بۇل كەرەڭدىك پە كەردەڭدىك پە؟
«ەستيتىن مەملەكەت» سىبىر مەن كۇبىردى دە ەستۋى ءتيىس ەمەس پە؟! ول نەگە ايعايدىڭ وزىنە سەلت ەتپەيدى؟
نەگىزى رەسمي قۇرىلىمدار الدىن الا بولجايتىن، وندا ىستەيتىن ادامدار ەرەكشە قابىلەتكە يە، ياعني كورەگەن جانە كورىپكەل، سەلت ەتكىزبەي سەزەتىن، تۇيسىگىمەن-اق تۇسىنەتىن، بولماس پا؟!
الدە ەستۋى ءتيىس مەملەكەتتىڭ قۇلاق تەسىگىن ماقتامەن بىتەپ، جارعاعىن قالىڭ جابۋمەن جاۋىپ تاستايتىندار وتىر ما داۋاپتى قىزمەتتەردە؟
بۇل كەرەڭدىك پە كەردەڭدىك پە؟
ارون اتابەكتىڭ قازاسىنان سوڭ ماحامبەتتىڭ باسى كەتىپ ەدى، ەنشى قانشا باس كەرەك دەپ جازعان اقىننىڭ (مەرەي قارت) ءسوزى دە كەرەڭ قۇلاققا جەتپەي، كەردەڭ كەۋدەدەن وتپەي ايدالاعا كەتە بەرە مە؟!
ودان دا باسقا اشىق جازىپ جاتقاندار بار؟
ءتىپتى ارون اتابەك سول قىلمىستارعا كىنالى دەگەننىڭ وزىندە ول تۇرمەدەن سونشالىقتى ازىپ، تۋلاقتاي توزىپ شىقپاۋى ءتيىس ەدى عوي.
وڭتۇستىك افريكا رەسپۋبليكاسىنىڭ تار قاپاسىندا 30 جىلعا تاقاۋ وتىرعان نەلسون ماندەلا امان-ەسەن شىعىپ، ءتىپتى سول ەلدىڭ پرەزيدەنتى دە بولعان جوق پا؟!
عۇمىرىنىڭ جارتىسىنان كوبىن قىتايدىڭ تۇرمەلەرى مەن لاگەرلەرىندە، ۇيقاماقتا وتكىزگەن قاجىعۇمار شابدانۇلى دا 84 جىل ءومىر سۇرگەن ەدى عوي! ول پرەزيدەنت بولۋدى ماقسات ەتكەن جوق، ونىڭ ارمانى قازاق ەلىندە جەرلەنۋ ەدى. وعان جەتە المادى.
ەگەر دۇرىستاپ وقىساق، ءبىزدىڭ زاڭدار تۇرمەدەگىلەردىڭ دەنساۋلىعىنىڭ ناشارلاۋىنا مۇمكىندىك بەرمەيدى.
ەگەر ولاي بولىپ جاتسا، زاڭ بۇزۋ بار، جاناشىرلىق، ادامشىلىق جوق دەگەن ءسوز.
ەل باسشىلارىنىڭ كەڭەسشىلەرى قايدا قارايدى ەكەن؟! ولار اقىن-جازۋشىلارعا، ايتۋشىلارعا، الەۋمەتتىك جەلىگە جاقىن ەمەس پە، ءبىر قولىمەن الەۋمەتتىڭ تامىرىن باسىپ وتىرعان جوق پا؟!
بولات سىزدىق
Abai.kz
