قاسىم-جومارت توقاەۆ ادام قۇقىقتارى جونىندەگى ەۋروپالىق وداقتىڭ ارناۋلى وكىلى يمون گيلمور مەن ورتالىق ازيا بويىنشا وكىلى تەري حاكالانى قابىلدادى.

كەزدەسۋ بارىسىندا قازاقستان مەن ەۋروپالىق وداق اراسىنداعى كەڭەيتىلگەن سەرىكتەستىك پەن ىنتىماقتاستىق اياسىنداعى ءوزارا ءىس-قيمىلداردىڭ قازىرگى جاعدايى مەن پەرسپەكتيۆالارى تالقىلانىپ، ايماقتىق قاۋىپسىزدىك ماسەلەلەرى قاراستىرىلدى.

مەملەكەت باسشىسى ەۋروپالىق وداق دەلەگاتسياسىنا ەلىمىزدەگى ساياسي جانە ەكونوميكالىق رەفورمالار، سونداي-اق اۋعانستانعا گۋمانيتارلىق كومەك كورسەتۋ جونىندە قابىلدانعان شارالار تۋرالى ايتتى.

يمون گيلمور قازاقستان مەن ەۋروپالىق وداق اراسىنداعى ساياسي جانە ساۋدا-ەكونوميكالىق ىنتىماقتاستىقتىڭ دەڭگەيىن جوعارى باعالاپ، سەرىكتەستىكتى ودان ءارى نىعايتۋ ماقساتىندا بايلانىستاردى جالعاستىرۋدىڭ ماڭىزدى ەكەنىن اتاپ ءوتتى.

ادام قۇقىقتارى جونىندەگى ەۋروپالىق وداقتىڭ ارناۋلى وكىلىنىڭ ايتۋىنشا، قازاقستان پرەزيدەنتىنىڭ بريۋسسەلگە الداعى ساپارى ەكىجاقتى بايلانىستاردى دامىتۋدا ماڭىزدى كەزەڭ بولادى.

ەۋروپالىق وداق دەلەگاتسياسى بۇۇ-نىڭ اۋعانستانعا جاردەم بەرۋ جونىندەگى ميسسياسىنىڭ ءوفيسىن الماتىعا ورنالاستىرۋ جانە اۋعان ستۋدەنتتەرىنە كومەك كورسەتۋ تۋرالى قاسىم-جومارت توقاەۆتىڭ شەشىمىن ەرەكشە اتاپ ءوتىپ، اۋعانستانداعى جاعدايدى تۇراقتاندىرۋعا قاتىستى قازاقستان پرەزيدەنتىنىڭ ايماقتاعى كوشباسشىلىعىن قولدادى.

يمون گيلمور مەن تەري حاكالا پرەزيدەنتكە ەرتەڭ الماتى قالاسىندا وتەتىن «ورتالىق ازيا – ەۋروپالىق وداق» ازاماتتىق فورۋمىنا بريۋسسەلدىڭ اتىنان قاتىساتىنىن جەتكىزدى.

Abai.kz