قازىرگى بولىپ جاتقان ساياسي وزگەرىستەردى نازارباەۆ رەجيمىنىڭ تولىقتاي كۇيرەۋ ءساتى دەپ اتاساق تا بولادى. 2 قاڭتار نازارباەۆ اۋلەتى ءۇشىن قارالى كۇن، سەبەبى ءدال وسى كۇننەن باستاپ بيلىكتىڭ بيىك مىنبەرىنەن مىقتىلاپ تۇرىپ ورىن العان نازارباەۆ جاقىندارى بىرىنەن سوڭ ءبىرى قىزمەتىنەن كەتە باستادى. رەسمي تۇردە ولاردىڭ بارلىعى دا «ءوز ەرىكتەرىمەن كەتۋدە»، الايدا بايلىقتان ەشكىمنىڭ ءوز ەركىمەن باس تارتپايتىنىن ەسكەرسەك، بارلىعى دا تۇسىنىكتى بولا تۇسەدى. 

تاۋەلسىزدىك كۇنىن تويلاۋ قارساڭىندا پرەزيدەنت توقاەۆ نازارباەۆتى «ەڭ ۇلى تۇلعا» رەتىندە ۇلىقتاسا، 2022 جىلدىڭ قاڭتارىندا ەلباسى جايلى ءسوز ايتپادى. ايتقان ءبىر اۋىز ءسوزىنىڭ ءوزى ماقتاۋ ەمەس داتتاۋ ىسپەتتەس كورىندى. 11 قاڭتار كۇنى ەل پرەزيدەنتى ۇكىمەت باسشىسىن تاعايىنداۋ تۋرالى جيىندا بىلاي دەدى: «ءبىرىنشى پرەزيدەنت – «ەلباسى» تۇسىندا وتە تابىستى كومپانيالار مەن حالىقارالىق دەڭگەيدەگى باي ادامداردىڭ توبى پايدا بولدى. حالىققا تيەسىلى حالىققا بەرەتىن، جۇيەلى تۇردە كومەكتەسەتىن ۋاقىت كەلدى. ۇكىمەت كومپانيالاردى انىقتاپ، ولارمەن «قازاقستان حالقىنا» قورىنا اۋداراتىن سالىمدارىن انىقتاۋى ءتيىس»، - دەدى. بۇل ارينە ايىپتاۋ ەدى.

وسىنداي ايىپتاۋلار بولىپ جاتقان تۇستا، نازارباەۆتىڭ ءوزى پىكىر بىلدىرمەدى. ءتىپتى ونىڭ قايدا ەكەنى دە بەلگىسىز. تىلشىلەر ءتۇرلى بولجام ايتۋدا.

ەلدە بولىپ جاتقان وقيعالارعا قاتىستى نازارباەۆتىڭ كىشى قىزى ءاليا نازارباەۆا پىكىر ءبىلدىرىپ، جازبا قالدىردى. «ەلدە بولىپ جاتقان جاعداي جۇرەگىمە اۋىر ءتيدى. زارداپ شەككەندەر مەن قازا بولعانداردىڭ قايعىسى مەن ىشتەگى وكىنىشتى جەتكىزۋگە ءسوز تاپپاي وتىرمىن. قازا بولعانداردىڭ وتباسىنا قايعىرىپ كوڭىل ايتامىن. بۇل قاتاڭ ساباق بارلىعىمىز ءۇشىن ەل تاريحىنداعى وسىنداي سوڭعى وقيعا بولسىن. ادامداردىڭ بەيبىت كەزەڭدە قازا بولىپ جاتقانى دۇرىس ەمەس.

قازىرگى كەزەڭدە اكەمدى مورالدىق جاعىنان قولداپ جاتقاندارىڭىز ءۇشىن العىسىمدى بىلدىرەمىن. اكەم ەلدىڭ ءار ايماعىنداعى تۇرعىنداردان كوپتەگەن حابارلاما الىپ جاتىر. قازاقستانعا بەيبىتشىلىك پەن گۇلدەنۋ، قازاقستاندىقتارعا اماندىق پەن دەنساۋلىق تىلەيمىن»، - دەپ جازدى نازارباەۆا. ءبىر قىزىعى ول بۇل جازباسىن ءباا وتىرىپ جازعانى انىقتالدى، ال كوپ ۇزاماي ول ءوزىنىڭ الەۋمەتتىك جەلىدەگى پاراقشاسىن ءوشىرىپ تاستادى.

