قۇرمەتتى پرەزيدەنت مىرزا!
ەلدە الەۋمەتتىك-ەكونوميكالىق احۋالدى تۇراقتاندىرۋعا بايلانىستى شەشىمدەرىڭىزگە قولداۋ بىلدىرە وتىرىپ، وتكەندە تەلەديداردان ءوزىڭىز ايتقان «وگون نا پوراجەنيە!» دەگەن بۇيرىعىڭىزدىڭ كۇشىن توقتاتۋىڭىزدى سۇرايمىن.

لاڭكەستىك ارەكەتتەردى بىزدەر، قالامگەرلەر قاۋىمى دا ايىپتايمىز. الايدا اسىرا سىلتەۋشىلىكتىڭ سالدارىنان قاراپايىم ازاماتتار زارداپ شەكپەۋى كەرەك. وكىنىشكە قاراي الەۋمەتتىك جەلىلەردە پوليتسيا وعىنان قازا تاپقان بەيبىت تۇرعىندار تۋرالى اقپاراتتار كوبەيىپ كەتتى.

مىسالى، الماتىنىڭ بەيبىت تۇرعىنى ەربول شورمانوۆ جازىقسىز وققا ۇشقان (ماقسات ەرجانۇلىنىڭ فەيسبۋك پاراقشاسىنان).

اڭشى، ساياتشى، پەتروگليف زەرتتەۋشىسى ەرلان ستەپنياك كولىگىنەن اڭشى پىشاعى شىققانى ءۇشىن ءولىم قۇشقان.
جەلتوقسانشى قاھارماندار 1958 جىلى تۋعان قۇلسۇلتانوۆا گۇلزيرا سابازقىزى مەن 1949 جىلى تۋعان بيتكەمباەۆ قۋات كەرىمتاەۆيچ كولىكتەرىنە 60-قا جۋىق اۆتومات وعى ءتيىپ قازا تاپقان ءارى كولىكتەرى تۇگەل ورتەنىپ كەتكەن (ميربولات مىرزاتايۇلىنىڭ پاراقشاسىنان).

تالدىقورعاندا نۇربولات سەيىتقۇلوۆتىڭ وتباسى تۇگەلدەي، ءوزى، ايەلى جانە 15 جاستاعى قىزى پوليتسيا وعىنان قازا تاپقان.
«وگون نا پوراجەنيە» بۇيرىعى وسىلاي قاراپايىم حالىققا تەرىس اسەرىن تيگىزىپ جاتىر. ءدال قازىر كۇش قۇرىلىمدارى كەز كەلگەن لاڭكەستىك توپتى اۋىزدىقتاۋعا شاماسى كەلەدى. سوندىقتان ءبارىمىز دە سابىرعا كوشەيىك. قوعامدىق ءتارتىپ ازاماتتاردىڭ كونستيتۋتسيالىق ءومىر ءسۇرۋ قۇقىعىنا نۇقسان كەلتىرىلمەستەن قالپىنا كەلتىرىلگەنى ءجون!

مارات ءبايدىلداۇلى

Abai.kz