رەداكتسيا: Abai.kz اقپارات پورتالىندا ءتۇرلى الەۋمەتتىك، ساياسي، تاريحي، قوعامدىق جانە ەكونوميكالىق ماسەلەلەر جازىلىپ تۇرادى.  رەداكتسيامىزدىڭ پوچتاسىنا دا ءتۇرلى حاتتار كەلىپ جاتادى. Abai.kz پىكىرلەرگە اشىق جانە وي مەن پىكىر قارسىلىعى بار تاراپتارعا بىردەي مىنبەر ۇسىنۋعا دايىن. پوچتامىزعا كەلەسىدەي حات كەلىپ ءتۇستى. حات ءماتىنىن وزگەرىسسىز تولىق جاريالاپ وتىرمىز. 

قازاقستان رەسپۋبليكاسىنىڭ
پرەزيدەنتى ق. ك. توقاەۆقا

اسا مارتەبەلى قاسىم-جومارت كەمەلۇلى!

مەن 2001 جىلى قىتايدىڭ التاي ايماعىنان وتباسىممەن اتاجۇرتىما كوشىپ كەلىپ، وسكەمەن قالاسىنا قونىستاندىم.
2003 جىلى قازاقستان رەسپۋبليكاسىنىڭ ازاماتتىعىن الدىق.

2004 جىلى وسكەمەن قالاسىنان تاماقتانۋ ورتالىعىن (كافە) اشىپ، ءوز كاسىبىمدى باستادىم.

2017 جىلى ەلورداعا كوشىپ كەلدىم. وسى جىلى نۇر-سۇلتان قالاسى اقان سەرى كوشەسى، №16 - عا ورنالاسقان «مەدينا» تۇرىعىن ءۇي كەشەنى جاڭادان سالىنىپ بولا بەرگەندە، ونىڭ 349 - ورىنعا جوسپارلانعان التى قاباتتىق اۆتوتۇراعىن وسى كەشەندى سالعان جسك «استانا ترانسكوم»-نان قوماقتى اقشاعا ساتىپ الدىم.

اتالعان كومپانيامەن ارامىزدا جازىلعان كەلىسىم-شارت بار. تۇرعىن ءۇي تولىق بىتكەن سوڭ، ءبىرتۇتاس جەكەشەلەندىرەتىن بولىپ كەلىستىك.
مەن سول جىلى اۆتوتۇراقتىڭ كەم-كەتىگىن تولىقتاپ، جۇمىس باستادىم. جسك «استانا ترانسكوم» توك تارتىپ بەردى.

كوپ وتپەي، «مەدينا» تۇرىعىن ءۇي كەشەنىن سالعان قوجايىن سماعۇلوۆ ەرىك اسىلبەكۇلى ءىستى بولىپ، سوتتالىپ كەتتى. قازىر ول تۇرمەدە جازاسىن وتۋدە. وسى تۇستا جسك «مەدينا كومپورت» قۇرىلىپ، ونىڭ زاڭگەرى رەتىندە چۋرسينا تاتيانا نيكولاەۆنا دەگەن ازاماتشا پايدا بولدى.

تاتيانا نيكولاەۆنا «مەدينا» تۇرىعىن ءۇي كەشەنىن جەكەشەلەندىرەمىز دەگەن سىلتاۋمەن مەن ساتىپ العان اۆتوتۇراقتى تەكسەردى. اۆتوتۇراقتىڭ تولىق جەكەشەلەنبەگەنىن كورىپ، «ويىندى» باستادى.

الدىمەن سول ءۇيدىڭ تۇرعىندارىن الىپ شىعىپ، شۋلاتتى. جارىقتان ايىردى. ءۇش اي جارىقسىز قالدىق. قازىر وسى ۇيدە تۇراتىن ءىنىمنىڭ پاتەرىنەن توك تارتىپ، اۆتوتۇراقتى جارىقتاندىرىپ وتىرمىن.
ول از بولعانداي، نۇر-سۇلتان قالاسىنىڭ پوليتسيا دەپارتامەنتىنە ارىز جازىپ، ساتىپ العان اقشامنىڭ قايدان كەلگەنىن سۇراتتى.

تاتيانا نيكولاەۆنا قىزمەت ەتەتىن جسك «مەدينا كومپورت»-تىڭ ارىزى نەگىزىندە پوليتسيا دەپارتامەنتى مەنى جارتى جىل تەكسەردى. تۇرمەگە اپارىپ، «مەدينا» تۇرىعىن ءۇي كەشەنىن سالعان سماعۇلوۆ ەرىك اسىلبەكۇلىمەن ەكى مارتە بەتتەستىردى.

سوڭىندا ءبارى مەنىڭ پايداما دۇرىس دەپ شەشىلدى. ەرىك اسىلبەكۇلى مەن اۆتوتۇراقتى ناق اقشاعا ساتىپ العانىمدى راستاپ، ءوز قولىمەن كۋالىك جازىپ بەردى.

جسك «مەدينا كومپورت»-تىڭ «ويىنى» بۇنىمەن دە بىتكەن جوق. ولار ەدى ماعان «سەن بۇل اۆتوتۇراقتىڭ يەسى ەمەسسىڭ!» دەپ، سوتقا بەرىپ، تۇتاس تۇرعىن ءۇي كەشەنىن مەنىڭ اۆتوتۇراعىممەن قوسىپ وزدەرىنە تىركەتۋگە ارەكەت جاساپ جاتىر.

قىسقاسى، الاياقتار اۆتوتۇراعىمدى تارتىپ الماقشى! ەستۋگە قاراعاندا، چۋرسينا تاتيانا نيكولاەۆنا بۇدان بۇرىن الاياقتىق بابىمەن ەكى رەت سوتتالعان ەكەن. ول ۇنەمى ءوزىن ۇلەسكەرلەردىڭ جاناشىرى رەتىندە كورسەتىپ، جۇرتتى شۋلاتىپ، اكىمشىلىككە قىسىم كورسەتۋمەن اينالىساتىن كورىنەدى.

ءتىپتى، چۋرسينا تاتيانا نيكولاەۆنا جالعىز ەمەس، ونىڭ ارتىندا قالانىڭ بۇرىنعى ورىنباسار اكىمى تۇرعان دا بولۋى مۇمكىن. ولار وسىنداي ادىسپەن قۇجاتى شالا بىتكەن كەشەندەردى تارتىپ الۋمەن اينالىسىپ كەلە جاتقان ۇيىمداسقان قىلمىستىق توپ بولۋى دا مۇمكىن...

اسا مارتەبەلى قاسىم-جومارت كەمەلۇلى!

مەن زاڭ سالتانات قۇرادى، سوت ءادىل شەشىم شىعارادى دەپ سەنەم.
بىراق، جسك «مەدينا كومپورت»-تىڭ «زاڭگەرى» بولعان چۋرسينا تاتيانا نيكولاەۆنا بۇدان بۇرىن ەكى رەت الاياقتىق بابىمەن سوتتالعانىن ەسكەرسەك، جسك «مەدينا كومپورت»-تىڭ مەنىڭ ادال ەڭبەگىممەن تاپقان اقشاما ساتىپ العان اۆتوتۇراعىمدى تارتىپ الۋ قاۋپى كۇشتىرەك بولىپ تۇر.

سىزدەن وسى ماسەلەنى ءوز نازارىڭىزعا الىپ، مەنىڭ قۇقىعىمنىڭ قورعالۋىنا كومەكتەسۋىڭىزدى سۇرايمىن!

زور ۇمىتەن،
ازامات تۇرسىن، 25.11.2021

Abai.kz