سەنبى, 4 اقپان 2023
بيلىك 3569 8 پىكىر 20 قاڭتار, 2022 ساعات 13:32

پەرۋاشەۆ وليگارحتار ۇرلاعان اقشانىڭ كولەمىن جاريالادى

ماجىلىستەگى "اق جول" فراكتسياسى پرەزيدەنتتىڭ "وليگارحتار حالىقپەن ءبولىسۋى كەرەك" دەگەن باستاماسىن قولدايتىنىن مالىمدەدى.

"دەوليگارحيزاتسيا قازاقستانداعى ساياساتتىڭ ءبىر بولىگىنە اينالۋى كەرەك. بىراق شاعىن بيزنەسكە سالىقتىق قىسىم جاساۋ ارقىلى وليگارحتاردى ىزدەۋدىڭ قاجەتى جوق، قۇرمەتتى سالىقشىلار! ول ادامدار بيۋدجەتتەن ەشتەڭە ۇرلاعان جوق. وفشوردا جەكە ۇشاق پەن ياحتانى تىعىپ وتىرعان جوق. مىڭداعان كاسىپكەردىڭ باسىن قاتىرىپ، حالىقتىڭ بانك كارتاسىمەن اۋداراتىن تيىن-تەبەندى باقىلاۋدىڭ ورنىنا ميلليارداپ اقشا ۇرلايتىندارمەن اينالىسقان دۇرىس", - دەدى دەپۋتات ازات پەرۋاشەۆ ءماجىلىستىڭ جالپى وتىرىسىندا.

ونىڭ ويىنشا، جاپپاي كاسىپكەرلىكتى دامىتۋ ءۇشىن شاعىن بيزنەسكە كاسسالىق سالىق سالۋدان باس تارتۋ قاجەت. قوسارلانعان قۇن سالىعىنىڭ شەگىن تومەندەتۋدى دە توقتاتقان ءجون.

"سونىڭ ءبارىن كادىمگى پاتەنتپەن الماستىرۋ قاجەت. وندايدا سالىق ورگاندارى ءبىر جىلدا تولەنەتىن سالىقتى انىقتايدى. ال كاسىپكەر ول پاتەنتتى ساتىپ الادى، بولدى، وعان ەشكىم تيىسپەيدى. تەكسەرىس جاساپ، باسىن قاتىرمايدى. كاسسالىق ەسەپشوتتاردى Ashyq-پەن سالىستىرمايدى. مەيلى، 5-500 تەڭگەگە ارتىق پايدا تاپسىن، وندا تۇرعان ەشتەڭە جوق. ەسەسىنە ميلليونداعان ادام ەشبىر كەدەرگىسىز جانە بيۋروكراتياسىز ءوز ءىسىن اشا الادى. مىنە، كەدەيشىلىكتى وسىلاي ازايتۋعا بولادى", - دەپ اتاپ كورسەتتى پەرۋاشەۆ.

دەپۋتات ۇساق جانە شاعىن بيزنەستى پاتەنتكە اۋىستىرۋ ارقاسىندا مىڭداعان جۇمىس ورنى اشىلادى دەپ سانايدى. ءتىپتى، جۇمىسپەن قامتۋ باعدارلامالارى اياسىندا جاسالماعان جۇمىستى تىندىرۋعا بولادى.

ءماجىلىس دەپۋتاتى ايىپپۇلدى ادامنىڭ جەكە تابىسىنا قاراي بەلگىلەۋدى ۇسىندى.

"ول باعدارلامالارعا ميللياردتاعان اقشا بولىنگەن. بىراق باسىم بولىگى ۇرلانىپ تۇرعان. بيزنەستى پاتەنتكە اۋىستىرسا، سالىقشىلاردىڭ قولى بوسايدى. ولار ناقتى جەمقورلار مەن وليگارحتاردى ۇستاپ، ۇرلانعان اقشانى قايتارۋعا ءتيىس. حالىقارالىق ساراپشىلاردىڭ باعالاۋى بويىنشا ول اقشانىڭ كولەمى 160 ميلليارد دوللاردى قۇرايدى جانە قازاقستاننىڭ ءبىر جىلدىق ىشكى جالپى ونىمىنە تەڭ. مىنە، بيۋدجەت كىرىستەرىنىڭ رەزەرۆى سوندا جاتىر. ۇكىمەت پەن فيسكالدار سول جەردە ءوز تاباندىلىعىن تانىتۋى شارت", - دەدى پەرۋاشەۆ.

دەپۋتات ازات پەرۋاشەۆتىڭ ايتۋىنشا، سوڭعى كەزدە سالىق سالۋ سالاسىندا ادىلەتسىزدىك انىق بايقالادى. كاسىپكەرلەردەن قاجەتسىز قاعازداردى تالاپ ەتەدى، ەسەپشوتتى بۇعاتتايدى. اقىر سوڭىندا تابىستى بيزنەستى بانكروتقا ۇشىراتادى.

"بانك كارتالارىنان جاسالاتىن تولەمدەر دە قاتاڭ باقىلاۋعا الىندى. ال قوسارلانعان قۇن سالىعىنىڭ شەگىن تومەندەتكەننەن كەيىن ينفلياتسيالىق پروتسەستەردىڭ سالدارىنان ۇساق بيزنەسكە، ءتىپتى، كوشەدە ءشوپ-شالام ساتاتىندارعا دا سالىق تولەۋگە تۋرا كەلەدى. دەمەك، ءىس جۇزىندە بيزنەسپەن اينالىسۋ ءتيىمسىز جانە قاۋىپتى بولادى", - دەدى پەرۋاشەۆ.

Abai.kz

8 پىكىر