مەملەكەتتىك تىلگە دەگەن قوعامنىڭ سۇرانىسى ارتىپ كەلەدى. بۇل تۋرالى ورتالىق كوممۋنيكاتسيالار قىزمەتىندە «ۇلتتىق رۋحاني جاڭعىرۋ» ۇلتتىق جوباسىنىڭ ماقساتىن ءتۇسىندىرۋ كەزىندە قر اقپارات جانە قوعامدىق دامۋ ءمينيسترى ايدا بالاەۆا ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، ءبىرىنشى باعىت - ەلباسىنىڭ باعدارلامالىق ماقالاسىندا قامتىلعان يدەيالاردىڭ «رۋحاني جاڭعىرۋ» قۇندىلىقتارىن ارى قاراي ىلگەرىلەتۋ. وسى ورايدا مەملدەكەتتىك ءتىلدى دامىتۋ مىندەتى جەكەلەي بەلگىلەنگەن.

«جالپى، وسى بلوك بويىنشا 38 جوبا جوسپارلانعان. ولاردىڭ تۇپكى ماقساتى - ۇلتتىڭ شىعارماشىلىق ءارى زياتكەرلىك الەۋەتىن قولداۋ مەن دامىتۋ. بۇل باعىتتىڭ ەكىنشى ماڭىزدى مىندەتى – مەملەكەتتىك ءتىلدىڭ قولدانۋ اياسىن كەڭەيتۋ. ويتكەنى، «ۇلتتى ساقتاۋ» دەگەنىمىزدىڭ ءوزى – ءتىلدى ساقتاپ، دامىتۋ ەكەنى بەلگىلى. مەملەكەت باسشىسى قازاق ءتىلىنىڭ بولاشاقتا – ۇلتارالىق تىلگە اينالاتىنىنا سەنىم بىلدىرگەنىن بىلەسىزدەر. وعان بۇگىندە بارلىق نەگىز بار. مەملەكەتتىك تىلگە دەگەن قوعامنىڭ سۇرانىسى ارتىپ كەلەدى. بۇل – ۋاقىت تالابى»، - دەدى ا. بالاەۆا.

وسى ورايدا ول بۇل ماسەلەدە بىرقاتار اۋقىمدى جوبا قاراستىرىلىپ وتىرعانىن جەتكىزدى.

«اتاپ ايتقاندا، مەملەكەتتىك ءتىلدى وقىتۋ بويىنشا يننوۆاتسيالىق ءىت-ونىمدەر ازىرلەۋ، تانىمال انيماتسيالىق جانە تانىمدىق ارنالاردى قازاقشالاۋ، ورتا ءبىلىم بەرۋدىڭ تىلگە قاتىستى باعدارلامالارىنا وزگەرىستەر ەنگىزۋ، تەحنيكالىق جانە كاسىپتىك ءبىلىم بەرۋ ۇيىمدارى ءۇشىن قازاق تىلىندەگى وقۋلىقتار ازىرلەۋ سياقتى جۇيەلى ءىس-شارالار بار. ءبىر سوزبەن ايتقاندا، ماقساتىمىز – قوعامداعى قازاقتىلدى ورتانى بارىنشا كەيەيتۋ، ونى تۇرمىستا عانا ەمەس، عىلىم مەن ءبىلىمنىڭ، بيزنەس پەن الەۋمەتتىڭ تىلىنە اينالدىرۋ»، - دەدى مينيستر.

بۇدان بۇرىن حابارلانعانداي، ا.بالاەۆا «ۇلتتىق رۋحاني جاڭعىرۋ» ۇلتتىق جوباسىنىڭ نەگىزگى ماقساتىن ايتتى.

Abai.kz