراسى رەتىندە كوروناۆيرۋستىق سىناقتاردى الۋ قاجەتتىلىگى تۋرالى حابارلاعانى دا ەسىمىزدە. الايدا اتالمىش شارالارعا قاراماستان ءپۋتيننىڭ جانىنداعى ازاماتتاردان ۆيرۋستىڭ شىعۋى رەسەيلىك ۆاكتسينالاردىڭ تيىمدىلىگىنە دەگەن كوزقاراستى ازايتا تۇسپەك.

ارگەنتينا پرەزيدەنتى البەرتو فەرناندەس ءساۋىر ايىندا ۆيرۋس جۇقتىرعان بولاتىن. وعان «سپۋتنيك V» ۆاكتسيناسى اقپان ايىندا ەگىلگەن ەدى. ۆيرۋسقا قارسى دەنە قالىپتاسۋعا ءتورت اي ۋاقىت كەتسە دە، ارگەنتينا باسشىسى ۆيرۋس جۇقتىرعان اداممەن العاشقى كەزدەسۋدە-اق ۆيرۋستى جۇقتىرىپ العانى انىقتالدى. ارگەنتينا رەسەيلىك ۆاكتسينانى بارىنشا قولدانىپ جاتقان ەلدىڭ ءبىرى سانالادى.

قازاقستاندا دا ۆاكتسينا العاننان كەيىن، ۆيرۋس جۇقتىرىپ العاندار سانى جەتەرلىك. 7 قىركۇيەكتە ولاردىڭ سانى شاشامەن 20 مىڭ ادام دەپ كەلتىرەدى. «ءبىرىنشى كومپونەنتتەن كەيىنگى ۆيرۋس جۇقتىرۋ دەڭگەيى 7070 ادام اراسىندا تىركەلدى، ونىڭ ىشىندە Sputnik V-مەن 6108 ۆاكتسيناتسيالانعان. QazCovid-تەن كەيىن 172707 ۆاكتسيناتسيادان 172 ادام اۋىرىپ قالدى، 529346 ادام Hayat-Vax ۆاكتسيناسىمەن ەگىلدى، ونىڭ 553-ءى اۋىرىپ قالدى. CoronaVac-تان كەيىن ۆاكتسيناتسيالانعان 249373 ادامنىڭ 218-ءى ۆيرۋس جۇقتىردى»، - دەگەن ەدى مينيسترلىك وكىلدەرى ارنايى بريفينگتە. ياعني كورىپ تۇرعانىمىزداي ۆيرۋس جۇقتىرعانداردىڭ باسىم بولىگى رەسەيلىك «سپۋتنيك V» ۆاكتسيناسىن قابىلداعاندار بولاتىن. ارينە ونى رەسەيلىك ۆاكتسينانى الۋشىلاردىڭ سانى تىم كوپ بولۋىمەن دە تۇسىندىرۋگە بولاتىن شىعار، 5.5 ملن ادام «سپۋتنيك V» قابىلداعان بولاتىن.

عالىمدار اراسىندا رەسەيلىك سپۋتنيك ۆاكتسيناسىنا قاتىستى ەكىۇشتى پىكىرلەر بار. ونىڭ باسىم بولىگى رەسەيلىك ۆاكتسينا گەنگە اسەر ەتۋى مۇمكىن دەگەن جورامالدى قۋاتتايدى.

Abai.kz