30 جىلعا - 30 قاستاندىق!

30 جىلداعا ۇساق-تۇيەك "جەتىستىكتەرىڭدى" ايتىڭدار، جارايدى دەلىك. (كەرەمەت جەتىستىكتەرىڭ جوق، ونى وزدەرىڭ دە، حالىق تا بىلەدى...)
"30 جىلدا مىناداي ۇلكەن قاتەلىكتەر جىبەردىك، بۇل بىزگە بولاشاقتا ساباق بولۋى ءتيىس..." دەپ مويىنداساڭدار، سول الدەقايدا ارتىق بولار ەدى-اۋ... بىراق وعان دوتەندەرىڭ مەن وتىرىك كەۋدەلەرىڭ شىدامايدى عوي...
30 جىلدا سەندەر جاساعان كەشىرىلمەس قاتەلەر:
1. بۇكىل جەراستى/جەرۇستى بايلىقتى شەتەلگە شيكىزات قىپ ساتۋدى عانا بىلدىڭدەر!
2. بارلىق سالانى وپگ اينالدىرىپ، جەمقور دا قىلمىسكەر جۇيەنى قۇردىڭدار!
3. جەردى شەتەلدىكتەرگە ساتتىڭدار! ۋربانيزاتسيا دەپ، اۋىلداردى جوق قىلدىڭدار!
4. جەكەشەلەندىرۋدى وزدەرىڭ ءۇشىن جاسادىڭدار، پريحۆاتيزاتسيالاۋ جۇيەسىن قۇردىڭدار، سول ارقىلى بۇكىل جەراستى/جەرۇستى بايلىقتى دا، جەردى دە، تاۋدى دا، تاستى دا، وزەن-كولدى دە، زاۋىت-فابريكانى دا، ۇيلەر مەن عيماراتتاردى دا وزدەرىڭ ءبولىپ الدىڭدار. ال ءبىر ءۇيىن جەكەشەلەندىرە الماي، ساۋساعىن سورىپ قالعان حالىق قانشاما!.
5. جۇمىسسىزدىقتى ۇلعايتتىڭدار!
6. جاستار ساياساتى، ۇلتتىق يدەولوگيا، دەموگرافيا ءنول بولدى!
7. "بانكتەردى ساۋىقتىرامىز" دەپ جىلدا ءوز بانكتەرىڭە قازىنادان تريلليونداپ قارجى ءبولىپ، قالتالارىڭا باستىڭدار! سول قارجى حالىقتىڭ وسال توپتارىنىڭ نەسيەسىن جابۋى ءتيىس ەدى. سوندا بانكتىڭ دە ەسەبى تۇگەل بولار ەدى، "ساۋىعار" ەدى، حالىقتىڭ دا موينىنداعى قامىتى جەڭىلدەر ەدى! سەندەردىڭ جەكەمەنشىك بانكتەرىڭ قازىنانى ءبىر سورىپ، حالىقتى ەكى سورىپ، مەملەكەتتى دە سورلاتتى، حالىقتى دا قاڭعىتتى!
8. ەكسپو، لرت، تۇككە العىسىز فورۋمدار مەن جيىندارعا ميللياردتاردى شاشتىڭدار!!!
9. تەڭگەنى قۇنسىزداندىردىڭدار!
10. باعانى رەتتەي المادىڭدار، دەۆالۆاتسيانى جىل سايىن بەتىمەن جىبەردىڭدەر!
11. ەكونوميكالىق دامۋ دەگەن - شيكىزات ساتۋ ەمەس، ءونىم ءوندىرۋ ەكەنىن ۇقپادىڭدار!
12. وندىرىلگەن ساپالى ونىممەن الدىمەن ءوز حالقىڭدى قامتاماسىز ەتىپ، تەك حالقىڭنان ارتىلعانىن شەتەلگە ەكسپورتتاۋدى ويلامادىڭدار! ازىن-اۋلاق ساپالى ءونىم بولسا، ونى تەك ەكسپورت ءۇشىن ءوندىرىپ، ال حالىققا 2-3 سورتتى ساپاسىز ءونىمدى قىمبات باعامەن ساتتىڭدار!
13. ەگىن ەگەردە، جيىن-تەرىن ماۋسىمىندا ديقانداردى ادەيى جانارماي-جاعارمايدان قىستىڭدار. قولدان دەفيتسيت ۇيىمداستىردىڭدار!
