دۇنيەجۇزىلىك ەحرو-2020 DUBAI كورمەسىندە قازاقستاننىڭ ۇلتتىق پاۆيلونى ءوز جۇمىسىن باستادى.

ونىڭ اشىلۋ راسىمىنە قازاقستاننىڭ بىرىككەن اراب امىرلىكتەرىندەگى توتەنشە جانە وكىلەتتى ەلشىسى ماديار مەڭىلبەكوۆ، QazExpoCongress ۇلتتىق كومپانياسىنىڭ باسقارما توراعاسى، ەحرو-2020 كورمەسىندەگى قازاقستان سەكتسياسىنىڭ باس كوميسسارى اللەن ءشايجۇنىسوۆ، حالىقارالىق كورمەلەر بيۋروسىنىڭ پرەزيدەنتى دجاي-چۋل چوي، كورمەگە قاتىسۋشى ەلدەردىڭ باس كوميسسارلارى مەن ەحرو-2020 ۇيىمداستىرۋ كوميتەتىنىڭ باسشىلىعى قاتىستى.

اشىلۋ سالتاناتىنا دەيىن پاۆيلوندى العاش بولىپ بىرىككەن اراب امىرلىكتەرىنىڭ ۆيتسە-پرەزيدەنتى، پرەمەر-ءمينيسترى، دۋباي بيلەۋشىسى شەيح مۇحاممەد بەن راشيد ءال ماكتۋم ارالاپ كوردى.

ماديار مەڭىلبەكوۆتىڭ ايتۋىنشا، ۇلتتىق پاۆيلوندا قازاقستاننىڭ ينۆەستيتسيالىق، تۋريستىك الەۋەتى، ساياسي-ەكونوميكالىق جەتىستىكتەرى پاش ەتىلگەن. 2017 جىلى مامانداندىرىلعان ەحرو-2017 كورمەسىن ۇيىمداستىرعان نۇر-سۇلتان قالاسىنىڭ دا دامۋ مۇمكىندىكتەرى كوپشىلىك نازارىنا ۇسىنىلعان.

قازاقستان پاۆيلونى شىعىس ساۋلەتىمەن ورنەكتەلگەن. مۇنى زاماناۋي تسيفرلىق شەشىمدەر مەن ءداستۇردىڭ سينتەزى دەسە دە بولادى. پاۆيلون جەڭىل كونسترۋكتسيادان جاسالعان. ىرگەلەس اۋماعى ىستىق كليماتتىق جاعدايعا بايلانىستى كولەڭكەلى قۇرىلىمدارمەن، قۇرعاق سۋبۇرقاقتارمەن بەزەندىرىلگەن. پاۆيلوننىڭ كىرەبەرىسىن اباتتاندىرۋدا قازاقستاننىڭ مادەني مۇراسىنا جاتاتىن پەتروگليفتەر، گەوگليفتەر، سكيف-ساق مادەنيەتىنىڭ ەلەمەنتتەرى پايدالانىلعان. پاۆيلون الدىنداعى ارنايى جابدىقتالعان اشىق الاڭدا كەلۋشىلەر ەتنيكالىق مۋزىكالىق ۇجىمداردىڭ ونەرىن تاماشالاي الادى.

اللەن ءشايجۇنىسوۆتىڭ ايتۋىنشا، كورمە اياقتالعانشا قازاقستان پاۆيلونىن 1 ملن-عا جۋىق ادام تاماشالايدى دەپ كۇتىلۋدە.

پاۆيلوننىڭ كىرە بەرىسىندە قازاقستاننىڭ «شەجىرە» اعاشى بەينەلەنگەن. ءتۇرلى ەتنوستاردىڭ تاريحي بايلانىسى مەن ۇلى دالا كوشپەندىلەرىنىڭ الەم حالقىنىڭ گەنەتيكاسىنا قوسقان ۇلەسى تۋرالى باياندالادى. سونىمەن قاتار ءبىرىنشى قاباتتا ەلىمىزدىڭ تۋريستىك الەۋەتى پاش ەتىلگەن. وندا قازاق جەرىنىڭ كوركەم لاندشافتتارى مەن تابيعي رەسۋرستارى، باي تاريحى، مادەنيەتى مەن ءداستۇرى كورسەتىلگەن.

«ەلوردا – ەۋرازيا جۇرەگى» ايماعىندا ايبىندى استانانىڭ تاماشا پانوراماسىمەن تانىسۋعا مۇمكىندىك بار.

Future Now ايماعى قوناقتاردىڭ قىزىعۋشىلىعىن تۋدىرۋدا. مۇندا Brixel Mirror كينەتيكالىق ارت-قوندىرعىسى ۇسىنىلعان. بۇل تسيفرلىق ديسپلەي سەكىلدى جۇمىس ىستەيتىن باعدارلامالانعان قوزعالمالى مودۋلدىك بلوكتار. اتالعان ايماقتا ءتۇرلى ينتەراكتيۆتى ەلەمەنتتەر ارقىلى بىرقاتار سالالاردى قامتيتىن Vision Machine ينستاللياتسياسى ورنالاسقان. مۇندا يننوۆاتسيالىق قالا قۇرىلىسى، جاساندى ينتەللەكت، بولاشاقتىڭ كاسىپتەرى، تۇراقتى اگروونەركاسىپ، قورشاعان ورتانى قورعاۋ، اەروعارىش ونەركاسىبى سەكىلدى باعىتتارداعى قازاقستاننىڭ الەۋەتىمەن تانىسۋعا بولادى.

