سارسەنبى, 19 قاڭتار 2022
3169 44 پىكىر 1 جەلتوقسان, 2021 ساعات 11:46

ەلباسىنىڭ پورترەتى بار بانكنوت شىعارىلدى

قازاقستان ۇلتتىق بانكى قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان نومينالى 20 000 تەڭگەلىك مەرەيتويلىق بانكنوتتى اينالىمعا شىعارادى. بۇل تۋرالى ۇلتتىق بانكتىڭ ءباسپاسوز قىزمەتى جازدى. 

مەرەيتويلىق بانكنوتتىڭ ديزاينى بىرەگەي تەحنولوگيا بويىنشا دايىندالدى: بانكنوتتىڭ تىگىنەن ورنالاسقان جانە نومينالدىڭ گولوگرافيكالىق بەينەسىن، تاۋەلسىزدىكتىڭ 30 جىلدىعىنا ارنالعان لوگوتيپتى جانە مەملەكەت باسشىسى ق.ك. توقاەۆتىڭ فاكسيميلەسىن قامتىعان مەتالسىزداندىرىلعان جولاق الەمدە العاش رەت قولدانىلدى.

مەرەيتويلىق بانكنوتتىڭ 27 قورعانىش ەلەمەنتى بار. بانكنوتتىڭ ديزاينى اينالىستاعى اقشا بەلگىلەرىمەن بىرىڭعاي ستيلدە جاسالعان: بەت جاعى نەگىزىنەن تىك بەينەلەردى، سىرتقى جاعى كولدەنەڭ بەينەلەردى قامتيدى. بانكنوت باسىم ءتۇس – سۇر تۇستە ورىندالعان. بانكنوت كولەمى 155ح79مم.

بەت جاعىنداعى نەگىزگى بەينەلەر – قازاقستان رەسپۋبليكاسىنىڭ مەملەكەتتىك رامىزدەرى، قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆ پورترەتىنىڭ گولوگرافيالىق بەينەسى، قازاقستاننىڭ تاۋەلسىزدىگى مەن مەملەكەتتىلىگىنىڭ نىشانى رەتىندە «قازاق ەلى» مونۋمەنتى، «ماڭگىلىك ەل» سالتانات قاقپاسى، قازاقتاردىڭ ءداستۇرلى تۇرعىن ءۇيى «كيىز ءۇيدى» بەزەندىرۋ جەلىسى بويىنشا «باسقۇر» – تاسپاسىنداعى قازاقتىڭ ۇلتتىق ورنەگىنىڭ فراگمەنتى.

سىرتقى بەتىندەگى نەگىزگى بەينەلەر – قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ پورترەتى، نۇر-سۇلتان قالاسىنىڭ جانە اقوردا پرەزيدەنت رەزيدەنتسياسىنىڭ پانورامالىق كورىنىسى، قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەۋگە ارنالعان لوگوتيپ بەينەسى.

نومينالى 20 000 تەڭگەلىك مەرەيتويلىق بانكنوت قازاقستان رەسپۋبليكاسىنىڭ بۇكىل اۋماعىندا تولەمدەردىڭ بارلىق ءتۇرى بويىنشا ناقتى قۇنى بويىنشا قابىلداۋعا، سونداي-اق قازاقستان رەسپۋبليكاسىنىڭ بارلىق بانكتەرىندە بانكتىك شوتتاردا اۋدارۋعا، ۇساقتاۋعا جانە ايىرباستاۋعا مىندەتتى.

ەلباسىنىڭ پورترەتى بار نومينالى 10 000 تەڭگەلىك العاشقى مەرەيتويلىق بانكنوت 2016 جىلى شىعارىلعانىن جانە قازاقستان رەسپۋبليكاسى تاۋەلسىزدىگىنىڭ 25 جىلدىعىنا ورايلاستىرىلعانىن ەسكە سالامىز.
قازىرگى كەزدە قازاقستاندا نومينالى 200, 500, 1 000, 2 000, 5 000, 10 000 جانە 20 000 تەڭگەلىك بانكنوتتار اينالىستا قولدانىلىپ ءجۇر.

Abai.kz

44 پىكىر