ەلباسىنىڭ كەڭەسشىسى - ءباسپاسوز حاتشىسى ايدوس ۇكىباي نۇرسۇلتان نازارباەۆتىڭ "Nur Otan" توراعاسى وكىلەتتىگىن بەرۋ تۋرالى شەشىمىن ءتۇسىندىردى. 

"نۇرسۇلتان ءابىشۇلى اتقاراتىن قىزمەتىنە قاراماستان، ۇلتىمىزدىڭ كوشباسشىسى - ەلباسى، قازىرگى زاماننىڭ كورنەكتى ساياساتكەرى، الەمدىك قوعامداستىق مويىنداعان بەدەلدى تۇلعا بولىپ قالا بەرەتىنىن ءتۇسىنۋ كەرەك.

قازىرگى قازاقستاندى قۇرۋعا باستاما بولعان، ەلگە بار جانىن بەرگەن جانە وعان بۇكىل ءومىرىن ارناعان ادام ارقاشان حالىق مۇددەسىمەن ءومىر سۇرەتىنىن، ۇلتتىڭ جانە بۇكىل ەل بولاشاعى ءۇشىن كۇرەسەتىنىن اركىم تۇسىنەدى دەپ ويلايمىن. ەلباسىنىڭ بۇل ۇستانىمى وزگەرىسسىز قالادى.

نۇرسۇلتان نازارباەۆ ايتقانداي، Nur Otan پارتياسى، اسىرەسە، قازىر پاندەميادان تۋىنداعان جاھاندىق داعدارىس جاعدايىندا قازاقستان پرەزيدەنتىنىڭ باستى تىرەگى بولۋى كەرەك.

پارتيا جارعىسىنا سايكەس، ونىڭ توراعاسىن سايلاۋ جانە قىزمەتتەن بوساتۋ Nur Otan پارتياسى سەزىنىڭ ايرىقشا قۇزىرەتىنە جاتادى. وعان دەيىن نۇرسۇلتان نازارباەۆ پارتيا توراعاسى بولىپ قالا بەرەدى", - دەپ قوستى ەلباسىنىڭ كەڭەسشىسى – ءباسپاسوز حاتشىسى.

Abai.kz