سونىمەن قاتار پاۆيلوندا ەلدىڭ ينۆەستيتسيالىق، ونەركاسىپتىك، كولىك-لوگيستيكالىق جانە اگرارلىق الەۋەتى كوپشىلىك نازارىنا ۇسىنىلعان.

سوڭىندا كەلۋشىلەردى پانورامالىق كينوتەاترداعى ەرەكشە شوۋ كۇتەدى. شوۋدىڭ سيۋجەتتىك جەلىسى ادام مەن جاساندى ينتەللەكتىڭ ءوزارا ارەكەتتەسۋىن كورسەتەدى. اتالعان ايماق كورمەنىڭ «اقىل-ويدى بىرىكتىرە وتىرىپ، بولاشاقتى قالىپتاستىرۋ» اتتى باستى تاقىرىبىمەن ۇندەسىپ تۇر.

بۇكىلالەمدىك EXPO-2020 Dubai كورمەسى اياسىندا قازاقستاننىڭ ۇلتتىق پاۆيلونى الاڭىندا ءبىزدىڭ ەلدىڭ رەسمي تۇلعالارىنىڭ، سونداي-اق مەملەكەتتىك ورگانداردىڭ، كۆازيمەملەكەتتىك جانە جەكە سەكتورلار وكىلدەرىنىڭ قاتىسۋىمەن 25 ىسكەرلىك ءىس-شارا وتكىزۋ جوسپارلانعان. ىسكەرلىك ءىس-شارالار شەڭبەرىندە كونفەرەنتسيالار، فورۋمدار، B2B كەزدەسۋلەر وتكىزىلەدى. ونىڭ ىشىندە ەلدىڭ ينۆەستيتسيالىق جانە تۋريستىك الەۋەتى بويىنشا تانىستىرىلىمدار، عىلىمي جانە ءبىلىم بەرۋ جوبالارى، كرەاتيۆتى شەشىمدەر، سونداي-اق قازاقستاننىڭ الەۋەتتى جوبالارى مەن قازىرگى زامانعى ازىرلەمەلەرى ۇسىنىلادى. اتالعان ءىس-شارالاردىڭ قورىتىندىسى بويىنشا ىنتىماقتاستىق تۋرالى شارتتار مەن كەلىسىمدەرگە قول قويىلادى. ءوز كەزەگىندە مۇنىڭ ەل ەكونوميكاسىن دامىتۋداعى مۋلتيپليكاتيۆتىك اسەرى زور بولماق.

قازاقستاننىڭ ۇلتتىق پاۆيلونى «مۇمكىندىكتەر» سالالىق كلاستەرىندە ورىن تەپكەن. ول بىرىككەن اراب امىرلىكتەرى، اقش، شۆەيتساريا، ليۋكسەمبۋرگ، قىتاي حالىق رەسپۋبليكاسى، يتاليا جانە بەلارۋس مەملەكەتتەرىنىڭ ۇلتتىق پاۆيلونىنا جاقىن ورنالاسقان.

ەسكە سالا كەتەيىك، EXPO-2020 DUBAI كورمەسى 2021 جىلدىڭ 1 قازانى مەن 2022 جىلدىڭ 31 ناۋرىزى ارالىعىندا وتەدى. اۋقىمدى شارا بىلتىر ءوتۋى كەرەك ەدى. الايدا كوروناۆيرۋس پاندەمياسىنا بايلانىستى ونىڭ مەرزىمى شەگەرىلدى. تاڭدالعان تاقىرىپ – «اقىل-ويدى بىرىكتىرە وتىرىپ، بولاشاقتى قالىپتاستىرۋ». ەحرو-2020 ءۇش سالالىق تاقىرىپقا بولىنگەن – «مۇمكىندىكتەر»، «موبيلدىلىك» جانە «تۇراقتى دامۋ». وعان الەمنىڭ 192 ەلى قاتىسۋدا. كورمەنى شامامەن 25 ملن ادام تاماشالايدى دەپ كۇتىلۋدە. ولاردىڭ 20 پايىزىن بيزنەس وكىلدەرى قۇراماق. 182 كۇنگە سوزىلاتىن شاراعا كەلۋشىلەردىڭ 70 پايىزى شەتەلدىك تۋريستەر بولماق. كورمەنىڭ جالپى اۋماعى 438 گەكتار جەردى الىپ جاتىر. ول دۋباي مەن ابۋ-دابي قالالارىنىڭ ارالىعىندا ورنالاسقان.

دۋباي، بىرىككەن اراب امىرلىكتەرى

Abai.kz