79 جاسقا قاراعان شاعىندا كورنەكتى اقىن، جازۋشى، قازاقستان جازۋشىلار وداعىنىڭ مۇشەسى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، شەشەنستان مەملەكەتتىك سىيلىعىنىڭ لاۋرەاتى رافاەل نيازبەكوۆ دۇنيەدەن وزدى. بۇل تۋرالى قر جازۋشىلار وداعى مالىمدەدى.

رافاەل نيازبەكوۆ 1943 جىلى 24 ناۋرىزدا جامبىل وبلىسى، تالاس اۋدانىنىڭ قازىرگى تامابەك اۋىلىندا دۇنيەگە كەلگەن.

1978 جىلى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىن تامامداعان. قازاق راديوسىنىڭ ادەبيەت رەداكتسياسىندا، «جۇلدىز» جۋرنالىندا، «جازۋشى» باسپاسىندا قىزمەت اتقارعان.

ونىڭ ءار جىلدارى «كەلەر كۇندەر»، «قاراتاۋ مەن الاتاۋ»، «جالىن كەشكەن»، «جەر جانارى»، «وركەن»، «تەمىرقازىق»، «بيىكتەي بەر، تاۋلارىم!»، «بايتەرەكتەر جەل وتىندە تۇرادى»، «تىڭدا مەنى، زامانا!»، «شەشەندەر»، «تامۇق وتىنا جانباعان»، «جۇرەگىمدە – عاسىرلاردىڭ سالماعى»، «ماحامبەت مايدانى»، «ايبوزىم مەنىڭ»، «كۇركىرەپ وتكەن كۇندەرىم»، «قۇلاگەردىڭ قۇلىنى»، «ارمىسىڭ، ارۋ دۇنيە!»، «ءبىز وسىنداي ەلمىز» (تۇرىك تىلىندە) سىندى كوپتەگەن جىر جيناقتارى، «قىزىل ءۇي»، «تاس قۇداي»، «تاۋقىمەت» روماندارى جانە «وتاعاسى»، «قىزعىش قۇس»، «قاڭتار»، «حوزياين وچاگا» (ورىس تىلىندە) پوۆەستەرى، شىعارمالار جيناعىنىڭ 9 تومدىعى جارىق كورگەن. د.ا.قوناەۆ تۋرالى ولەڭ-رومان جازعان.

شىعارمالارى ورىس، ۋكراين، شەشەن، تۇرىك تىلدەرىنە اۋدارىلعان.

م.رۋميانتسەۆانىڭ، ا.چەپۋروۆتىڭ، ق.قۇليەۆتىڭ، د.كۋگيلتينوۆتىڭ، ك.تۋيورسكيدىڭ جانە باسقا دا اقىنداردىڭ ولەڭدەرىن تارجىمالاعان.

ول حالىقارالىق «الاش» ادەبي سىيلىعىنىڭ، «ەرەن ەڭبەگى ءۇشىن» جانە رەسەي جازۋشىلار وداعىنىڭ سەرگەي ەسەنين التىن مەدالدارىنىڭ، د.قوناەۆ وردەنىنىڭ يەگەرى. د.ا.قوناەۆ اتىنداعى ۋنيۆەرسيتەتتىڭ قۇرمەتتى پروفەسسورى. «شەشەندەر» جيناعى ءۇشىن اۆتورعا شەشەن رەسپۋبليكاسىنىڭ ەڭ جوعارى مەملەكەتتىك «ۇلت نامىسى» وردەنى بەرىلىپ، مەملەكەتتىك سىيلىعى قوسا تاپسىرىلعان.

قازاق رۋحانياتىندا وشپەس ءىز، ولمەس مۇرا قالدىرعان قالامگەردىڭ جارقىن بەينەسى ماڭگى جادىمىزدا ساقتالادى.

Abai.kz