شوتلانديا اڭىزى

ارشاگۇلدەن ادەمى،
قايناتتى ءشاربات تاسىعان.
ءتاتتى ەدى ول بالدان دا،
ماس قىلار ارتىق شاراپتان.
ءىشتى پيكتتەر قۇمارتا،
قۇلاعانشا ماس بولىپ.
قاتارىنان نەشە كۇن
ۇيقتادى سوسىن تاس بولىپ.

شوتلاندياعا كەلدى كارول،
جاۋىنا قاتال، سۇمدارشا.
پيكتتەردى قىرىپ اياماي،
قىردى تاپ ءبىر اڭدارشا.
تىقسىردى تاۋدان اسىرىپ،
جەتكەنىن قىردى تاعى دا.
قىلىشتان جاتتى شاشىلىپ،
كومۋسىز مۇردە دالادا.

جاز كەلىپ جادىراپ،
قاۋىز جاردى ارشاگۇل.
سىرىن ايتار شاراپتىڭ،
قالمادى پيكتتە ءتىرى ۇل.
تومپەشىك بوپ انە ولار،
قىر باسىندا جاتتى كىل.
شاراپشىلار داڭقى اسقان،
مولالاردا قالعىپ ءبىر.

ارشاگۇلدى قىراتپەن،
كەلەدى كارول جەلدىرتە.
ىزىڭداپ ارا جول بويى،
شۋلايدى قۇستار كولدەردە.
قاھارى قاتتى پاتشانىڭ،
سۇرلانىپ ءتۇسى بۇزىلعان.
جاتسا دا ارشا تاباندا،
تامشى جوق ودان بۇيىرعان.

جولى بولعىش ۆاسسالدار،
ءورلى-قىرلى ءجۇر شاۋىپ.
استىنان تاستىڭ قۇلاعان،
الدى دەمدە تەز تاۋىپ.
تۇتقىن ەتتى سۋرىپ اپ،
ءۇن قاتپادى ولار بىراق.
ۇلى مەنەن قارت اكە،
پيكتتەردەن قالعان قوس تۇياق.

تۇسپەي كارول ات ۇستىندە،
وقتى كوزبەن اتتى ەكەۋىن.
توتىعىپ ءجۇزى قوس عارىپ،
كۇتەدى پاتشا كەشۋىن.
كەلدى بيىك قاباققا،
تومەندە تەڭىز شۋلاعان.
«قالدىرام ءتىرى، ايتساڭدار،
ءشارباتتىڭ سىرىن جاسىرعان.»

اكەلى-بالا ەكەۋى،
بارلادى ەبتەپ جان-جاعىن.
اراشاگۇل تولى اينالا،
تومەندە تەڭىز اق جالقىن.
سويلەدى سوندا اكەسى،
ساڭق ەتتى داۋسى وزگەشە.
«ءسوزىم بار ايتار وڭاشا،
پاتشانىڭ عانا وزىنە.»

«كارى ادامعا جان ءتاتتى،
نامىس وعان ايىپ پا؟
ايتامىن سىرىن ءشارباتتىڭ،»
دەدى پيكت پاتشاعا.
داۋسى قۇستاي قۇيقىلجىپ،
ايتتى ءسوزىن انىق تىم.
«اشار ەم سىرىن ءشارباتتىڭ،
ۇلىمنان، اتتەڭ، قورقامىن.»

«جاس ءۇشىن ءومىر ويىنشىق،
ءولىم دە وعان ءجاي نارسە.
باتىلىم بارىپ ايتا المان،
پەرزەنتىمنىڭ كوزىنشە.
و، پاديشا، بايلا ونى،
لاقتىر سوسىن تەرەڭگە.
ايتام سوندا سىرىمدى،
تۇرام سوندا سەرتىمدە.»

بالانى سوندا بايلادى،
اياق-قولىن تاس قىلىپ.
ءبىر-ەكى سىلكىپ الدى دا،
تەڭىزگە اتتى لاقتىرىپ.
جۇتتى تەڭىز قىسىلماي،
بالانى قىرشىن ونداعى.
قيادا سوناۋ تۇردى اكە،
پيكتتەردىڭ سوڭعى تۇياعى.

«ايتقانىمنىڭ ءبارى راس،
سەنە المادىم ۇلىما.
بەكىمەگەن ءالسىز جاس،
شىقپاعان ءالى مۇرتى دا.
ال ەندى ءبارىبىر،
شاپساڭ داعى وكىنبە.
قۇپياسىن ءشارباتتىڭ،
الا كەتەم كورىمە.»

اعىلشىن تىلىنەن اۋدارعان ناعىز قابشىقبايۇلى

Abai.kz