14. "الدىمەن ەكونوميكا، سوسىن ساياسات" دەپ، ەكونوميكانى ساۋداگەرلىكپەن، وزگە ەلگە تاۋەلدىلىكتى - ساياساتپەن شاتاستىردىڭدار!
15. حالىقتىڭ ءسوزىن سويلەگەندەردى جاۋ كوردىڭدەر دە، ولتىردىڭدەر!
16. التىنبەك سارسەنباەۆتىڭ، زامانبەك نۇرقادىلوۆتىڭ ءولىمى - سەندەردىڭ ەڭ ۇلكەن ساياسي قاتەلىكتەرىڭ!
17. دۋلات اعادىلدىڭ، ونىڭ ورىمدەي بالاسىنىڭ ءولىمى، ارون اتابەكتىڭ ءولىمى - سەندەردىڭ ساياسي قاتەلىكتەرىڭ!
18. قوعامدىق بەلسەندىلەردى جاپپاي قۋدالاۋ، تۇرمەگە جابۋ - سەندەردىڭ ساياسي قاتەلىكتەرىڭ!
19. جاڭاوزەن - سەندەردىڭ ساياسي قاتەلىكتەرىڭ!
20. بارلىق سايلاۋداعى فالسيفيكاتسيا - سەندەردىڭ ساياسي قاتەلىكتەرىڭ، السىزدىكتەرىڭ!
21. الەۋمەتتىك وسال توپتاردىڭ نەسىبەسىن ۇرلاپ جەپ، ولاردى 30 مىڭ جاردەماقىعا بايلاپ قويۋ - سەندەردىڭ ساياسي-الەۋمەتتىك قاتەلىكتەرىڭ!
22. كوپبالالى انالارعا "ەكى سيىر ال دا كۇنىڭدى كور" دەۋ - سەندەردىڭ بىلىكسىزدىكتەرىڭ!
23. دەموگرافيالىق احۋالدى كوتەرۋگە قۇلىقسىزدىقتارىڭ - ساياسي قاتەلىكتەرىڭ!
24. كوپبالالى وتباسىلاردى، جاس وتباسىلاردى، الەۋمەتتىك وسال توپتاردى تەگىن باسپانامەن قامتاماسىز ەتە الماعاندارىڭ - سەندەردىڭ قاتەلىكتەرىڭ!
25. ەليتالىق ۇيلەردى قاپتاتىپ، بايلارعا 10-100 ءۇي الۋىنا مۇمكىندىك جاساپ، كەدەيلەردىڭ باسپاناسىز بوسىپ ءجۇرۋى - سەندەردىڭ قاتەلىكتەرىڭ!
26. نەبارى 18 ملن حالىقتى جۇمىسپەن قامتاماسىز ەتە الماۋ - سەندەردىڭ قاتەلىكتەرىڭ!
27. ءبىلىم سالاسىنىڭ قۇلدىراپ، بىلىمسىزدەر مەن ساۋاتسىزداردىڭ، بىلىكسىز كادرلاردىڭ كوبەيۋى - سەندەردىڭ قاتەلىكتەرىڭ!
28. 1 سىنىپ وقۋشىسىنىڭ سومكەسىنىڭ سالماعى 7-10 كگ بولۋى - سەندەردىڭ بولاشاققا قاستاندىقتارىڭ!
29. جاستاردىڭ باعىت-باعدارسىز، يدەياسىز، مەملەكەتشىلدىك، وتانسۇيگىشتىك، ۇلتسۇيگىشتىك سەزىمسىز (رۋحاني قۇندىلىقسىز، ۇلتشىلدىق، مەملەكەتشىلدىك تۇرعىدا ارمان-ماقساتسىز) سانسىراپ قالۋى، بىلىمدىلەردىڭ شەت ەلدەرگە كوشۋى - سەندەردىڭ قاتەلىكتەرىڭ!
30. ءبىر عانا "رەسمي ءتىل" دەگەن زاڭدارىڭمەن مەملەكەتتىك ءتىلدى - قازاق ءتىلىن ولتىردىڭدەر! سول ارقىلى قازاقتىڭ رۋحىن ولتىردىڭدەر! قازاقتىڭ جانىن دەفورماتسياعا ۇشىراتتىڭدار! بۇل سەندەردىڭ كەشىرىلمەيتىن ەڭ ۇلكەن قاتەلىكتەرىڭ!

وسىمەن توقتايىن. ايتپەسە 30 جىلدىقتا جاساعان قاتەلىكتەرىڭ، قاستاندىقتارىڭ 30-دان كوپ، ءتىپتى 100-دەن اسىپ كەتەدى ەكەن... ال سەندەر ءبىر-ءبىر قاتىرما قاعاز بەن سۋۆەنير بەرىپ الداعاندارىنا، الدانعاندارىڭا مازسىڭدەر...

ساۋلە ابىلداحانقىزى

Abai.kz