سارسەنبى, 19 قاڭتار 2022
وزەكتى 1366 7 پىكىر 26 قاراشا, 2021 ساعات 13:53

2022 جىل «شاڭىراقتى ساقتاۋ جىلى» دەپ جاريالانسىن!

قازاقستان رەسپۋبليكاسىنىڭ پرەزيدەنتى
قاسىم-جومارت توقاەۆ مىرزاعا!

قازاقتىڭ شاڭىراعى شايقالماسىن

قۇرمەتتى قاسىم-جومارت كەمەلۇلى!

«ەل بولامىن دەسەڭ بەسىگىڭدى تۇزە» دەگەن ەكەن قازاقتىڭ عۇلاما جازۋشىسى مۇحتار اۋەزوۆ.  قازىر قازاقتىڭ كيەلى بەسىگى قيسايىپ، قاسيەتتى شاڭىراعى شايقالىپ تۇر. سوندىقتان دا ناقتى شارا قولدانار ۋاقىت كەلدى.

قازىر قازاقستاندا ورتا ەسەپپەن جىلىنا 150 مىڭنان اسا جاس شاڭىراق كوتەرسە، سونىڭ 55 مىڭعا جۋىعى 1 جىلدا اجىراسىپ كەتەدى ەكەن. سوندا كۇن سايىن ەلىمىزدە 150 شاڭىراق قۇلايدى دەگەن ءسوز. (54750 :365 كۇن = 150) بۇل قازاقستاندا ءار كۇن سايىن 150 ءۇيى بار 1 اۋىل جويىلىپ وتىرعانمەن بىردەي.

وكىنىشتىسى سول، بۇل سان جىل سايىن ارتىپ بارادى... ءار اجىراسقان وتباسىندا 2 بالادان بار دەسەك، 1 جىلدا 100 مىڭ بالا ءتىرى جەتىم، 50 مىڭنان اسا انا ءتىرى جەسىر اتانادى. ال، تاۋەلسىزدىك العان 30 جىلدىڭ ىشىندە قانشا وتباسى اجىراستى، قانشاما بالا ءتىرى جەتىم، قانشاما انا ءتىرى جەسىر اتاندى؟!

بۇل كۇندەرى ميلليونعا جۋىق بالا اكەسىز نەمەسە وگەي اكەنىڭ قولىندا ءوسىپ كەلەدى.

بۇل جاعداي بالالاردىڭ مىنەز-قۇلقىنا كەرى اسەر ەتەتىنى بەلگىلى. ونى زەرتتەپ جۇرگەن ۇكىمەت بار ما؟! حالىقارالىق تاۋەلسىز ساراپشىلاردىڭ مالىمەتىنشە، قازاقستان ءوز-وزىنە قول جۇمساۋ مەن اجىراسۋدان ورتا ازيادا 1-ءشى، الەمدە العاشقى ورىنعا كىرەدى دەيدى.

بۇل راس بولسا، زور قاسىرەت ەمەس پە؟!

ءبىزدىڭ ۇكىمەت وقيعانىڭ سەبەبىمەن ەمەس، سالدارىمەن عانا كۇرەسىپ كەلەدى. سوتتار الدىنا بارعان ەرلى-زايىپتىلاردى ونلاين بولسا دا تەز اجىراتىپ جىبەرەدى.

بيلىكتىڭ جۇمىسى اجىراسقان اكەدەن بالاعا اليمەنت الىپ بەرۋ، سوتپەن دۇنيە-مۇلكىن ءبولۋ، بالالاردى ءبولىسۋ، جاردەماقى تاعايىنداۋ، جالعىزباستى انا مارتەبەسىن بەرۋ ت. ب. شارالاردى عانا قابىلدايدى. بۇدان اجىراسۋ توقتامايدى. اجىراسۋ مەن ءوز-وزىنە قول جۇمساۋ كوبەيە بەرەدى.

قازىر ناقتى شەشىم قابىلدايتىن ۋاقىت جەتتى.

قۇرمەتتى قاسىم-جومارت كەمەلۇلى!

مەنىڭ ءۇش ۇسىنىسىم بار.

ءبىرىنشى، 2022 جىلدى «شاڭىراقتى ساقتاۋ جىلى» دەپ جاريالانسىن.

ەكىنشى، اجىراسۋ مەن ءوز-وزىنە قول جۇمساۋدىڭ باستى سەبەپتەرىن انىقتاۋ ءۇشىن ارنايى مەملەكەتتىك كوميسسيا قۇرىلسىن. ەلىمىزدەگى اجىراسۋ مەن ءوز-وزىنە قول جۇمساۋدىڭ باستى سەبەپتەرىن عىلىمي تۇرعىدا كاسىبي ماماندار جان-جاقتى تولىق زەرتتەسىن، قورتىندىسىن شىعارسىن.

ءۇشىنشى، مەملەكەت اجىراسۋ مەن ءوز-وزىنە قول جۇمساۋدىڭ باستى سەبەپتەرىن انىقتاعاننان كەيىن، ولاردى جويۋعا جۇمىستانسىن. مەملەكەتتىك باعدارلامالار قابىلداسىن، قازىنادان مول قاراجات ءبولىنسىن.

ەگەر دە بۇگىن ناقتى شەشىم بولماسا، اناۋ كىنالى، مىناۋ كىنالى دەپ جۇرە بەرسەك، بۇل ىندەت جالعاسا بەرەدى. ەرتەڭ سوڭىندا قازاق ۇلتى جەر بەتىنەن جويىلىپ تىنادى.

ەلدىڭ اماناتىن جەتكىزۋ، ۇسىنىس ايتۋ بىزدەن، ناقتى شەشىم قابىلداۋ سىزدەن بولسىن، قۇرمەتتى پرەزيدەنت مىرزا!

جانىبەك قوجىق6

ماڭعىستاۋ وبلىسى

Abai.kz

7 پىكىر