ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتاتتار "قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى" زاڭ جوباسىن ءبىرىنشى وقىلىمدا ماقۇلدادى.

"ەلىمىزدىڭ زاڭنامالىق تاريحىندا العاش رەت "بيولوگيالىق قاۋىپسىزدىك" تۋرالى زاڭ جوباسىن قابىلدادىق. بۇل زاڭ جوبا مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىمەن ازىرلەنگەن. وسى قۇجات ەلىمىزدە بيوقاۋىپسىزدىكتى قامتاماسىز ەتۋگە ارنالعان. ول ءارتۇرلى ينفەكتسيالاردىڭ الدىن الۋعا، حالىقتىڭ دەنساۋلىعىن ساقتاۋعا، جالپى العاندا، قورشاعان ورتانى بيولوگيالىق قاۋىپتەردەن قورعاۋعا مۇمكىندىك بەرەدى", - دەدى نۇرلان نىعماتۋلين.

پالاتا سپيكەرى اتاپ وتكەندەي، بۇل زاڭ جوباسى قازاقستاندا بيولوگيالىق قاۋىپسىزدىكتى قامتاماسىز ەتۋدىڭ جاڭا مودەلىن قۇرۋ ءۇشىن قۇقىقتىق نەگىز بولادى جانە ازاماتتار مەن قورشاعان ورتانى قورعاۋعا باعىتتالادى. وسى زاڭ جوباسى بيولوگيالىق قاۋىپسىزدىك سالاسىنداعى مەملەكەتتىك ساياساتتى ىسكە اسىرۋدىڭ بىرىڭعاي جۇيەسىن قالىپتاستىرۋعا، مەملەكەتتىك ورگانداردىڭ وكىلەتتىكتەرىن ناقتى اجىراتۋعا جانە ولاردىڭ قىزمەتىن ۇيلەستىرۋگە مۇمكىندىك بەرەدى.

سونىمەن قاتار، دەپۋتاتتار وسى زاڭ جوباسىن تالقىلاۋ بارىسىندا بيولوگيالىق قاۋىپسىزدىك سالاسىنداعى بىرىڭعاي مەملەكەتتىك اقپاراتتىق جۇيە دەرەكتەرى ماسەلەلەرىنە ەرەكشە نازار اۋداردى. اتاپ ايتقاندا، مەملەكەتتىك اقپاراتتىق جۇيەلەردى زاڭدى تۇلعالاردىڭ، ونىڭ ىشىندە جەكە تۇلعالاردىڭ اقپاراتتىق جۇيەلەرىمەن ينتەگراتسيالاۋ كەزىندە تۋىنداۋى مۇمكىن ماڭىزدى اقپاراتتىڭ جاريا ەتىلۋى نەمەسە جوعالىپ كەتۋىنە قاتىستى ماسەلەلەردى كوتەردى.

ءماجىلىس سپيكەرى اتاپ وتكەندەي، اقپاراتتىق جۇيەلەردى بىرىكتىرگەننەن كەيىن دەرەكتەر قورىنا قول جەتكىزە الاتىن بارلىق ۇيىمدار قولجەتىمدىلىگى شەكتەۋلى جۇيەنى ەنگىزۋى ءتيىس.

وسى رەتتە، نۇرلان نىعماتۋلين دەنساۋلىق ساقتاۋ مينيسترىنە بيولوگيالىق قاۋىپسىزدىك سالاسىنداعى بىرىڭعاي مەملەكەتتىك اقپاراتتىق جۇيەنى قۇرۋ بارىسىن جەكە باقىلاۋعا الۋ قاجەتتىگىن ايتتى.

Abai.kz