نۇرسۇلتان نازارباەۆ «تاۋەلسىزدىك ساباقتارى» اتتى ماقالاسىندا پرەزيدەنت توقاەۆ تۋرالى ايتىپ، «ەكى جىل بۇرىن قازاقستاندا جوعارى لاۋازىم يەسى اۋىسقانىن» ەسىنە الدى.

«ماعان : «كونستيتۋتسياعا سايكەس، ءسىزدىڭ پرەزيدەنتتىگىڭىزگە شەكتەۋ قويىلماعان. سوڭعى سايلاۋدا سايلاۋشىلاردىڭ 98 پايىزى سىزگە داۋىس بەردى. وسى قىزمەتىنىڭدە قالىپ، جۇمىس ىستەۋدى جالعاستىرا بەرىڭىز»، دەگەندەر كوپ بولدى. «بىراق ءبارىنىڭ ءوز ۋاقىتى مەن كەزەگى بار»، - دەيدى ەلباسى.

نۇرسۇلتان نازارباەۆ قاسىم-جومارت توقاەۆتى پاتريوت جانە پىكىرلەس ادام دەپ اتاعان.

«ءۇش ونجىلدىق ىشىندە مەن كوپتەگەن سەرىكتەستەرىمدى كەزدەستىردىم، كوپتەگەن لايىقتى كادرلار شىعاردىم، كوپتەگەن وقۋشىلاردى تاربيەلەدىم. ولاردىڭ ىشىنەن مەن سىرتقى ىستەر ءمينيسترى، ۇكىمەت باسشىسى، بىرىككەن ۇلتتار ۇيىمى باس حاتشىسىنىڭ ورىنباسارى قىزمەتىندە بولعان كەزدە اسا قۇندى تاجىريبە جيناقتاعان، شىنايى پاتريوت، كاسىبي شەبەر، تاۋەلسىزدىكتىڭ العاشقى جىلدارىنان باستاپ مەنىڭ ارىپتەسىم بولعان قاسىم-جومارت كەمەلۇلى توقاەۆتى پرەزيدەنت لاۋازىمىنا ۇسىندىم. سايلاۋدا ءبىزدىڭ وتانداستارىمىزدىڭ باسىم كوپشىلىگى ونى قولدادى. وسىلايشا، ءبىز تاعى دا بۇكىل الەمگە حالىقتىڭ بىرلىگى مەن ءبىزدىڭ ساياساتىمىزدىڭ ساباقتاستىعىن كورسەتتىك»، - دەدى ەكس-پرەزيدەنت.

سونىمەن قاتار، ول، «ماڭگىلىك ەل» يدەياسىن تالقىلادى.

«پرەزيدەنتتەر الماسار، بىراق ءبىزدىڭ تاۋەلسىزدىگىمىز – ماڭگىلىك اجىراماس بولىگىمىز بولىپ قالۋى ءتيىس. بۇل ءۇشىن ءاربىر قازاقستاندىق ونىڭ نەگىزدەرىن نىعايتۋعا، كۇشىن ارتتىرۋعا، ءوزىنىڭ جاقسى اتىن ساقتاۋعا تىرىسۋى كەرەك. «ماڭگىلىك ەل» يدەياسىنىڭ ءمانى دە وسىندا. ەڭ باستىسى-ەلىمىز امان، ءبىزدىڭ بالالارىمىز «بوستاندىق اتتى كۇننىڭ» شۋاعىندا ءوسىپ كەلەدى. ماحاببات پەن مەيىرىمگە قانىپ وسكەن وسى بالالارىمىز «تۋعان جەرىم قازاقستانعا نە بەرە الامىن؟» - دەپ ويلانۋى كەرەك ەكەنىن ايتتى ەلباسى.

Abai.kz