قاڭتار ايىنىڭ ەكىسى كۇنى جاڭاوزەن تۇرعىندارى قالانىڭ ورتالىق الاڭدارىنا شىعىپ، سۇيىتىلعان گاز باعاسىنىڭ تىم قىمباتتاپ كەتكەنىنە نارازىلىق ءبىلدىردى. نارازىلىق اكتسيالارى وزگە دە ايماقتاردا قولداۋ تاۋىپ، ەلىمىزدىڭ بىرقاتار وڭىرلەرى ەرەۋىلدەرگە شىقتى.

قاڭتاردىڭ تورتىندە جاعداي ۋشىعا ءتۇستى. اقتاۋ، اقتوبە، الماتى، نۇر-Cۇلتان، شىمكەنت، تاراز جانە وزگە دە قالالاردا قارسىلىق اكتسيالارى جاپپاي تارتىپسىزدىككە ۇلاستى. نارازىلىق اكتسيالارىنا شىعۋشىلار قالالىق اكىمدىكتەردى باسىپ الۋعا تىرىسىپ، قۇقىق قورعاۋ ورگان قىزمەتكەرلەرىمەن قاقتىعىستى.

الماتىدا نارازى حالىق «الماتى ارەنا» سپورت سارايىنىڭ جانىنا جينالدى. ولاردىڭ سانى باستاپقىدا بەس جۇزگە جۋىق بولاتىن، ارتىنشا بىرنەشە مىڭنان اسىپ كەتتى. نارازى حالىق تولە بي كوشەسىن بويلاي ءجۇرىپ، ورتالىق اكىمدىككە قاراي بەت الدى. ولار جول بويى ءتارتىپ ساقشىلارىمەن قاقتىعىستى. ءتارتىپ ساقشىلارى حالىقتى توقتاتۋ ماقساتىندا كوزدەن جاس اعىزار گاز قولداندى، دەگەنمەن بۇل حالىققا بوگەت بولمادى. جولدا بىرنەشە پوليتسيا كولىكتەرىن قيراتىپ، ورتكە وراعان نارازى توپ الماتى قالاسىنىڭ اكىمدىگىنە كەلىپ جەتتى. الاڭدا ولارعا قارسى اسكەريلەر مەن ارنايى جاساق وكىلدەرى بولاتىن. ولار حالىقتى تاراتۋ ءۇشىن گاز قولدانىپ، رەزەڭكە وق اتتى.

قايتار ايىنىڭ بەسىندە جاعداي وتە قاتتى ۋشىقتى. ون مىڭعا جۋىق نارازى توپ ارانداتۋ ارەكەتتەرىنە ەرىپ، قالا كوشەلەرىنە تاعى شىقتى. ولار ءتارتىپ ساقشىلارىن سوققىعا جىعىپ، ارنايى اسكەري كولىكتەردى تارتىپ الدى. بىرنەشە كولىكتى ورتەپ، جول بويىنداعى دۇكەن، بانك عيماراتتىن تالقاندادى. قالا كوشەلەرى ارقىلى ولار ورتالىق الاڭعا جەتىپ، قاقتىعىس باستالدى. ون مىڭنان استام نارازى توپ ءتارتىپ ساقشىلارىمەن قاقتىعىسىپ، قالا اكىمدىگىن باسىپ الدى. الماتى قالاسى اكىمدىگى ورتكە وراندى. سونىمەن بىرگە قالادا پروكۋراتۋرا، بانك عيماراتتارى ورتەنىپ جاتىر. الماتى اۋەجايىنا شابۋىل جاسالعان. اۋداندار بويىنشا پوليتسيا بولىمشەلەرى شابۋىلعا ۇشىراۋدا. سوڭعى مالىمەتتەر بويىنشا 8 اسكەري مەن پوليتسيا قىزمەتكەرى قازا تاپقان.

Abai.kz