كوپ ۇزاماي نازارباەۆتار اۋلەتىنىڭ كۇيەۋ بالالارى قىزمەتتەرىنەن الىندى. «QazaqGaz» ۇلتتىق كومپانياسىنىڭ باسقارما توراعاسى قايرات شارىپباەۆ پەن «قازترانسويل» كومپانياسىنىڭ باسقارما توراعاسى ديماش دوسانوۆ قىزمەتتەن كەتتى. 15 قاڭتاردا «سامۇرىق-قازىنا» قورىنىڭ ءباسپاسوز قىزمەتى وسىنداي حابارلاما تاراتقان ەدى.

قايرات شارىپباەۆ نۇرسۇلتان نازارباەۆتىڭ ۇلكەن قىزى داريعا نازارباەۆانىڭ كۇيەۋى، ال ديماش دوسانوۆ - نازارباەۆتىڭ كىشى قىزى ءاليا نازارباەۆانىڭ كۇيەۋى. وسىلايشا ەكى كۇيەۋ بالا ءبىر كۇندە بيىك مىنبەردەن ءتۇسىپ قالدى.

17 قاڭتار كۇنى قازاقستاندا تانىمال بيزنەسمەن، نۇرسۇلتان نازارباەۆتىڭ كۇيەۋ بالاسى تيمۋر قۇلىباەۆ «اتامەكەن» ۇلتتىق كاسىپكەرلەر پالاتاسى باسشىلىعىنان كەتەتىنىن مالىمدەدى. ونىڭ ۇندەۋى پالاتانىڭ سايتىندا جاريالاندى.

«بۇگىننەن باستاپ مەن «اتامەكەن» ۇلتتىق كاسىپكەرلەر پالاتاسى تورالقاسىنىڭ سايلانعان توراعاسى وكىلەتتىگىن دوعارۋدى ۇيعاردىم. سەزد دەلەگاتتارى مەن تورالقا مۇشەلەرىنە ماعان سەنىم بىلدىرگەنى ءۇشىن العىس ايتامىن. ۇلتتىق كاسىپكەرلەر پالاتاسىنىڭ جوعارى باقىلاۋ ورگانىن سەگىز جىل بويى باسقارۋ مەن ءۇشىن ۇلكەن قۇرمەت پەن جاۋاپكەرشىلىك بولدى»، -دەدى قۇلىباەۆ ۇندەۋىندە. قۇلىباەۆ دينارا قۇلىباەۆانىڭ كۇيەۋى جانە ەلىمىزدەگى ەڭ اۋقاتتى اۋلەتتىڭ بىرىنە جاتادى.

بۇگىن تەك قانا تيمۋر قۇلىباەۆ ەمەس، نازارباەۆتىڭ جيەنى دە قىزمەتىنەن الىندى. «مەملەكەت باسشىسىنىڭ وكىمىمەن سامات ساتىبالدىۇلى ءابىش قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى لاۋازىمىنان بوساتىلدى»، - دەپ جازدى قر پرەزيدەنتىنىڭ رەسمي سايتى.

ەندىگى تاڭدا داريعا نازارباەۆا قايدا دەگەن سۇراق تۋىنداۋدا. بۇعان دەيىن ونىڭ كوروناۆيرۋس جۇقتىرىپ، الماتىداعى ۇيىندە ەمدەلىپ جاتقانى ايتىلعان ەدى. الايدا بەيرەسمي ءبارى دە باسقاشا بولۋى مۇمكىن...

نازارباەۆتىڭ ءىنىسى بولاتتىڭ دا قايدا ەكەنى ناقتى بەلگىلى ەمەس. قىرعىزستانداعى «24.kg» سايتىندا نازارباەۆتىڭ ءىنىسى بولات 6 قاڭتاردا تاڭەرتەڭ قىرعىزستانعا ءوتىپ، سول كۇنى بىشكەكتەن دۋبايعا باعىت العان ۇشاققا وتىرعانىن حابارلانعان ەدى، الايدا بيلىك رەسمي مالىمەت بەرمەدى.

قازىر تاريحي كەزەڭ. حالىق وتىز جىل بويى تۇرعان نازارباەۆ «يمپەرياسىنىڭ» قۇلاۋىن ءوز كوزىمەن كورۋدە.

كا مىرزا

Abai.kz