قازاقستاننىڭ تۇڭعىش پرەزيدەنتى، ەلباسى نۇرسۇلتان ءابىشۇلى نازارباەۆ تۇركىستان قالاسىندا ءوتىپ جاتقان تۇركىتىلدەس مەملەكەتتەردىڭ پارلامەنتتىك اسسامبلەياسىنىڭ (تۇركپا) مەرەيتويلىق X پلەنارلىق وتىرىسىنىڭ قاتىسۋشىلارىنا قۇتتىقتاۋ حات جولدادى.

قۇتتىقتاۋ حاتتى جينالعاندار الدىندا ءماجىلىس توراعاسى نۇرلان نىعماتۋلين وقىپ بەردى. ءوز قۇتتىقتاۋىندا ەلباسى بۇگىنگى مەرەيتويلىق باسقوسۋ قازاق حالقىنىڭ كيەلى بەسىگى مەن بويتۇمارى، تۇركى الەمىنىڭ رۋحاني استاناسى، بابالارىمىزدان قالعان كونە شاھار - قاسيەتتى تۇركىستاندا ءوتىپ وتىرعانىنا قۋانىشتى ەكەنىن ايتتى.

- ءبىز جاڭا تاۋەلسىز مەملەكەتتەر ءوز تاريحىنىڭ باستاپقى كۇندەرىنەن-اق ءتۇبىرى ورتاق ءتىل، مادەنيەت پەن سالت-داستۇرگە نەگىزدەلەتىن، سونداي-اق بارلىق باۋىرلاس ەلدەرگە دانەكەر بولاتىن ەرەكشە بايلانىستىڭ بار ەكەنىن انىق تۇسىندىك. دەگەنمەن، الدىمىزدا جاڭا ماڭىزدى ماقسات-مۇراتتار تۇر.

ولاردىڭ بارلىعىنا دا قول جەتكىزەتىنىمىزگە سەنىمدىمىن. بۇل رەتتە، تۇركىلەردىڭ كەڭ بايتاق دالاسىندا ءوزارا ىقپالداستىقتى دامىتۋ ءۇشىن ءاردايىم ەرىك-جىگەر مەن باتىلدىق تانىتىپ وتىرۋىمىز قاجەت. تۇركىتىلدەس مەملەكەتتەردىڭ پارلامەنتشىلەرى وسى ءبىر كۇردەلى ىسكە ءوزىنىڭ ەلەۋلى ۇلەسىن قوساتىنىنا كامىل سەنەمىن. جالپى تۇركىتىلدەس ەلدەر پارلامەنتتىك اسسامبلەياسىنىڭ مەرەيتويلىق پلەنارلىق وتىرىسى حالىقتارىمىزدىڭ ءوزارا دوستىعى مەن ارەكەتتەستىگىن ودان ءارى نىعايتۋعا قوسىمشا سەرپىن بەرەدى دەپ ويلايمىن، - دەلىنگەن قۇتتىقتاۋ حاتتا.

سونداي-اق، قازاقستاننىڭ تۇڭعىش پرەزيدەنتى ن.ءا.نازارباەۆ تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ قۇرمەتتى توراعاسى رەتىندە قولداۋ كورسەتىپ، قولعابىس جاساۋعا ارقاشان ءازىر ەكەنىن اتاپ ءوتتى.
سوڭىندا ەلباسى جيىنعا قاتىسۋشىلاردىڭ بارىنە ساتتىلىك پەن بار جاقسىلىقتى تىلەدى.

Abai.kz