2021 جىلدىڭ قىركۇيەگىندە ۇيالى ينتەرنەت جىلدامدىعى بويىنشە ەلدەر رەيتينگىندە قازاقستان 21 ساتىعا جوعارى كوتەرىلىپ، 80-ورىنعا جايعاستى. بۇل تۋرالى finprom.kz مالىمدەدى. 

جىل باسنىنا بەرى قازاقستاندا ينتەرنەت جىلدامدىعى 19,52-دان 31,74 مبيت/س دەيىن ۇلعايعان. وسىلايشا ءوسىم 62,6%-ءتى قۇرادى.

ورتالىق ازيا ەلدەرى ىشىندە قازاقستان ءموبيلدى ينتەرنەت جىلدامدىعى بويىنشا كوش باستاپ تۇر. ال بۇل رەيتينگتە قىرعىزستان – 103, وزبەكستان – 120, تاجىكستان – 129-ورىندا تۇر. سونداي-اق قازاقستان ەاەو ەلدەرى – رەسەي (90-ورىن) مەن بەلارۋستەن (119-ورىن) اسىپ ءتۇستى.

ءموبيلدى ينتەرنەت جىلدامدىعى بويىنشا الەمدە ءباا، وڭتۇستىك كورەيا، نورۆەگيا، كاتار جانە قىتاي كوش باستاپ تۇر.

اناليتيكتەر قازاقستاندا ءموبيلدى ينتەرنەتتىڭ قولجەتىمدىلىگى مەن ساپاسىن ارتتىرۋ شارالارىن اتاپ ءوتتى.  ماسەلەن، اعىمداعى جىلدىڭ 9 ايىندا بايلانىس سالاسىنا سالىنعان ينۆەستيتسيا 17,8 پايىزعا ءوسىپ، 88,8 ميلليارد تەڭگەنى قۇرادى. سوڭعى بەس جىلدا كۇردەلى سالىمدار كولەمى جىلىنا ورتا ەسەپپەن 19%-عا ءوسىپ وتىر.

5G ەنگىزۋ بويىنشا جۇمىس جۇرگىزىلۋدە – 2019 جىلى قازاقستاندىق ۇيالى بايلانىس وپەراتورلارى جاڭا جەلىنى تەستىلەۋدى باستادى. وسى جىلدىڭ قىركۇيەگىندە تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ءۇش قالادا – نۇر-سۇلتان، الماتى جانە شىمكەنتتە 5G ستاندارتىنىڭ ۇيالى بايلانىسىن سىناقتان وتكىزە باستاعانىن ايتتى.

سونداي-اق تۇركىستاندا 5G جەلىسىنىڭ بازالىق ستانتسيالارى ىسكە قوسىلۋدا. وپەراتورلار –"قازاقتەلەكوم" اق، "كسەلل" اق، "كار-تەل" جشس، "موبايل تەلەكوم-سەرۆيس" جشس جاڭا جەلىنى سىناقتان وتكىزەدى.

2021 جىلدىڭ ءبىرىنشى جارتىجىلدىعىندا ەلىمىزدە 24,2 ميلليون ۇيالى بايلانىس ابونەنتى بار ەكەنى بەلگىلى بولدى. بۇل وتكەن جىلمەن سالىستىرعاندا 1,2%-كە ارتىق. ۇيالى بايلانىس وپەراتورلارى اراسىندا Kcell-دە ابونەنتتەر سانىنىڭ ەڭ ۇلكەن ءوسىمى بايقالادى ء(بىر جىلدا 2,1%-كە، 8 ميلليونعا دەيىن ارتقان). بۇل رەتتە Beeline ابونەنتتەرىنىڭ سانى 2,07%-كە ءوسىپ، 9,6 ميلليونعا جەتتى. Tele2/Altel ابونەنتتەرى 6,5 ميلليوندى قۇراپ وتىر.

2019-2025 جىلدار ارالىعىندا ءموبيلدى ينتەرنەتتى پايدالانۋشىلار سانى 54%-كە ارتادى دەپ بولجانۋدا. اناليتيكتەر 2025 جىلعا قاراي 3G-سەرۆيستەرى جالپى نارىقتىڭ نەبارى 28%-ءىن عانا قۇرايدى دەگەن بولجاممەن ءبولىستى. ونىڭ ىشىندە نەگىزگى ۇلەس (60%) 4G تەحنولوگيالارىنا تيەسىلى بولسا، جاڭا 5G جەلىلەرى نارىقتىڭ 12%-ءىن قامتيدى.

Abai.kz