قۇرمەتتى الماتىلىقتار!

قالاداعى اۋىر جاعدايعا بايلانىستى وزدەرىڭىزگە ۇندەۋ جولدايمىن.

قالامىزدىڭ تىنىشتىعىن بۇزۋعا ارانداتۋشىلار ەكسترەميستىك ارەكەتتەرىمەن سىرتتان دا، ىشتەن دە اسەر ەتۋدە.

الماتىنىڭ تىنىشتىعى مەن بەيبىت ءومىرىن ساقتاۋ ماقساتىندا قۇقىق قورعاۋ ورگاندارى قاجەتتى شارالاردى قابىلداۋدا. قازىر قالاداعى جاعداي بيلىك باقىلاۋىنا الىندى.

ارانداتۋشىلار مەن ەكسترەميستەر ۇستالىپ، بۇلىك سالۋشىلار انىقتالىپ جاتىر.

جاڭا عانا مەملەكەت باسشىسى 2022 جىلعى 5 قاڭتارداعى ساعات 01:30-دان 2022 جىلعى 19 قاڭتاردىڭ ساعات 00:00 كەزەڭى ارالىعىندا الماتى قالاسىندا توتەنشە جاعداي ەنگىزۋ تۋرالى جارلىققا قول قويدى. بۇل زاڭدىلىق پەن ءتارتىپتى قالىپقا كەلتىرۋ، قوعام قاۋىپسىزدىگىن ساقتاۋ، ازاماتتاردىڭ بوستاندىعى مەن قۇقىعىن قورعاۋ جولىنداعى ماڭىزدى شەشىم.

ەل پرەزيدەنتىنىڭ جارلىعىنا سايكەس قالالىق پوليتسيا دەپارتامەنتىنىڭ باستىعى، گەنەرال قانات تايمەردەنوۆ الماتى قالاسىنىڭ كومەندانتى بولىپ تاعايىندالدى.

اكىمدىك قالانىڭ تىنىس-تىرشىلىگىن قامتاماسىز ەتەتىن بارلىق سالانى قالىپتا ۇستاۋ ماقساتىندا جۇمىس ىستەۋدە.

ءبىزدىڭ ورتاق ماقساتىمىز – قالامىزدا تىنىشتىق پەن تۇراقتىلىقتى قامتاماسىز ەتۋ، بەيبىت حالىقتى قاۋىپ-قاتەردەن امان ساقتاۋ.

سوندىقتان ءبارىڭىزدى ارانداتۋشىلىق پەن زاڭسىزدىق ارەكەتتەردى قولداماۋعا شاقىرامىن.

بۇگىنگى تۇندە قالامىزدىڭ تىنىشتىعىن ساقتاۋعا اتسالىسقان ءتارتىپ ساقشىلارى مەن بارلىق جاۋاپتى قىزمەتكەرلەرگە تۇسىنىستىك تانىتىپ، جاۋاپكەرشىلىكپەن قاراعان الماتىلىقتارعا راحمەتىمدى ايتامىن!

Abai.kz